ବରଗଡ: ବରଗଡ ମୁଖ୍ୟ ଚିକିତ୍ସାଳୟରେ ଗତକାଲି(ବୁଧବାର) ଡାକ୍ତରଙ୍କ ଅବହେଳା ଯୋଗୁଁ ମା’ ଛୁଆଙ୍କ ଜୀବନ ଚାଲିଯାଇଥିଲା ଅଭିଯୋଗ ହୋଇଥିଲା । ଯାହାଫଳରେ ଡାକ୍ତରଖାନା ସମ୍ମୁଖରେ ଦେଖାଦେଇଥିଲା ଉତ୍ତେଜନା । ମାତ୍ର ଆଜି ପୁଣି ବରଗଡ଼ ଖେଦାପାଲି ଜ଼ିଲ୍ଲା ମୁଖ୍ୟ ଡାକ୍ତରଖାନାରେ ଚିକିତ୍ସାରେ ଅବହେଳା କାରଣରୁ ଆଉ ଜଣେ 22 ବର୍ଷୀୟ ଯୁବକଙ୍କ ମୃତ୍ୟୁ ହୋଇଥିବା ଘଟଣା ସାମନାକୁ ଆସିଛି ।
ବାଇକରେ ଯାଉଥିବା ବେଳେ ଜମୁର୍ଡା ନିକଟରେ ଦୁର୍ଘଟଣାର ଶିକାର ହୋଇଥିବା 16 ନମ୍ବର ୱାର୍ଡର 22 ବର୍ଷୀୟ ଯୁବକ କ୍ରୀଷ୍ଣା ସୁନାଙ୍କୁ ଚିକିତ୍ସା ପାଇଁ ଗୁରୁତର ଅବସ୍ଥାରେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଅଣାଯାଇଥିଲା । ମାତ୍ର, ହସ୍ପିଟାଲରେ କାର୍ଯ୍ୟରତ କର୍ମଚାରୀମାନେ ପ୍ରଥମେ କୋଭିଡ଼ ଟେଷ୍ଟ କରାଗଲେ ଯାଇ ଚିକିତ୍ସା କରିବେ ବୋଲି କହିବାରୁ ଚିକିତ୍ସାରେ ବିଳମ୍ବ ହୋଇଥିଲା । ତେବେ ଗୁରୁତର ଅବସ୍ଥାରେ ଥିବା ଯୁବକଙ୍କ ଶୀଘ୍ର ଚିକିତ୍ସା କରାନଯିବାରୁ ସେଠାରେ ତାଙ୍କର ମୃତ୍ୟୁ ହୋଇଥିବା ଅଭିଯୋଗ ଆଣିଛନ୍ତି ପରିବାର ଲୋକେ । ମୃତ ମୃତଦେହକୁ ହସ୍ପିଟାଲ ଆଗରେ ରଖି ଆନ୍ଦୋଳନରେ ବସିଥିବା ବେଳେ ଉତ୍ତେଜନା ବଢିବାକୁ ଲାଗିଛି । ଡାକ୍ତରଖାନାରେ ବାରମ୍ବାର ହେଉଥିବା ଅବହେଳାକୁ ନେଇ ଉତ୍ୟକ୍ତ ଲୋକେ ଡାକ୍ତରଖାନା ସମ୍ମୁଖରେ ଟାୟାର ଜାଳି ଆନ୍ଦୋଳନ ଜାରି ରଖିଛନ୍ତି।
ବରଗଡରୁ ରାଜେସ ସରାପ, ଇଟିଭି ଭାରତ
