ବରଗଡ଼: ହୃଷ୍ଟପୃଷ୍ଟ ଗାଈର ଅଜଣା ରୋଗରେ ମୃତ୍ୟୁ ହେବାପରେ ଆତଙ୍କିତ ବରଗଡବାସୀ । କେଉଁ କାରଣରୁ ବୁଲନ୍ତା ଗାଈର ହଠାତ ମୃତ୍ୟୁ ହେଲା ତାହା ଜଣାପଡିନଥିବାବେଳେ କୋରୋନା ମହାମାରୀ ପଶୁଙ୍କ ମଧ୍ୟରେ ବ୍ୟାପିଲାଣି ବୋଲି ସ୍ଥାନୀୟ ଲୋକଙ୍କ ମଧ୍ୟରେ ଭୟ ସୃଷ୍ଟି କରିଦେଇଛି । ଏପରି ଘଟଣା ଘଟିଛି ବରଗଡ ଶକ୍ତିନଗର 11 ନମ୍ବର ୱାର୍ଡ ଠାରେ ।
କୋରୋନା ମହାମାରୀରେ ବହୁ ମଣିଷ ପ୍ରାଣ ହରାଉଥିବାବେଳେ ପଶୁପକ୍ଷୀମାନଙ୍କ ଠାରେ ଏହା ବ୍ୟାପୁଛି ନାଁ ନାହିଁ ତାହା ସଠିକ ଭାବରେ ଜଣାନାହିଁ । କୋରୋନା ରୋଗ ମଣିଷରୁ ମଣିଷକୁ ବ୍ୟାପୁଥିବାବେଳେ ବହୁ ଲୋକଙ୍କ ଏହି ମହାମାରୀରେ ମୃତ୍ୟୁ ହେବାପରେ ଲୋକଙ୍କ ମଧ୍ୟରେ ଭୟର ଆତଙ୍କ ଖେଳିଯାଇଛି । ତେବେ ଏପରି ପରିସ୍ଥିତିରେ ବରଗଡ ଟାଉନ ଭିତରେ ରାସ୍ତା ଉପରେ ଏକ ସୁସ୍ଥସବଳ ଗାଈର ହଠାତ ମୃତ୍ୟୁ ହୋଇଯାଇଥିବା ଘଟଣାକୁ ନେଇ ଲୋକଙ୍କ ମଧ୍ୟରେ ନାନା ସନ୍ଦେହ ସୃଷ୍ଟି ହୋଇଛି ।
ମଣିଷଙ୍କ ପରି ସୁସ୍ଥ ଥିବା ଗାଈଟିର ମଧ୍ୟ କୋରୋନା ରୋଗରେ ହଠାତ ମୃତ୍ୟୁ ହୋଇଯାଇଥିବା ସନ୍ଦେହ କରାଯାଉଥିବାବେଳେ ବରଗଡ ଟାଉନରେ ଏହି ଘଟଣାକୁ ନେଇ କୋକୁଆ ଭୟ ସୃଷ୍ଟି ହୋଇଛି । ତେବେ କେଉଁ କାରଣରୁ ସୁସ୍ଥ ଥିବା ଗାଈଟିର ହଠାତ ମୃତ୍ୟୁ ହେଲା ତାହା ଏବେ ମଧ୍ୟ ରହସ୍ୟ ହୋଇ ରହିଛି । ସେପଟେ ପଶୁ ଡାକ୍ତରଙ୍କୁ ଏସମ୍ପର୍କରେ ଖବର ଦିଆଯାଇଛି ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
