ବରଗଡ: ହାତୀ ଆକ୍ରମଣରେ ୩ ଜଣଙ୍କ ମୃତ୍ୟୁ ଅଭିଯୋଗ । ବରଗଡ ପଦ୍ମପୁର ଉପଖଣ୍ଡ ଗାଇସିଲଟ ବ୍ଲକ ଉମରାଡ଼ ଗ୍ରାମାଞ୍ଚଳରେ ଆଜି(ବୁଧବାର) ସକାଳୁ ଏହି ଘଟଣା ଘଟିଛି । ହାତୀ ଆକ୍ରମଣରେ 50 ବର୍ଷର ମାଲ ସେଠ , 60 ବର୍ଷର ବିରଞ୍ଚି କୁମ୍ଭାରଙ୍କ ସହ ବଲାଙ୍ଗୀର ଜିଲ୍ଲା ସୀମାବର୍ତୀ ସରଗଡା ଗ୍ରାମର 70 ବର୍ଷୀୟ ଜଣେ ବୃଦ୍ଧ ନାଥପାଲଙ୍କ ମୃତ୍ୟୁ ହୋଇଛି।
ମୃତ ନାଥପାଲ ନିଜର ସମ୍ପର୍କୀୟଙ୍କ ଘରକୁ କୌଣସି କାମ ପାଇଁ ଆସିଥିବାବେଳେ ମୃତ ୩ଜଣ ଯାକ ସକାଳୁ କ୍ଷେତ ପାଖକୁ ଶୌଚ ହେବା ପାଇଁ ଯାଇଥିଲେ। ହଠାତ ଗୋଟିଏ ହାତୀ ପଲ ଏମାନଙ୍କ ସାମ୍ନାକୁ ଆସିଯାଇଥିଲା । ସେଠାରୁ ଯିବାକୁ ଆଉ ରାସ୍ତା ନପାଇ ହାତୀ ଆକ୍ରମଣ ଏମାନେ ଶିକାର ହୋଇଛନ୍ତି ।
ଅନ୍ୟପଟେ ବନ ବିଭାଗ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ସହ ହାତୀ ଯିବା ପଥ ଉପରେ ନଜର ରଖିଛନ୍ତି । ହାତୀ ପଲ ଭିତରୁ ଗୋଟେ ହାତୀ ଅଲଗା ହୋଇ ଯାଇଥିବାବେଲେ ହାତୀଟି ଏଣେତେଣେ ଗାଇସିଲେଟ ଅଞ୍ଚଳରେ ଏକାକୀ ଘୁରି ବୁଲୁଛି । ଏବଂ ଲୋକଙ୍କୁ ଦେଖିବା ମାତ୍ରେ ଆକ୍ରମଣ କରୁଛି। ତେବେ ବନବିଭାଗ ପକ୍ଷରୁ ଲୋକଙ୍କୁ ସତର୍କ ମଧ୍ୟ କରାଯାଉ ନଥିବାରୁ ଏପରି ଲଗାତାର ଅଘଟଣ ହେଉଛି ଏବଂ ଗୋଟେ ସପ୍ତାହ ମଧ୍ୟରେ 4 ଜଣ ହାତୀ ଆକ୍ରମଣରେ ଜୀବନ ହରାଇଛନ୍ତି ।
ବରଗଡରୁ ରାଜେସ ସରାପ, ଇଟିଭି ଭାରତ
