ବରଗଡ଼: ପଦ୍ମପୁର ଉପନିର୍ବାଚନ (Padmapur Bypoll) ପାଇଁ ସ୍ଥାନୀୟ ପାଇକମାଳ ହାଇସ୍କୁଲ ପଡିଆ ଠାରେ ଅନୁଷ୍ଠିତ ବିଜେପିର ସାଧାରଣ ସଭାରେ ଯୋଗଦେଇଛନ୍ତି କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାର (Union Agriculture Minister Narendra Singh Tomar) । ଫସଲବୀମାକୁ ନେଇ ସେ ରାଜ୍ୟ ସରକାରଙ୍କ ଉପରେ ଦୋଷ ଲଦିଛନ୍ତି । କେନ୍ଦ୍ର ଫସଲବୀମା ଅର୍ଥକୁ ଦେଇସାରିଥିବାବେଳେ, ରାଜ୍ୟ ସରକାର ଚାଷୀଙ୍କୁ ଭୁଆଁ ବୁଲାଉଥିବା ସେ କହିଛନ୍ତି ।
କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାର୍ ମଧ୍ୟ ଚାଷୀଙ୍କ ଫସଲବୀମା ଉପରେ ନିଜର ପ୍ରତିକ୍ରିୟା ରଖି କହିଛନ୍ତି, "ଚାଷୀଙ୍କ ଫସଲ ବୀମା ରାଶି କେନ୍ଦ୍ରସରକାର ରାଜ୍ୟ ସରକାରଙ୍କୁ ପ୍ରଦାନ କରିସାରିଛି । ମାତ୍ର ରାଜ୍ୟ ସରକାର ତାହା ଚାଷୀଙ୍କୁ ପ୍ରଦାନ କରୁନାହିଁ । ରାଜ୍ୟ ସରକାର ନିଜେ ଫସଲ ବୀମା କମ୍ପାନୀ ଚୟନ କରିଥାଏ ଏବଂ ଫସଲବୀମା କମ୍ପାନୀ କ୍ଷତିପୂରଣ ପ୍ରଦାନ ନକଲେ ରାଜ୍ୟ ସରକାର କେନ୍ଦ୍ରକୁ ଦୋଷାରୋପ କରି ନିଜ ଦୋଷ ଛଡାଇବାକୁ ଚେଷ୍ଟା କରିଥାଏ । ମାତ୍ର ଏଥର ମିଛ ଧରାପଡିଗଲା" ବୋଲି ସେ ଏଠାକାର ଚାଷୀଙ୍କୁ କହିଛନ୍ତି ।
ବିଜେପି ପ୍ରାର୍ଥୀ ପ୍ରଦୀପ ପୁରୋହିତଙ୍କ ପ୍ରଚାର ପ୍ରସାର ପାଇଁ ଆଜି ଦୁଇ କେନ୍ଦ୍ର ମନ୍ତ୍ରୀ ପଦ୍ମପୁରକୁ ଆସି ସାଧାରଣ ସଭାରେ ଯୋଗଦେଇ ଉଦଭୋଧନ ଦେଇଥିଲେ । ପଦ୍ମପୁର ଅଞ୍ଚଳରେ ଚାଷୀଙ୍କ ଫସଲ ବୀମା ସମସ୍ୟା, ପଦ୍ମପୁର ଜିଲ୍ଲା ଦାବି ଓ ବରଗଡରୁ ପଦ୍ମପୁର ଦେଇ ନୂଆପଡା ରେଳପଥ ନିର୍ମାଣ ବର୍ତ୍ତମାନର ମୁଖ୍ୟ ରାଜନୈତିକ ପ୍ରସଙ୍ଗ ହୋଇଥିବା ବେଳେ କେନ୍ଦ୍ରରୁ ଉଭୟ ରେଳ ମନ୍ତ୍ରୀ ଓ କୃଷି ମନ୍ତ୍ରୀ ପଦ୍ମପୁରକୁ ପହଞ୍ଚି ରାଜ୍ୟ ସରକାରଙ୍କ ମିଥ୍ୟା ଆରୋପ ବିରୋଧରେ ବର୍ଷିଥିଲେ ।
କେନ୍ଦ୍ର ରେଳମନ୍ତ୍ରୀ ମଧ୍ୟ ମନ୍ତ୍ରୀ ଟୁକୁନି ସାହୁ ଓ ବରିଷ୍ଠ ବିଜେଡି ନେତା ପ୍ରସନ୍ନ ଆଚାର୍ଯ୍ୟଙ୍କୁ କଡା ଜବାବ ଦେଇଥିଲେ । ରାଜ୍ୟର ଅନେକ ସ୍ଥାନରେ ରେଳପଥ ନିର୍ମାଣ ହୋଇସାରିଥିବାବେଳେ, ବରଗଡରୁ ନୂଆପଡା ରେଳପଥ ନିର୍ମାଣ ଯୋଜନା ଆଜିଯାଏ ପଡିରହିଛି କାହିଁକି ବୋଲି ସେ ପ୍ରଶ୍ନ କରିଥିଲେ । କାରଣ ଏଠାକାର ସରକାର ରେଳପଥ ପାଇଁ ଜାଗା ଦେଇପାରୁନାହାନ୍ତି ବୋଲି ରାଜ୍ୟ ସରକାରଙ୍କ ଉପରେ ସେ ଆରୋପ ଲଗାଇଥିଲେ ।
ବିଜେଡି ବିଜେପି ଆରୋପ ପ୍ରତ୍ୟାରୋପ ମଧ୍ୟରେ ପଦ୍ମପୁର ଉପନିର୍ବାଚନ ଲାଗି ପ୍ରଚାର ମଧ୍ୟ ଜୋର ଧରିଛି । ତେବେ ବିଜେପି ପ୍ରାର୍ଥୀ ପ୍ରଦୀପ ପୁରୋହିତ କହିଛନ୍ତି, "୩୫ବର୍ଷ ତଳେ ମୋ ଭିତରେ ଯେଉଁ ଯୋସ ଥିଲା ଆଜି ବି ଅଛି । ନିର୍ବାଚନ ପାଇଁ ବହୁତ ଲୋକ ଆସୁଛନ୍ତି ଆଶୀର୍ବାଦ ଦେବା ଲାଗି । ଲୋକେ ମୋର ଯୋସ ବଢାଉଛନ୍ତି ।" ଏପରି ଆଶୀର୍ବାଦ ରଖି ତାଙ୍କୁ ବିଜୟୀ କରିବାକୁ ସେ ଭୋଟରଙ୍କୁ ଅନୁରୋଧ କରିଛନ୍ତି ।
ଇଟିଭି ଭାରତ, ବରଗଡ଼
