ବରଗଡ: ଦୃଢ ଇଚ୍ଛା ଶକ୍ତି ଓ ଈଶ୍ବରଦତ୍ତ କଳାର ସମାହାର ବାସ୍ତବରେ ବେଶ ନିଆରା । ଏପରି ଖୁବ କମ ଲୋକେ ଥାଆନ୍ତି ଯେଉଁମାନେ ନିଜ କଳାର ବିକାଶ ପାଇଁ ତମାମ ବାଧାବିଘ୍ନ ସତ୍ତ୍ବେ ସାଧନାରେ ନିଜକୁ ନିୟୋଜିତ ରଖନ୍ତି । ଆଉ ତାଙ୍କର ଏହି ନିଶା ଆଗରେ ଶେଷରେ ହାର ମାନେ ସମାଜ । ବର୍ତ୍ତମାନ ସମୟରେ ଗପ ପରି ଲାଗୁଥିବା ଏପରି ଏକ କାହାଣୀକୁ ବାସ୍ତବତାର ରୂପ ଦେଇଛନ୍ତି ବରଗଡ ଜିଲ୍ଲା ବରଗଡ ବ୍ଲକ ଗାଇସୋମା ଗ୍ରାମ ପଞ୍ଚାୟତ ମାଲିପାଳି ଗ୍ରାମର ମୀନକେତନ ଭୋଇ । ଚାଷୀ ପରିବାରରେ ଜନ୍ମ ନେଇଥିବା ମୀନକେତନ ଛୁଆଟି ଦିନରୁ ଅର୍ଥାଭାବ ଦେଇ ଗତି କରିଥିବା ବେଳେ ବାଦ୍ୟ ଯନ୍ତ୍ର ପ୍ରତି ଥିଲା ଦୁର୍ବଳତା । ଏନେଇ ବହୁ କଷ୍ଟରେ କିଛି ପଇସା ସଞ୍ଚି ସେ ମାତ୍ର 7 ଟଙ୍କାରେ କିଣିଥିଲେ ଏକ ବଂଶୀ । ଆଉ ସେଇଠୁ ଆରମ୍ଭ ହେଲା ତାଙ୍କର ବଂଶୀ ବାଦକର ସଂଘର୍ଷମୟ ଯାତ୍ରା ।
ମଫସଲ ଅଞ୍ଚଳରେ ଚାଷବାସ ଛଡା ଅନ୍ୟ କୌଣସି କାର୍ଯ୍ୟକୁ ପାଗଳାମିର ନାମ ଦିଆଯାଉଥିବା ବେଳେ ମୀନକେତନଙ୍କ ବଂଶୀ ବାଦନକୁ ମିଳିଥିଲା ସମାନ ଆଖ୍ୟା । ପରିବାର ସହ ଗ୍ରାମବାସୀ ମଧ୍ୟ ତାଙ୍କର ଏହି ନିଶାକୁ ବିରୋଧ କରିଥିଲେ । ହେଲେ ଅଟକି ନଥିଲା ମୀନକେତନଙ୍କ ବଂଶୀର ଧ୍ୱନି । ଚାଷ କାର୍ଯ୍ୟରୁ ଫୁରସତ ମିଳିଲେ ଜଙ୍ଗଲ ଓ କ୍ଷେତରେ ଏକାନ୍ତରେ ବସି ବଂଶୀ ବାଦନର ନିରନ୍ତର ସାଧନା କରୁଥିଲେ । ଏହି ନିଶା ପାଇଁ ଗ୍ରାମସଭା ବସିଥିବା ବେଳେ ସେ ଗାଁରୁ ବାହାରିଯାଇ ମଧ୍ୟ ସାଧନା ଜାରି ରଖିଥିଲେ । ବହୁ ସଂଘର୍ଷ ପରେ ସେ ଆହ୍ଲାବାଦ ସ୍ଥିତ ପ୍ରୟାଗ ସଙ୍ଗୀତ ସମିତିରେ 6 ବର୍ଷର ସଙ୍ଗୀତ ପ୍ରଭାକର ଡିଗ୍ରୀ ହାସଲ କରିଥିଲେ । ପରେ ପରେ ସେ 2 ବର୍ଷର ୱେଷ୍ଟର୍ଣ୍ଣ ମ୍ୟୁଜିକ ଜୁନିୟର ଡିପ୍ଲୋମା କୋର୍ସ ମଧ୍ୟ ଶେଷ କରିଥିଲେ । ବାସ୍, ଏହା ପରେ ଆଉ ପଛକୁ ବୁଲି ଚାହିଁ ନାହାନ୍ତି ମୀନକେତନ ।
10 ଇଞ୍ଚରୁ ଅଢେଇ ଫୁଟର 24 ପ୍ରକାର ବଂଶୀ ବଜାଇବାରେ ପାରଙ୍ଗମ ମୀନକେତନ । ତାଙ୍କ ବଂଶୀର ତାନ ଏତେ ମିଠା କି ତାଙ୍କୁ ବିରୋଧ କରୁଥିବା ଗ୍ରାମବାସୀ ଏବେ ତାଙ୍କ ବଂଶୀ ବାଦନ ଶୁଣିବାକୁ ବ୍ୟାକୁଳ ପ୍ରାୟ । ସେପଟେ ମୀନକେତନଙ୍କ ଇଚ୍ଛା ଶକ୍ତି ଦେଖି 2018 ମସିହାରେ ଇଂଲଣ୍ଡରେ ସ୍ପେଶ ଇଞ୍ଜିନିୟର ଥିବା ବରଗଡର ସଞ୍ଜୟ ସାହୁ ତାଙ୍କୁ 2 ଲକ୍ଷ 15 ହଜାର ଟଙ୍କାର ଏକ ସାକ୍ସୋଫୋନ ଉପହାର ସ୍ବରୂପ ଦେଇଥିଲେ । ତେବେ କେବଳ ବଂଶୀ ନୁହେଁ, ଡୁବି ତାବଲା, ତୂରୀ ଓ ବିଭିନ୍ନ ପ୍ରକାରର ସାକ୍ସୋଫୋନ ବଜାଇବାରେ ମଧ୍ୟ ସେ ସିଦ୍ଧହସ୍ତ ।
ତମାମ ବାଧା ବିଘ୍ନ ସତ୍ତ୍ବେ ନିଜ ଇଚ୍ଛା ଶକ୍ତିରେ ନିଡର ହୋଇ ତିଷ୍ଠି ରହିଥିଲେ ମୀନକେତନ । ଫଳସ୍ବରୂପ ଦିନେ ଟାହିଟାପରାରେ ପୋତି ପକାଉଥିବା ସାଙ୍ଗ ସାଥୀ ଓ ଗ୍ରାମବାସୀ ଏବେ ତାଙ୍କ ବଂଶୀ ବାଦନରେ ମୁଗ୍ଧ । ବର୍ତ୍ତମାନ ସୁଦ୍ଧା 100ରୁ ଅଧିକ ସଙ୍ଗୀତରେ ବଂଶୀ ବଜାଇଥିବା ମୀନକେତନ ଏବେ ସଫଳତା ପାଇଛନ୍ତି ସତ ହେଲେ ମିଳିନି ତାଙ୍କ ଅଧିକାରର ପରିଚୟ । ସେପଟେ ବର୍ତ୍ତମାନର ପୀଢି ପାଇଁ ଉଦାହରଣ ସାଜିଥିବା ମୀନକେତନ ଆଗକୁ ଆହୁରି ସଫଳତା ହାସଲ କରନ୍ତୁ ବୋଲି ପ୍ରକାଶ କରିଛନ୍ତି ପରିବାରବର୍ଗ ।
ବରଗଡରୁ ରାଜେଶ ସରାପ, ଇଟିଭି ଭାରତ
