ବରଗଡ: ମହାମାରୀ କୋରୋନା ଗ୍ରାସରେ ସାରା ବିଶ୍ବ ପ୍ରଭାବିତ ହୋଇଥିବା ବେଳେ ଛୋଟ ବଡ ବିଭିନ୍ନ ବ୍ୟବସାୟ ଏଥିରେ କ୍ଷତିଗ୍ରସ୍ତ ହୋଇଛି । ଦେଶବ୍ୟାପୀ ଚାଲିଥିବା ଲକଡାଉନ ପାଇଁ ଦୋକାନ ବଜାର ବନ୍ଦ ରହିବା ସହିତ ଦୈନନ୍ଦିନ ରୋଜଗାରରେ ଲାଗିଛି ତାଲା । ସେପଟେ ଏସବୁ ଭିତରେ ଅଣଦେଖା ହୋଇ ରହିଯାଇଛି ଅତ୍ୟାବଶ୍ୟକୀୟ ସାମଗ୍ରୀ ଭାବେ ବ୍ୟବହୃତ ଦୁଗ୍ଧ ବ୍ୟବସାୟ । ବରଗଡ ଜିଲ୍ଲାର ହଜାର ହଜାର ଦୁଗ୍ଧ ବ୍ୟବସାୟୀ ଲକଡାଉନ ମଧ୍ୟରେ ନାହିଁ ନଥିବା ଅସୁବିଧା ଭୋଗୁଥିବା ଅଭିଯୋଗ କରିଛନ୍ତି ।
ବରଗଡ ଜିଲ୍ଲାରେ ଚାଷକାର୍ଯ୍ୟ ସହ ଦୁଗ୍ଧ ଚାଷର ରହିଛି ଯଥେଷ୍ଟ ଚାହିଦା ରହିଛି । ଅନେକ ଚାଷୀ କ୍ଷେତରେ ଚାଷକାର୍ଯ୍ୟ ସହ ଘରେ ଗୋରୁ ସେବା କରି ଦୁଗ୍ଧ ଚାଷ କରିଥାଆନ୍ତି । ଏମିତିରେ କେବେ ବର୍ଷା କି ମରୁଡି ପାଇଁ ଚାଷରେ କ୍ଷତି ସହିଲେ ଏହାକୁ ଦୁଗ୍ଧ ଚାଷରେ ଭରଣା କରିଦିଅନ୍ତି ଅନେକ । ସେପଟେ ଆହୁରି କିଛି ଏପରି ଚାଷୀ ବି ଅଛନ୍ତି ଯେଉଁମାନେ ନିଜ ଜମା ପୁଞ୍ଜି ବିନିଯୋଗ କରି ଦାମିକିଆ ଗାଈ ଆଣି ପାଳନ କରନ୍ତି । ପରେ ଏହାର କ୍ଷୀରକୁ ବିଭିନ୍ନ ସୋସାଇଟିରେ ବିକି ଗୁଜୁରାଣ ମେଣ୍ଟାନ୍ତି । ହେଲେ ଲକଡାଉନ ପାଇଁ ଏବେ ବିପଦରେ ଏହି ଲାଭଦାୟୀ ଦୁଗ୍ଧ ବ୍ୟବସାୟ ।
ବରଗଡ ଜିଲ୍ଲାରେ ଦୁଗ୍ଧ ଚାଷକୁ ପ୍ରୋତ୍ସାହନ ଦେବାକୁ ଯାଇ ସ୍ଥାପନ ହୋଇଛି ଏକ ଓମଫେଡର ଏକ ଚିଲିଂ ପ୍ଲାଣ୍ଟ । ଏଥିସହ ଜିଲ୍ଲାରେ ରହିଛି 505 କ୍ଷୀର ସୋସାଇଟି । ଯେଉଁଠାରେ ବର୍ଷତମାମ ଆଣି କ୍ଷୀର ପହଞ୍ଚାନ୍ତି ଜିଲ୍ଲାର 35 ହଜାର 575 ଦୁଗ୍ଧ ଚାଷୀ । ଏହି ସୋସାଇଟି ଗୁଡିକରୁ ବାର୍ଷିକ 2 ଲକ୍ଷ ଲିଟର କ୍ଷୀର ସଂଗ୍ରହ ହେଉଥିବା ବେଳେ ଲକଡାଉନ ପାଇଁ 21 ଦିନ ପାଇଁ ସମ୍ପୂର୍ଣ୍ଣ ବନ୍ଦ ପଡିଥିବା ସୋସାଇଟି । ଏହି ସମୟ ମଧ୍ୟରେ ଦୋକାନ ବଜାର ବନ୍ଦ ଓ ହୋଟେଲ ବନ୍ଦ ରହିଥିବା କ୍ଷୀରକୁ ବିକି ନପାରି ଅନେକ କ୍ଷତି ସହିଥିଲେ ଚାଷୀ । ବର୍ତ୍ତମାନ ଦିନେ ଛଡା ଦିନେ ଏହି ସୋସାଇଟିରୁ 70ରୁ 80 ହଜାର ଲିଟର ସଂଗ୍ରହ ହେଉଛି ସତ ତଥାପି କମୁନି ଚାଷୀଙ୍କ ଦୁଃଖ ।
ଖରା ଦିନ ପାଇଁ କ୍ଷୀର ଜଲଦି ନଷ୍ଟ ହେଉଥିବାରୁ ଏହାକୁ ବିକ୍ରି କରିନପାରି ଚିନ୍ତାରେ ଚାଷୀ । ସେପଟେ ହୋଟେଲ ଓ ଦୋକନା ବନ୍ଦ ରହୁଥିବାରୁ ପନିର ଓ ଛେନା ବ୍ୟବସାୟ ମଧ୍ୟ ଠପ ହୋଇପଡିଛି । ଅର୍ଥାଭାବ ସମୟରେ ଦୁଗ୍ଧ ଚାଷ ଅନେକଙ୍କ ସାହାର ପାଲଟିଥିବାରୁ ଅନେକ ଚାଷୀ ବ୍ୟାଙ୍କରୁ ଋଣ ଆଣି ବିଭିନ୍ନ ସରକାରୀ ଯୋଜନାରେ ଦୁଗ୍ଧ ଫାର୍ମ ଚଳାଇଥିଲେ । ହେଲେ ଏବେ କ୍ଷୀର ବିକ୍ରି ନହେବାରୁ ରୋଜଗାରେ ଲାଗିଛି ଲଗାମ । ଅନ୍ୟପଟେ ଗାଈଙ୍କ ପାଇଁ ଦାନା ମିଳୁନଥିବାରୁ ଭୋକରେ ଗୋର ଗାଈ । କଞ୍ଚା ଘାସ ଆଣିଲେ ବି ଏହାକୁ ଗାଈଙ୍କୁ ଦେବା ପାଇଁ ରହିଛି ଶ୍ରମିକ ଅଭାବ ।
ଏସମସ୍ତ ଅସୁବିଧା ପ୍ରତି ସରକାର ଦୃଷ୍ଟି ଦେଇ ତୁରନ୍ତ କିଛି ବ୍ୟବସ୍ଥା କରିବା ପାଇଁ ସାଧାରଣରେ ଦାବି ଜୋର ଧରିଛି । କେବଳ ଚାଷୀ ନୁହେଁ ଗାଈ ଗୋରୁଙ୍କ ଖାଦ୍ୟର ବ୍ୟବସ୍ଥା ମଧ୍ୟ କରିବା ପାଇଁ ଏବେ ବରଗଡ ଜିଲ୍ଲାର ଦୁଗ୍ଧ ଚାଷୀମାନେ ନିଜ ଯୁକ୍ତି ବାଢିଛନ୍ତି । ଅପେକ୍ଷା କେବେ ସରିବ ଲକଡାଉନ ଓ କେବେ ପୁଣି ସ୍ବାଭାବିକ ହେବ ଲାଭଦାୟୀ ଦୁଗ୍ଧ ବ୍ୟବସାୟ ।
ବରଗଡରୁ ରାଜେଶ ସରାପ, ଇଟିଭି ଭାରତ
