ବରଗଡ: ଓଡିଶାର ଭାତହାଣ୍ଡି ବର୍ତ୍ତମାନ ସଙ୍କଟରେ । ଧାନ ବିକ୍ରିକୁ ନେଇ ଗୁରୁବାର ପୁଣି ଚାଷୀ ଆନ୍ଦୋଳନ କରିଛନ୍ତି । ଗତ ସପ୍ତାହରେ ଧାନ ବିକ୍ରିରେ ଅବ୍ୟବସ୍ଥା ଏବଂ ଟୋକନ ବ୍ୟବସ୍ଥାକୁ ବିରୋଧ କରି ରାଜରାସ୍ତାରେ ଧାନ ବସ୍ତା ରଖି ଚାଷୀ ଆନ୍ଦୋଳନ କରିଥିବାବେଳେ ଗୁରୁବାର ଜିଲ୍ଲାପାଳଙ୍କ ଅଫିସ ଆଗରେ ଆନ୍ଦୋଳନ କରିଛନ୍ତି ।
ଚଳିତ ବର୍ଷ ଖରିଫ ଫସଲରେ ଧାନ ସଂଗ୍ରହ ପ୍ରକ୍ରିୟାରେ ଦେଖାଯାଇଛି ଅନିୟମିତତା । ସରକାରଙ୍କ ଟୋକନ ବ୍ୟବସ୍ଥାର ନିୟମ ଯୋଗୁଁ ଚାଷୀକୁ ନାନା ଅସୁବିଧାର ସମ୍ମୁଖୀନ ହେବାକୁ ପଡୁଥିବା ବେଳେ ମିଲର୍ସ ଧାନ ଉଠାଉ ନଥିବାରୁ ଏବେ ହଜାର ହଜାର ବସ୍ତା ଧାନ ମଣ୍ଡିରେ ପଡିରହିଛି । ଯାହା ଏବେ ଚାଷୀଙ୍କ ପାଇଁ ଚିନ୍ତାର ବିଷୟ ହୋଇଛି । ବରଗଡ ଜିଲ୍ଲା ଭେଡ଼େନ ବ୍ଲକ ଅନ୍ତର୍ଗତ ରେଶମ ମାର୍କେଟ ୟାର୍ଡରେ ଗତ ୧୫ ତାରିଖରୁ ୨୦ ହଜାରରୁ ଊର୍ଦ୍ଧ୍ଵ ଧାନ ପଡିଥିବା ବେଳେ ବିକ୍ରି ହେଉନାହିଁ ଧାନ ।
ଚାଷୀ ରବି ଫସଲ ପାଇଁ ପ୍ରସ୍ତୁତ ହେଉଥିବ ବେଳେ ହାତରେ କିନ୍ତୁ ପଇସା ନାହି । ଅନ୍ୟପଟେ ଅଳ୍ପ ମାତ୍ରାରେ ଧାନ ବିକ୍ରି ହେଉଛି ଏବଂ କୁଇଣ୍ଟାଲ ପିଛା ୪ କେଜି ଧାନ କଟନୀ ଛଟନୀରେ ଯାଉଛି । ଜିଲ୍ଲା ପ୍ରଶାସନ ସବୁ ଜାଣି ମଧ୍ୟ ଚୁପଚାପ ବସିରହିଛି । ଚାଷୀ ଯେତେ ଅଭିଯୋଗ କଲେ ସୁଦ୍ଧା କୌଣସି ସୁଫଳ ମିଳିପାରୁ ନାହିଁ।
ଏପରିକି ସିଏସଓ ଚାଷୀଙ୍କୁ ଦୁର୍ବ୍ୟବହାର ଦେଖାଉଥିବା ଅଭିଯୋଗ ହେଉଛି । ତେବେ ଏଥିରେ ଅତିଷ୍ଠ ହୋଇ ରେଶମ ଓ ପଧାନପାଳି ଅଞ୍ଚଳର ଶତାଧିକ ଚାଷୀ ଗୁରୁବାର ବରଗଡ ଜିଲ୍ଲାପାଳ ଅଫିସ ଆଗରେ ଧାରଣାରେ ବସିଥିଲେ । ଜିଲ୍ଲା ପ୍ରଶାସନ ଚାଷୀଙ୍କ ସହିତ ଆଲୋଚନା କରିଥିଲେ ଏବଂ ରେଶମ ମଣ୍ଡିକୁ ଯାଇ ପ୍ରଶାସନ ନିଜେ ଧାନ ସବୁ ବିକ୍ରି କରିବେ ବୋଲି ରାଜି ହେବାରୁ ଆନ୍ଦୋଳନ ପ୍ରତ୍ୟାହୃତ ହୋଇଥିଲା ।
ବରଗଡରୁ ରାଜେଶ ସରାପ୍, ଇଟିଭି ଭାରତ
