ବରଗଡ: ଜିଲ୍ଲାର ସରକାରୀ ଡାକ୍ତରଖାନାରେ ଖୋଲିଲା ପୋଲିସ ସହାୟତା କେନ୍ଦ୍ର । ‘ମୋ ସରକାର’ ଯୋଜନା ଅନୁଯାୟୀ ପୋଲିସ ପକ୍ଷରୁ ଏହି ସହାୟତା କେନ୍ଦ୍ର ଖୋଲାଯାଇଛି । ରୋଗୀ, ଡାକ୍ତରଖାନାର କର୍ମଚାରୀ ଏବଂ ସର୍ବସାଧାରଣଙ୍କ ସେବା ଓ ସୁରକ୍ଷା ପାଇଁ ବରଗଡ ଏସପି ପଦ୍ମିନୀ ସାହୁଙ୍କ ଅଧ୍ୟକ୍ଷତାରେ ଏହାର ଶୁଭାରମ୍ଭ ହୋଇଛି ।
ରାଜ୍ୟ ସରକାରଙ୍କ ‘ମୋ ସରକାର’ ଯୋଜନା ଅନୁଯାୟୀ ଡାକ୍ତରଖାନାରେ ତିନିଜଣ ପୋଲିସ କନେଷ୍ଟବଳ ଓ ଜଣେ ଇନଚାର୍ଜ ଅଫିସର ଦିନ ତମାମ ଉପସ୍ଥିତ ରହି ପୋଲିସ ସେବା ଯୋଗାଇବାର ବ୍ୟବସ୍ଥା କରାଯାଇଛି । ଡାକ୍ତରଖାନା ଗୁଡିକରେ ଦିନକୁ ଦିନ ବଢି ଚାଲିଥିବା ଦଲାଲଙ୍କ ଅସାମାଜିକ କାର୍ଯ୍ୟକଳାପ ଓ ଦୁର୍ବୃତ୍ତଙ୍କ ଅପରାଧକୁ ରୋକିବା ପାଇଁ ଏଭଳି ନିଷ୍ପତ୍ତି ନିଆଯାଇଛି ।
ତେବେ ଏହି ଅବସରରେ ବରଗଡ ଏସପି ପଦ୍ମିନୀ ସାହୁ ଡାକ୍ତରଖାନା ପରିଦର୍ଶନ କରିଥିଲେ । ରୋଗୀ, କାର୍ଯ୍ୟରତ କର୍ମଚାରୀ ତଥା ଏଡିଏମଓଙ୍କୁ ଡାକ୍ତରଖାନାର ସୁବିଧା ଅସୁବିଧା ବିଷୟରେ ପଚାରି ବୁଝିଥିଲେ ସେ । ଏହା ସହିତ ଆମ୍ବୁଲାନ୍ସର ଯିବା ଆସିବାରେ ଯେଭଳି କିଛି ବାଧା ନପୁଜେ ସେ ନେଇ ଡାକ୍ତରଖାନାକୁ ସଂଯୋଗ କରୁଥିବା ରାସ୍ତା ଗୁଡିକୁ ୱାନ ୱେ କରିବାର ନିଷ୍ପତ୍ତି ନେଇଛନ୍ତି ସେ । ସେହିପରି ବେଆଇନ ଭାବେ ରାସ୍ତା କଡରେ ମାଡିବସିଥିବା ଦୋକାନ ଗୁଡିକୁ ହଟାଯିବାର ନିର୍ଦେଶ ଦେଇଛନ୍ତି ପଦ୍ମିନୀ ସାହୁ ।
ବରଗଡରୁ ରାଜେଶ ସରାପ, ଇଟିଭି ଭାରତ
