ବରଗଡ: ସକାଳ ପାହିଲେ ପଶ୍ଚିମ ଓଡିଶାର ବୃହତ ଗଣପର୍ବ ନୂଆଁଖାଇ । ହେଲେ ଚଳିତ ବର୍ଷ କୋରୋନା ମହାମାରୀ କାରଣରୁ ପୂର୍ବପରି ସେତେଟା ଉତ୍ସାହ ଲୋକଙ୍କ ଭିତରେ ଦେଖିବାକୁ ମିଳୁନାହିଁ । ନୂଆଁଖାଇର ଆଠଦିନ ପୂର୍ବରୁ ଗାଁ ଠାରୁ ସହର ପର୍ଯ୍ୟନ୍ତ ଚାରିଆଡେ ଚଳ ଚଞ୍ଚଳ ହୋଇପଡିଥାଏ ମାତ୍ର ଚଳିତ ବର୍ଷ କିନ୍ତୁ ସେପରି ଦୃଶ୍ୟ ଦେଖିବାକୁ ମିଳିନାହିଁ । ଚଳିତ ବର୍ଷ ଏହି ଭାଇଚାରାର ପର୍ବକୁ ବ୍ୟକ୍ତିଗତ ଭାବରେ ଲୋକେ ଘରେ ଘରେ ପାଳନ କରିବେ ସତ କିନ୍ତୁ ମହାମାରୀ ଭୟ ଚଳିତ ନୂଆଁଖାଇ ପର୍ବକୁ ଫିକା କରିଦେଇଛି ।
ପଶ୍ଚିମ ଓଡିଶାର ବୃହତ ପର୍ବ ନୂଆଁଖାଇରେ ଇଷ୍ଟଦେବୀ ମାଁ ସମଲେଶ୍ବରୀଙ୍କ ଠାରେ ପ୍ରଥମେ ନବାନ୍ନ ଲାଗିଥାଏ ଏବଂ ପରେ ଲଗ୍ନ ଅନୁସାରେ ଜନସାଧାରଙ୍କ ନବାନ୍ନ ଲାଗି ହୋଇଥାଏ । ବରଗଡର ଇଷ୍ଟଦେବୀ ମାଁ ସମଲେଶ୍ବରୀଙ୍କ ମନ୍ଦିରରେ ପୂର୍ବ ଧାର୍ଯ୍ୟ ଗୁପ୍ତ ସମୟ ଅନୁଯାୟୀ ଆସନ୍ତାକାଲି ଭାଦ୍ରବ ଶୁକ୍ଲ ପଞ୍ଚମୀ ତିଥିରେ ସକାଳ ପାହିବା ପୂର୍ବରୁ ସୁନସାନ ନିଝାଟ ସମୟରେ ଦେବୀ ମାଁ ଙ୍କ ଠାରେ ନବାନ୍ନ ଭୋଗ ଲାଗିବ । ପରମ୍ପରା ଅନୁଯାୟୀ ମାଁଙ୍କ ଠାରେ କେତେବେଳେ ନବାନ୍ନ ଭୋଗ ଲଗାହୁଏ, ତାହା ଲୋକଲୋଚନକୁ ଅଣାଯାଏ ନାହିଁ । ତେବେ ଦେବୀ ମାଁଙ୍କ ଠାରେ ନବାନ୍ନ ଲାଗିସାରିବା ପରେ ସକାଳ ୯ ଟା ୩୫ ମିନିଟ ରୁ ୧୦ ଟା ୦୫ ମିନିଟ ମଧ୍ୟରେ ସର୍ବସାଧାରଣ ନବାନ୍ନ ଭକ୍ଷଣ କରିବାର ଲଗ୍ନ ଧାର୍ଯ୍ୟ କରାଯାଇଛି ।
ତେବେ ଚଳିତ ବର୍ଷ କରୋନା ମହାମାରୀ ଭିତରେ ନୂଆଁଖାଇ ପର୍ବ କଟକଣା ମଧ୍ୟରେ ସର୍ବ ସାଧାରଣରେ ପାଳିତ କରିବା ପାଇଁ ପ୍ରଶାସନ ପକ୍ଷରୁ ବାରଣ କରାଯାଇଛି । ଏହି ପର୍ବକୁ ବ୍ୟକ୍ତିଗତ ଭାବେ ନିଜ ଘରେ ଲୋକେ ପାଳନ କରିବେ । କୌଣସି ସାଂସ୍କୃତିକ କାର୍ଯ୍ୟକ୍ରମ ବା ସାମୂହିକ କାର୍ଯ୍ୟକ୍ରମ ମଧ୍ୟ ମନା କରାଯାଇଥିବାରୁ ଚଳିତ ଥର ପଶ୍ଚିମ ଓଡିଶାର ସର୍ବବୃହତ ଗଣପର୍ବ ନୂଆଁଖାଇ ଫିକା ପଡିବ ।
ବରଗଡରୁ ରାଜେଶ ସରାପ,ଇଟିଭି ଭାରତ
