ବରଗଡ: ବରଗଡ ସୋହେଳା ରାସ୍ତାରେ ଏକ କାର ଦୁର୍ଘଟଣା ଘଟିଛି । ଏନେଇ କାରଟି ଓଲଟି ଯାଇଥିବା ବେଳେ ଘଟଣାସ୍ଥଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ଆଉ ଦୁଇ ଜଣ ଗୁରୁତର ଆହତ ହୋଇଛନ୍ତି । କାରଟି ସୋହେଳା ପଟରୁ ବରଗଡ ଅଭିମୁଖେ ଦ୍ରୁତ ଗତିରେ ଆସୁଥିବା ବେଳେ ଭାରସାମ୍ୟ ହରାଇ ରାସ୍ତା ତଳକୁ ଓହ୍ଲାଇ ଓଲଟି ପଡିଥିଲା ।
ଦୁର୍ଘଟଣା ଗ୍ରସ୍ତ କାରଟି ମହାରାଷ୍ଟ୍ରର ନମ୍ବର ହୋଇଥିବା ବେଳେ ମହାରାଷ୍ଟ୍ରରୁ ଆସିଥିବା କାର ଭାବି ଲୋକମାନେ ଭୟରେ କାର ପାଖକୁ ଯାଇନଥିଲେ । ଏହାପରେ ପୋଲିସ ଘଟଣାସ୍ଥଳକୁ ପହଞ୍ଚି ଯାଞ୍ଚ କରିବା ପରେ ମହାରାଷ୍ଟ୍ରରୁ କିଛି ପ୍ରବାସୀ ନିଜ ରାଜ୍ୟକୁ ଫେରୁଥିବା ବେଳେ ଏହି ଦୁର୍ଘଟଣା ଘଟିଥିବା ଜଣାପଡିଛି ।
ତେବେ, ଆହତ ମାନଙ୍କୁ ଡାକ୍ତରଖାନାକୁ ନିଆଯାଇଥିବା ବେଳେ ମୃତକଙ୍କ ନାମ ଓ ଠିକଣା ଜଣାପଡିନାହିଁ । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ।
ଲକଡାଉନ ଯୋଗୁଁ ବାହାର ରାଜ୍ୟରେ ଫସିରହିଥିବା ବହୁ ପ୍ରବାସୀ ଓଡିଶା ସୀମାନ୍ତ ବରଗଡ ଜିଲ୍ଲା ଦେଇ ପ୍ରତିଦିନ ଯିବା ଆସିବା କରୁଥିବା ବେଳେ ପ୍ରାୟ ଦୁର୍ଘଟଣା ଘଟୁଥିବା ଜଣାପଡିଛି । ଅନ୍ୟ ରାଜ୍ୟର ଗାଡି ଚାଳକମାନେ ଏହି ଅଞ୍ଚଳର ରାସ୍ତା ଉପରେ ଅଜଣା ରହିଥିବା ବେଳେ ପ୍ରତିଦିନ ଗୋଟେ ନା ଗୋଟେ ଦୁର୍ଘଟଣା ଘଟୁଛି ।
ବରଗଡରୁ ରାଜେଶ ସରପ, ଇଟିଭି ଭାରତ
