ବରଗଡ: ସହରର ୧୪ ନମ୍ବର ୱାର୍ଡ ସ୍ଥିତ ମାଷ୍ଟରଟିକ୍ରା ଠାରେ ଏକ ମାଲବୋଝେଇ ଟ୍ରକ ମାଡିଯିବାରୁ ଦେଢ ବର୍ଷର ବାଳକର ମୃତ୍ୟୁ ହୋଇଛି । ସ୍ଥାନୀୟ ଲୋକେ ଉତ୍ୟକ୍ତ ହୋଇ ରାସ୍ତା ଅବରୋଧ କରିଛନ୍ତି । ଲୋକମାନେ ସେହି ରାସ୍ତା ଦେଇ ଟ୍ରକ ଯାତାୟତକୁ ସମ୍ପୂର୍ଣ୍ଣ ବନ୍ଦ କରିବା ସହ ମୃତ ଶିଶୁର ପରିବାର ବର୍ଗଙ୍କୁ କ୍ଷତିପୂରଣ ପ୍ରଦାନ ପାଇଁ ଦାବି କରିଛନ୍ତି । ପରିସ୍ଥିତିକୁ ଆୟତ୍ତ କରିବା ପାଇଁ ଘଟଣାସ୍ଥଳରେ ପୋଲିସ ମୁତୟନ କରାଯାଇଛି ।
ସୂଚନାଯୋଗ୍ୟ, ମୃତ୍ୟୁବରଣ କରିଥିବା ଶିଶୁଟି ନିଜ ମାମୁଁଘରକୁ ଆସିଥିଲେ । ତାଙ୍କ ଘର ଗାଇସିଲେଟ ବ୍ଲକ ନଟପୁର ଗାଁରେ ହୋଇଥିବା ବେଳେ ତାଙ୍କ ପିତାଙ୍କ ନାମ ରାଜେନ୍ଦ୍ର ଦୀପ ବୋଲି ଜଣାପଡିଛି । ରାସ୍ତା କଡରେ ଖେଳୁଥିବା ବେଳେ ଏହି ଟ୍ରକଟି ଶିଶୁ ଉପରେ ମାଡିଯାଇଥିଲା ।
ବରଗଡ ରେଲୱେ ଷ୍ଟେସନରୁ ପ୍ରତ୍ୟହ ଏହି ରାସ୍ତା ଦେଇ ଶହ ଶହ ମାଲବାହୀ ଟ୍ରକ ଦ୍ରୁତ ଗତିରେ ଯାତାୟତ କରୁଛନ୍ତି । ସେଥିପାଇଁ ସେହି ରାସ୍ତାରେ ବାରମ୍ବାର ଦୁର୍ଘଟଣା ଘଟୁଛି । ବାରମ୍ବାର ଟ୍ରକ ଚଳାଚଳ ବନ୍ଦ କରିବାକୁ ଦାବି କରାଯାଇଥିବା ବେଳେ ତାହା ପୂରଣ ହୋଇପାରିନାହିଁ ।
ବରଗଡରୁ ରାଜେଶ ସରାପ, ଇଟିଭି ଭାରତ
