ଭୁବନେଶ୍ବର: ପଦ୍ମପୁର ଉପନିର୍ବାଚନ (Padmapur Bypoll) ପାଇଁ ସିଇଓ ଡ଼ାକିଥିବା ସର୍ବଦଳୀୟ ବୈଠକ (All party Meeting)ରେ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନିଆଯାଇଛି । ଉପନିର୍ବାଚନ ଲାଗି ମତଦାନ ସମୟ ଅବଧିକୁ ହ୍ରାସ କରାଯାଇଛି (Voting Period for Padmapur Bypoll) । ଶୀତ ଦିନ ଏବଂ ମାଓବାଦୀ ଅଞ୍ଚଳ ହୋଇଥିବାରୁ ଭୋଟିଂ ସମୟ କମାଯାଇଛି । ଭୋଟିଂ ସକାଳ ୭ଟାରୁ ଅପରାହ୍ନ ୪ଟା ଯାଏଁ ହେବ ବୋଲି ଜଣାପଡ଼ିଛି ।
ଧାମନଗର ପରେ ପଦ୍ମପୁର ଉପନିର୍ବାଚନ ଲାଗି ପୁଣି ରାଜ୍ୟ ରାଜନୀତି ସରଗରମ ହୋଇଉଠିଛି । ରାଜ୍ୟର ପ୍ରମୁଖ ଦଳ ବିଜୟ ପାଇଁ ଅଣ୍ଟା ଭିଡ଼ିଛନ୍ତି । ଏପଟେ ଉପନିର୍ବାଚନ ପାଇଁ ସିଇଓ ଡ଼ାକିଥିବା ସର୍ବଦଳୀୟ ବୈଠକରେ ମତଦାନ ସମୟ ଅବଧିକୁ ହ୍ରାସ କରିବା ଲାଗି ନିଷ୍ପତ୍ତି ନିଆଯାଇଥିବା ସୂଚନା ଦେଇଛନ୍ତି ରାଜନୈତିକ ଦଳ । ସ୍ଵଚ୍ଛ, ଅବାଧ ଓ ନିରପେକ୍ଷ ନିର୍ବାଚନ ପାଇଁ ସମସ୍ତ ରାଜନୈତିକ ଦଳ ଦାବି କରିଛନ୍ତି । ବିରୋଧୀ ମାନେ ଅବାଧ ଓ ନିରପେକ୍ଷ ନିର୍ବାଚନ ହେଉନି ବୋଲି ଅଭିଯୋଗ କରିଛନ୍ତି । ଜବାବରେ ଶାସକ ଦଳ କହିଛି ଯେ ନିର୍ବାଚନ ପ୍ରକ୍ରିୟା ନିୟମ ଅନୁସାରେ ହେଉଛି ।
ଏହି ଉପନିର୍ବାଚନ ଲାଗି ବିଜେଡି ଦିବଙ୍ଗତ ବିଧାୟକ ବିଜୟ ରଞ୍ଜନ ସିଂହ ବରିହାଙ୍କ ଝିଅ ବର୍ଷା ସିଂହ ବରିହା (Barsha Singh Bariha declared as BJD Candidate)ଙ୍କୁ ଟିକେଟ ଦେଇଛି । ସେପଟି ବିଜେପି ପ୍ରଦୀପ ପୁରୋହିତଙ୍କୁ ନିର୍ବାଚନୀ ମୈଦାନକୁ ଛାଡ଼ିଥିବା ବେଳେ କଂଗ୍ରେସ ବରିଷ୍ଠ ନେତା ସତ୍ୟଭୂଷଣ ସାହୁଙ୍କୁ ପ୍ରାର୍ଥୀ କରିଛି । ପୂର୍ବରୁ ନିଜକୁ ଆଶାୟୀ ବୋଲି କହୁନଥିବା ସତ୍ୟ ଭୂଷଣ ସାହୁ ଆଜି ହଠାତ କଂଗ୍ରେସ ଦଳର ପ୍ରାର୍ଥୀ ହୋଇ ଛିଡା ହୋଇଛନ୍ତି ଏବଂ କଂଗ୍ରେସ ଦଳ ତାଙ୍କୁ ଅର୍ଥ ବଳ ଓ ବାହୁବଳ ସହିତ ନିର୍ବାଚନୀ ମୈଦାନରେ ସହାୟ ହେବ ବୋଲି ସେ କହିଛନ୍ତି ।
ତାଙ୍କୁ କଂଗ୍ରେସ ଦଳ ଭରସା କରି ଟିକେଟ ଦେଇଥିବାରୁ ସେ ଧନ୍ୟବାଦ ଜଣାଇଛନ୍ତି । ଆସନ୍ତା ଡିସେମ୍ବର ୫ ତାରିଖରେ ବରଗଡ ଜିଲ୍ଲା ପଦ୍ମପୁରରେ ଉପନିର୍ବାଚନ ହେବ । ଧାମନଗର ଉପନିର୍ବାଚନରେ ବିଜେପି ଦଳର ବିଜୟ ପରେ ପଦ୍ମପୁର ଉପନିର୍ବାଚନରେ ମଧ୍ୟ ବିଜେପି ଦଳ ବିଜୟୀ ହେବାର ଆଶା ରଖିଛି । ସେପଟେ ବିଜେଡି ପାଇଁ ପଦ୍ମପୁର ଉପନିର୍ବାଚନ ଏକପ୍ରକାର ଚ୍ୟାଲେଞ୍ଜ ହୋଇଛି । ଏପରି ପରିସ୍ଥିତିରେ କଂଗ୍ରେସ ଦଳ କିପରି ନିର୍ବାଚନରେ ନିଜର ସମ୍ମାନ ବଜାୟ ରଖିବ ସେ ନେଇ ଦଳ ପ୍ରୟାସ କରିବ ନିଶ୍ଚିତ ।
ଇଟିଭି ଭାରତ, ଭୁବନେଶ୍ବର
