ଭୁଦ୍ରକ: ଶିକ୍ଷକଙ୍କ ଠାରୁ ୧୨ ଲକ୍ଷ ଲୁଟ ଘଟଣାରେ ଜଣେ ଅଭିଯୁକ୍ତ ଧରାହେବା ସହ ତା’ ଠାରୁ ୯ ଲକ୍ଷ ଟଙ୍କା ଜବତ କରିଛି ପୋଲିସ । ଅଭିଯୁକ୍ତଙ୍କୁ ଧରିଛି ଭଦ୍ରକ ଟାଉନ ପୋଲିସ ।
ଖବର ଅନୁଯାୟୀ, ଭଦ୍ରକ ଜିଲ୍ଲା ବନ୍ତ ବ୍ଲକ ଅନ୍ତର୍ଗତ ପୋଡ ପାଟଣା ଅଞ୍ଚଳର ଶିକ୍ଷକ ଅଶୋକ କୁମାର ଖିଲାର ଏସବିଆଇ ମୁଖ୍ୟ ଶାଖାକୁ ୧୨ ଲକ୍ଷ ଟଙ୍କା ନେବା ପାଇଁ ଆସିଥିଲେ । ଯାହାକି ସହର ଜନଗହଳି ଅଞ୍ଚଳରେ ଅବସ୍ଥିତ ।
ତେବେ ପୂର୍ବ ପ୍ରସ୍ତୁତି ଅନୁଯାଇ ଦୁଇ ଜଣ ଦୁର୍ବୃତ୍ତ ସେ ଟଙ୍କା ବ୍ୟଙ୍କକୁ ଝାମ୍ପି ନେଇ ଏକ ପଲ୍ସର ବାଇକରେ ଛୁ ମାରିଥିଲେ । ସ୍ଥାନୀୟ କିଛି ଯୁବକ ଦୁର୍ବୃତ୍ତଙ୍କ ପିଛା କରି ବିଫଳ ହୋଇଥିଲେ । ଏନେଇ ଖବର ପାଇଁ ଭଦ୍ରକ ସହରାଅଞ୍ଚଳ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା ।
ଶେଷରେ ଆସ୍କା ଥାନା ଅନ୍ତର୍ଗତ ଏମ ଶ୍ରୀକାନ୍ତଙ୍କୁ ମରାଠୀ ବାସା ଅଞ୍ଚଳରୁ ଗିରଫ କରିବା ସହ ୯ ଲକ୍ଷ ଟଙ୍କା ଜବତ କରିଛି ପୋଲିସ । ଏନେଇ ଆଜି(ଶୁକ୍ରବାର) ଭଦ୍ରକ ଜିଲ୍ଲା ଆରକ୍ଷୀ ଅଧିକ୍ଷକ ଚରଣ ସିଂ ମୀନା ସୂଚନା ଦେଇଛନ୍ତି । ଏଥିସହ ଜବତ ହୋଇଥିବା ୯ ଲକ୍ଷ ଟଙ୍କାକୁ ଶିକ୍ଷକ ଅଶୋକ କୁମାର ଖିଲାରଙ୍କୁ ପୋଲିସ ପକ୍ଷରୁ ହସ୍ତାନ୍ତର କରାଯାଇଥିବା ଜଣାପଡ଼ିଛି ।
ଇଟିଭି ଭାରତ, ଭଦ୍ରକ
