ବରଗଡ: ନିର୍ବାଚନ ସମୟରେ ପୋଲିସ ଓ ଜନତା ମୁହାଁମୁହିଁ । ପଦ୍ମପୁର ଉପଖଣ୍ଡ ଗାଇସିଲାଟ ଥାନା କଠଉମାଲ ଠାରେ ନିର୍ବାଚନ ସମୟରେ ଜନସାଧାରଣ ଓ ପୋଲିସ ମୁହାଁମୁହିଁ ହେବାରୁ ଜଣେ ପୋଲିସ ଅଫିସରଙ୍କ ମୁଣ୍ଡ ଫାଟିଯାଇଥିବା ବେଳେ ପୋଲିସ ଗାଡି ଭାଙ୍ଗିଯାଇଥିବା ସୂଚନା ମିଳିଛି ।
ଲୋକେ ପୋଲିସ ଉପରେ ଆକ୍ରମଣ କରି ପୋଲିସ ଗାଡି ଉପରକୁ ଟେବୁଲ ଡେକ୍ସ ଆଣି କଚାଡି ଦେଲଇଥିଲେ । ଗୋଟିଏ ପୋଲିସ ଗାଡିକୁ ଭାଙ୍ଗି ଦେଇଥିବା ବେଳେ ଅନ୍ୟଏକ ଗାଡିକୁ ଲୋକଙ୍କ କବଳରୁ ଉଦ୍ଧାର କରିଛି ପୋଲିସ। ପରେ ପୋଲିସ ପକ୍ଷରୁ ସାମାନ୍ୟ ଲାଠି ଚାର୍ଜ କରାଯିବାରୁ ଲୋକେ ପଛଘୁଞ୍ଚା ଦେଇଥିଲେ । ଏହି ଘଟଣାରେ ସେଠାରେ ହୋଇଥିବା ଧସ୍ତାଧସ୍ତିରେ ଗାଇସିଲଟ ଥାନାଧିକାରୀଙ୍କ ମୁଣ୍ଡ ଫାଟିଥିବା ସୂଚନା ମିଳିଛି।
ସୂଚନା ଅନୁଯାୟୀ ଗାଇସିଲେଟ ଥାନା ଅନ୍ତର୍ଗତ କଠଉମାଲ ଗ୍ରାମର ସ୍କୁଲରେ ଚାଲିଥିବା ପଞ୍ଚାୟତ ନିର୍ବାଚନ ପାଇଁ ଗ୍ରାମବାସୀ ଭୋଟ ଦେବାକୁ ଯାଇଥିଲେ । ତେବେ ଭୋଟ ଦେଇସାରିଥିବା ଲୋକଙ୍କୁ ପୋଲିସ ବୁଥ ଭିତରୁ ବାହାରକୁ ଘଉଡାଉଥିବା ସମୟରେ ସେଠାରେ ଥିବା ଜଣେ ମହିଳାଙ୍କୁ ପୋଲିସ ଲାଠିରେ ମାଡମାରିବାରୁ ଗ୍ରାମବାସୀ ଉତ୍ୟକ୍ତ ହୋଇ ପୋଲିସ ଉପରକୁ ଆକ୍ରମଣ କରିଥିଲେ । ତେବେ ଶାନ୍ତି ଶୃଙ୍ଖଳାରେ ମତଦାନ ଚାଲିଥିବା ବେଳେ ପୋଲିସର ଅତ୍ୟଧିକ ଚାପ କାରଣରୁ ଏପରି ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିବା ଗ୍ରାମବାସୀ ଅଭିଯୋଗ ଆଣିଛନ୍ତି ।
ବରଗଡରୁ ରାଜେଶ ସରାଫ, ଇଟିଭି ଭାରତ
