ବରଗଡ: ଆରମ୍ଭ ହେବାକୁ ଯାଉଛି ବିଶ୍ଵ ପ୍ରସିଦ୍ଧ ବରଗଡ଼ ଧନୁଯାତ୍ରା। ଏନେଇ ଶନିବାର ଜିଲ୍ଲାପାଳଙ୍କ ସମ୍ମିଳନୀ କକ୍ଷରେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଧନୁଯାତ୍ରା କମିଟି ସଭାପତି ତଥା ଜିଲ୍ଲାପାଳ ଜ୍ୟୋତିରଞ୍ଜନ ପ୍ରଧାନଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଯାତ୍ରା କମିଟିର ସମସ୍ତ କର୍ମକର୍ତ୍ତା ସାମିଲ ହୋଇଥିଲେ। ଚଳିତ ଧନୁଯାତ୍ରାକୁ କିପରି ଆକର୍ଷଣୀୟ କରାଯାଇ ପାରିବ ଏବଂ ଶାନ୍ତି ଶୃଙ୍ଗଳା ସହ ଅନୁଷ୍ଠିତ ହେବ ସେନେଇ ଗୁରୁତ୍ବ ଦିଆଯାଇଥିଲା ।
ଚଳିତବର୍ଷ ବରଗଡ଼ର ବିଶ୍ଵପ୍ରସିଦ୍ଧ ଧନୁଯାତ୍ରା ଡ଼ିସେମ୍ବର ୩୧ ତାରିଖରୁ ଆରମ୍ଭ ହୋଇ ଜାନୁୟାରୀ ୧୦ ତାରିଖରେ ଉଦଯାପିତ ହେବ। ବରଗଡ ଧନୁଯାତ୍ରା ଚଳିତ ବର୍ଷ ୭୧ ବର୍ଷକୁ ପଦାର୍ପଣ କରିଥିବା ବେଳେ ଏହାକୁ ଆହୁରି ଆକର୍ଷଣୀୟ କରିବା ପାଇଁ ପ୍ରସ୍ତାବ ଗୃହୀତ ହୋଇଥିଲା।
ଏବର୍ଷ ଧନୁଯାତ୍ରାର ମୁଖ୍ୟ ଭୂମିକାରେ ଅଭିନୟ କରୁଥିବା କଂସ ସହିତ ସମସ୍ତ କଳାକାରଙ୍କ ନୂତନ ଚୟନ କରାଯିବା ସହିତ ଏଥର ୧୦୦ % କ୍ୟାସଲେସ ସିଷ୍ଟମରେ ଅର୍ଥ ପ୍ରଦାନ କରାଯିବ ବୋଲି ନିଷ୍ପତ୍ତି ନିଆଯାଇଛି|
ଯାତ୍ରାକୁ କିପରି ଶାନ୍ତି ଶୃଙ୍ଗଳା ସହ ଅନୁଷ୍ଠିତ ହେବ ସେନେଇ ପୋଲିସ ବିଭାଗ ପକ୍ଷରୁ ଏସପି ପଦ୍ମିନୀ ସାହୁ ଅଧିକ ଗୁରୁତ୍ବ ଦେଇଛନ୍ତି। ଏହାସହ ସହରର ଚାରିଆଡେ ସିସିଟିଭି କ୍ୟାମେରା ଲଗାଯିବ ଏବଂ ଯାତ୍ରା ସମୟରେ ଯେପରି କୌଣସି ଅପ୍ରୀତିକର ଘଟଣା ନଘଟେ ସେଥିପାଇଁ ବିଶେଷ ଧ୍ୟାନ ଦିଆଯିବ ବୋଲି କୁହାଯାଇଛି|
ଧନୁଯାତ୍ରା ସମୟରେ ବରଗଡ଼ ସହରକୁ ସ୍ବଚ୍ଛ ଓ ସୁନ୍ଦର କରିବା ସହ ବୁଲା ଗାଈଗୋରୁଙ୍କ ଯୋଗୁଁ ହେଉଥିବା ଟ୍ରାଫିକ ସମସ୍ୟାକୁ ନଜର କରାଯିବ ଓ ପଲିଥିନ ମୁକ୍ତ ବରଗଡ଼ ଗଠନ କରିବାର ଲକ୍ଷ୍ୟ ରଖିଛି ଜିଲ୍ଲା ପ୍ରଶାସନ।
ବରଗଡରୁ ରାଜେସ ସରାପ, ଇଟିଭି ଭାରତ
