ବରଗଡ: ରାଜ୍ୟରେ 'ମୋ ସରକାର' କାର୍ଯ୍ୟକ୍ରମ ଲାଗୁ ହେବା ପରେ 5 'ଟି' ସଚିବ ଓ ତାଙ୍କ ଟିମ୍ ବିଭିନ୍ନ ଡାକ୍ତରଖାନାକୁ ଘନ ଘନ ଗସ୍ତ କରୁଛନ୍ତି । ଏହି କ୍ରମରେ ଶୁକ୍ରବାର ଟିମ୍ ସମ୍ବଲପୁର ଡାକ୍ତରଖାନାରେ ପହଞ୍ଚିଥିଲେ । ଏନେଇ ଖବର ପ୍ରକାଶିତ ହେବା ପରେ ଆଖପାଖ ଅଞ୍ଚଳର ସମସ୍ତ ଡାକ୍ତରଖାନା ଛାତିରେ ଛନକା ପଶିଯାଇଥିଲା । ଏହି ଭୟ ବରଗଡ ଜିଲ୍ଲା ମୁଖ୍ୟ ଚିକିତ୍ସାଳୟରେ ମଧ୍ୟ ଦେଖିବାକୁ ମିଳିଥିଲା ।
ପାଣ୍ଡିଆନ ଓ ତାଙ୍କ ଟିମଙ୍କ ଗସ୍ତକୁ ଦୃଷ୍ଟିରେ ରଖି ଡାକ୍ତରଖାନା ପରିସର ସଫାସୁତୁରା କରାଯିବା ସହ କର୍ମଚାରୀଙ୍କ ମଧ୍ୟରେ କାର୍ଯ୍ୟ ବ୍ୟସ୍ତତା ଦେଖିବାକୁ ମିଳିଥିଲା । ଏଥିସହିତ ସମସ୍ତଙ୍କ ଦେହରେ ଏପ୍ରୋନ ଲଗାଯାଇଥିଲା । ସେପଟେ ହସ୍ପିଟାଲକୁ 5'ଟି' ସଚିବଙ୍କ ଗସ୍ତର ଖବର ପାଇ ବରଗଡର କିଛି ବୁଦ୍ଧିଜୀବୀ ଡାକ୍ତରଖାନାରେ ପହଞ୍ଚିଥିଲେ । ଆଉ ପାଣ୍ଡିଆନଙ୍କୁ 'ମୋ ସରକାର'କୁ ନେଇ ପ୍ରଶ୍ନ କରିବେ ବୋଲି ପ୍ରସ୍ତୁତ ହୋଇଥିଲେ ।
ସୂଚନାନୁସାରେ, ବିଗତ ଦୁଇ ବର୍ଷ ହେବ ବରଗଡ଼ ଜିଲ୍ଳା ମୁଖ୍ୟ ଚିକିତ୍ସାଳୟର ଅସ୍ଥିଶଲ୍ୟ ବିଭାଗରେ ଡାକ୍ତର ନଥିବାବେଳେ ରୋଗୀ ତ ଦୂରର କଥା ବିକଳାଙ୍ଗ ମଧ୍ୟ ନିଜ ବିକଳାଙ୍ଗ ପ୍ରମାଣ ପତ୍ର ପାଇପାରୁନାହାଁନ୍ତି । ଯଦ୍ବାରା ସେମାନେ ନିଜ ବିକଳାଙ୍ଗ ଭତ୍ତାରୁ ବଞ୍ଚିତ ହୋଇଛନ୍ତି । ସେହିପରି ଉକ୍ତ ଜିଲ୍ଲା ମୁଖ୍ୟ ଚିକିତ୍ସାଳୟରେ ଅନେକ ସମସ୍ୟା ରହିଥିବାବେଳେ କେବେ ଏହାର ସମାଧାନ ହେବ ସେ ନେଇ ପ୍ରଶ୍ନ କରିଛନ୍ତି ବରଗଡବାସୀ ।
ଚିକିତ୍ସାଳୟର ଏଭଳି ସ୍ଥିତି ସିଧାସଳଖ ବୟାନ କରୁଛି ଯେ, 'ମୋ ସରକାର' କାର୍ଯ୍ୟକ୍ରମ ଓ 5'ଟି' ସଚିବଙ୍କ ଗସ୍ତ ଏକ ପ୍ରହସନ । ଆଉ ପାଣ୍ଡିଆନଙ୍କ ଠାରୁ ଏହିସବୁ ପ୍ରଶ୍ନର ଉତ୍ତର ମାଗିବାକୁ ବୁଦ୍ଧିଜୀବୀମାନେ ପାଣ୍ଡିଆନଙ୍କ ଅପେକ୍ଷା କରିଥିଲେ । ହେଲେ କୌଣସି କାରଣରୁ ସଚିବ ଓ ତାଙ୍କ ଟିମଙ୍କ ଗସ୍ତ ବାତିଲ ହୋଇଥିବାବେଳେ ବରଗଡ ଗସ୍ତ ସମୟରେ ଅସ୍ଥିଶଲ୍ୟ ଡାକ୍ତର ନେଇ ଆସନ୍ତୁ ବୋଲି ବୁଦ୍ଧିଜୀବୀ ଦାବି କରିଛନ୍ତି ।
ବରଗଡରୁ ରାଜେଶ ସରାପ, ଇଟିଭି ଭାରତ
