ବରଗଡ: ଯୁଗ ଯୁଗ ଧରି ଦେଶ ଉପରେ ପଡୋଶୀ ଦେଶର ନଜର ରହି ଆସିଥିବା ବେଳେ ଦେଶରୁ ସମ୍ପତ୍ତି ଲୁଟ ଘଟଣା କିଛି ନୂଆ ଘଟଣା ନୁହେଁ । ଇଂରେଜ ଶାସନ ବେଳେ ସେମାନେ ଦେଶର ରାଜସ୍ବ, ଭୂସମ୍ପତ୍ତି ଓ ଖଣିଜ ସମ୍ପତ୍ତି ଲୁଟି ଚାଲିଥିବା ବେଳେ ସ୍ବାଧୀନତାର 73 ବର୍ଷ ପରେ ବି ଜାରି ରହିଛି ଲୁଟ ପ୍ରକ୍ରିୟା । ଆମେ କହୁଛୁ ବରଗଡ ଜିଲ୍ଲା ପଦ୍ମପୁର ଉପଖଣ୍ଡ ଅଞ୍ଚଳର ଘଟଣା । ଯେଉଁଠାରେ ଖଣିଜ ପଦାର୍ଥ ସହିତ ଭରପୂର ରହିଛି ବହୁ ପ୍ରାକୃତିକ ସମ୍ପତ୍ତି । ହେଲେ ଦୀର୍ଘ ବର୍ଷ ହେଲା ଲୁଟେରା ଓ ମାଫିଆମାନଙ୍କର ଗୁଣ୍ଡାରାଜରେ ଏଠାରେ ଓଡିଶା ସରକାରଙ୍କ କୋଟି କୋଟି ରାଜସ୍ବ ହରିଲୁଟ କରାଯାଉଥିବା ଅଭିଯୋଗ ହୋଇଛି ।
1993ରେ ସମ୍ବଲପୁର ଜିଲ୍ଲାରୁ ବିଭକ୍ତ ହୋଇ ସ୍ବତନ୍ତ୍ର ଜିଲ୍ଲାରେ ପରିଣତ ହୋଇଥିଲା ବରଗଡ । ପ୍ରଚୁର ଧାନ ଚାଷ ପାଇଁ ରାଜ୍ୟର ଭାତହାଣ୍ଡି ବୋଲାଉଥିବା ବରଗଡରେ ପ୍ରାକୃତିକ ସମ୍ପଦ ଓ ଖଣିଜ ପଦାର୍ଥର ପରିମାଣ ମଧ୍ୟ କିଛି କମ ନୁହେଁ । ଏମିତିରେ ଏହି ଜିଲ୍ଲାର ପଦ୍ମପୁର ଉପଖଣ୍ଡ ଉପରେ ଏବେ ମାଫିଆ ଓ କଳା ବେପାରୀଙ୍କ ନଜର । ବିଭିନ୍ନ ରାଜ୍ୟକୁ ଏହି ଅଞ୍ଚଳ ଦେଇ ଆମଦାନୀ ଓ ରପ୍ତାନି କରାଯାଇଥାଏ ଗଞ୍ଜେଇ, ବ୍ରାଉନ ସୁଗାର ଓ ନାନାଦି ବେଆଇନ ସାମଗ୍ରୀ । ଯାହା ପାଇଁ ଆଜି ବେଆଇନ ନିଶା ବ୍ୟାପାରର ମୁଖ୍ୟକେନ୍ଦ୍ର ସାଜିଛି ଏହି ଅଞ୍ଚଳ ।
କେବଳ ସେତିକି ନୁହେଁ ପଦ୍ମପୁରର ଜଗଦଲପୁର ଅଞ୍ଚଳ ପଡୋଶୀ ଛତିଶଗଡ ସୀମାରେ ରହିଥିବା ବେଳେ ଏହି ଅଞ୍ଚଳ ଦେଇ ବହି ଯାଇଛି ଅଙ୍ଗ ନଦୀ । ଏହି ନଦୀରେ ସମୁଦାୟ 13 ଗୋଟି ବାଲି ଘାଟ ରହିଥିବା ବେଳେ ବିନା ଟେଣ୍ଡରରେ ଦୀର୍ଘ ବର୍ଷ ହେଲା ଏଠାରେ ଚାଲିଛି ନଦୀ ବାଲିର ଚୋରା ଚାଲାଣ । ପଶ୍ଚିମବଙ୍ଗରେ ଗୋମାଂସର ଚାହିଦା ପୂରଣ ପାଇଁ ଏଠାରୁ ହଜାର ହଜାର ଗୋରୁ ଗାଈ ମଧ୍ୟ ଚାଲାଣ ହେଉଛନ୍ତି । ହେଲେ ସବୁ ଜାଣି ଶୁଣି ପାଟିରେ ତାଲା ବାନ୍ଧିଛି ପ୍ରଶାସନ । ତେଣେ ରାଜ୍ୟର ଜଙ୍ଗଲ ଜମିଗୁଡିକୁ କବଜା କରି ବେଆଇନ ଭାବେ ବିକ୍ରି କରି ଦିଆଯାଉଛି ଛତିଶଗଡର ଲୁଟେରାମାନଙ୍କୁ । ଫଳରେ ଜଙ୍ଗଲ ଭିତରେ ରହିଥିବା ବହୁ ମୁଲ୍ୟବାନ ଗଛ ଓ କାଠ ସବୁ କାଟି ମାଫିଆମାନେ ଜଙ୍ଗଲକୁ ପଦା କରି ଦେଇଚାଲିଛନ୍ତି । ଏଥିସହ ଜଙ୍ଗଲ ଭିତରେ ମହଜୁଦ ରହିଥିବା ଗ୍ରାଫାଇଟ ଓ ଗ୍ରାନାଇଡ ସହିତ କୁଆଜ ପରି ରତ୍ନ ପଥର ଗୁଡିକୁ ମଧ୍ୟ ଚୋରି କରାଯାଉଛି ।
ଏନେଇ ସ୍ଥାନୀୟ ଲୋକେ ଯେତେ ଅଭିଯୋଗ କଲେ ମଧ୍ୟ ନା ଜଙ୍ଗଲ ବିଭାଗ ଶୁଣୁଛନ୍ତି ନା ସ୍ଥାନୀୟ ପୋଲିସ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଉଛି । ଅନ୍ୟପଟେ ପାଇକମାଳ ଓ ଝାରବନ୍ଦ ବ୍ଲକରେ 10ରୁ ଅଧିକ ବେଆଇନ କ୍ରସର ରହିଥିବା ବେଳେ ତହସିଲଦାର ଓ ବିଡିଓମାନେ ମଧ୍ୟ ଚୁପ ବସିଛନ୍ତି । ସମସ୍ତେ ନିଜ ନିଜ ପକେଟ ଗରମ କରିବାରେ ବ୍ୟସ୍ତ ରହିଛନ୍ତି । ପରିଣାମ ସ୍ବରୂପ ସରକାରଙ୍କ କୋଟି କୋଟି ଟଙ୍କାର ରାଜସ୍ବ ପ୍ରତିଦିନ ଏଠାରେ ଲୁଟ କରାଯାଉଛି । ଚୂନପଥର ଖାଦାନଗୁଡିକ ମଧ୍ୟ ସ୍ଥାନୀୟ ଲୁଟେରା ଓ ଖଣି ମାଫିଆଙ୍କ କବଳରୁ ବଞ୍ଚି ପାରିନି । ତେଣେ ସଚେତନ ନାଗରିକ ଏହାର ବିରୋଧ କଲେ ଓଲଟା ପୋଲିସର ସହାୟତାରେ ମିଥ୍ୟା ମାମଲା ରୁଜୁ କରି ତାଙ୍କୁ ଜେଲ ପଠାଇ ଦିଆଯାଉଛି ଏବଂ ମୁହଁ ବନ୍ଦ କରି ଦିଆଯାଉଛି ।
ତଥାପି ସାହସ କରି ବିରୋଧ କଲେ ଖଣି ମାଫିଆମାନେ ଅଭିଯୋଗକାରୀଙ୍କୁ ହତ୍ୟା କରି ଦେଉଛନ୍ତି ଏବଂ ପୋଲିସକୁ ହାତରେ ରଖି ଖସି ଯାଉଛନ୍ତି । ଏପରି ହତ୍ୟା ଘଟଣାରେ ରହୁଥିବା ସାକ୍ଷୀମାନଙ୍କୁ ମଧ୍ୟ ହତ୍ୟା କରିଦିଆଯାଉଥିବା ବେଳେ ପୋଲିସ କେବଳ ଅପମୃତ୍ୟୁ ମାମଲାରେ ଘଟଣାକୁ ସୀମିତ ରଖି ଲୁଟେରା ଓ ଖଣି ମାଫିଆଙ୍କୁ ଅପରାଧରେ ସହଯୋଗ କରୁଥିବା ଅଭିଯୋଗ ହୋଇଛି ।
ଲକଡାଉନ ସମୟରେ ସମସ୍ତେ ନିଜ ନିଜର ଜୀବିକା ହରାଇଥିବା ବେଳେ ଏଠାକାର ମାଫିଆମାନଙ୍କ ପାଇଁ ଲକଡାଉନ ଏକ ସୁବର୍ଣ୍ଣ ସୁଯୋଗ ପାଲଟିଥିଲା । ନିର୍ଭୟରେ ଚାଲିଥିଲା ବେଆଇନ କାରବାର । ଯାହା ସରକାରୀ କଳର ସାହାଯ୍ୟରେ ଏବେ ସୁଦ୍ଧା ଜାରି ରହିଛି । ତେବେ ଏପରି ପରିସ୍ଥିତିରେ ବର୍ତ୍ତମାନଠାରୁ ରାଜ୍ୟ ସରକାର ଏଠାକାର ପରିସ୍ଥିତି ଉପରେ କଟକଣା ନଲଗାଇଲେ ଆଗକୁ ସ୍ଥିତି ଆହୁରି ଅସମ୍ଭାଳ ହୋଇପଡିବ ବୋଲି ଆଶଙ୍କା ପ୍ରକାଶ ପାଇଛି । ଏନେଇ ସ୍ଥାନୀୟ ବିଧାୟକ ବିଜୟ ରଞ୍ଜନ ସିଂ ବରିହା ମଧ୍ୟ ଭଲ ଭାବେ ଅବଗତ ଅଛନ୍ତି । ହେଲେ ବିଧାୟକ ସରକାରୀ କଳକୁ ଦୋଷ ଦେଇ ଏହି ଅଞ୍ଚଳରେ ଚାଲିଥିବା ଆତଙ୍କରାଜ ଯୋଗୁଁ ସରକାରୀ କଳ ଭୟ କରି କୌଣସି ପଦକ୍ଷେପ ଗ୍ରହଣ କରୁନଥିବା ସ୍ଵୀକାର କରିଥିଲେ ।
ତେବେ ପ୍ରଶ୍ନ ଉଠୁଛି ଏସବୁ ପଛରେ କାହାର ହାତ ରହିଛି ? କାହିଁକି ପୋଲିସ ମଧ୍ୟ କୌଣସି ପଦକ୍ଷେପ ନେଇପାରୁନାହି ? ଓଡିଶାର ଖଣିଜ ସମ୍ପଦ ଛତିଶଗଡ଼ ରାଜ୍ୟକୁ ଚୋରୀ ହେଉଛି ଅଥଚ ବିଧାୟକ ନିଜେ ଚୁପ କାହିଁକି ?
ବରଗଡରୁ ରାଜେଶ ସରାପ, ଇଟିଭି ଭାରତ
