ବରଗଡ଼: କୋରୋନା ମହାମାରୀ ମଣିଷ ପାଇଁ କାଳ ହୋଇଛି କିନ୍ତୁ ବରଦାନ ସାଜିଛି ପ୍ରକୃତି ପାଇଁ । ଦୀର୍ଘ ଦିନର ଲକଡାଉନ ଯୋଗୁଁ ପରିବେଶରେ ହୋଇଛି ଅନେକ ପରିବର୍ତ୍ତନ । ସ୍ବଚ୍ଛ ନିର୍ମଳ ପରିବେଶ ଯୋଗୁଁ ଧୀରେ ଧୀରେ ଫେରୁଛନ୍ତି ଅନେକ ବିଲୁପ୍ତ ପ୍ରାୟ ଜୀବଜନ୍ତୁ । ଆଉ ଏମିତିରେ ଘର ବାହୁଡ଼ିଛି ଅନେକ ଦିନରୁ ହଜିଯାଇଥିବା ଘରଚଟିଆ । ବରଗଡ଼ ଜିଲ୍ଲାର ଗ୍ରାମାଞ୍ଚଳ ମାନଙ୍କରେ ଏବେ ଶୁଣିବାକୁ ମିଳିଛି ଏହି କୁନି ଚଢ଼େଇର କିଚିରି ମିଚିରି ଶବ୍ଦ । ଅଧିକ ମାତ୍ରାରେ ନହେଲେ ମଧ୍ୟ ଅଳ୍ପ ସଂଖ୍ୟାରେ ଘର ଚଟିଆ ଦେଖିବାକୁ ମିଳିଛନ୍ତି । ଯାହାକୁ ଦେଖି ପରିବେଶ ପ୍ରେମୀଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି ।
ଦିନ ଥିଲା ଘରେ ଘରେ ଦେଖାଯାଉଥିଲେ ଘର ଚଟିଆ । ପରିବାରର ସଦସ୍ୟ ପରି ମଣିଷର ଚାଳ ଘରେ ସେ ବାନ୍ଧିଥିଲା ତାର ବସା । ତେଣୁ କରି ତ ତାର ନାଁ ଥିଲା ଘର ଚଟିଆ । ତାର କିଚିରି ମିଚିରି ସ୍ଵରରେ ପରିବେଶ ହୋଇଉଠୁଥିଲା ଚଳଚଞ୍ଚଳ । କେତେବେଳେ ସେ ଖୁଣ୍ଟି ଖୁଣ୍ଟି ଚାଉଳ ଖାଉଥିଲା, ତେ ଆଉ କେତେବେଳେ ଦର୍ପଣରେ ନିଜ ପ୍ରତିବିମ୍ବ ଦେଖି ତାକୁ ଥଣ୍ଟ ମାରୁଥିଲା । ଧୀରେ ଧୀରେ ଆଧୁନିକତା ସହ ବଦଳିଲା ମଣିଷର ଜୀବନ ଶୈଳୀ । ଗାଁର ଚାଳ ଘର ସବୁ ପାଲଟି ଗଲା କୋଠା । ଆଉ ନିଜ ବସା ହରାଇଲା ଏହି ଟିକି ଚଢ଼େଇ ।
ଚାଷବାସରେ ଅଧିକ ମାତ୍ରାରେ କୀଟନାଶକ ବ୍ୟବହାର କାରଣରୁ କୀଟ ଓ ପୋକ ଅଭାବ ହେବାରୁ ଖାଦ୍ୟ ମିଳିଲା ନାହିଁ ଘରଚଟିଆକୁ । କୁହାଯାଏ ଯେ ଘରଚଟିଆ ପାଇଁ ସବୁଠାରୁ ବଡ଼ ବିପଦ ପାଲଟିଲା ମୋବାଇଲ ଟାୱାରରୁ ଆସୁଥିବା ରେଡିଏସନ ବା ତରଙ୍ଗ । ଯାହାର ପ୍ରଭାବରେ ଘରଚଟିଆର ବଂଶ ଧୀରେ ଧୀରେ ଲୁପ୍ତ ହେବାକୁ ଲାଗିଲା । ଯାହାପରେ ମଣିଷର ସାଥୀ ହେଇଥିବା ଏହି ଟିକି ଚଢ଼େଇର ସ୍ବର ହଜିଗଲା ଆଧୁନିକତାର କୋଳାହଳ ଭିତରେ । ବିଗତ 15 ବର୍ଷ ହେଲା ତାକୁ ଆଉ ଦେଖିବାକୁ ମିଳୁ ନଥିଲା । ପ୍ରଥମେ ସହରାଞ୍ଚଳ ଓ ପରେ ଗ୍ରାମାଞ୍ଚଳ ମାନଙ୍କରୁ ମଧ୍ୟ ସଂପୂର୍ଣ୍ଣ ଉଭାନ ହୋଇଯାଇଥିଲେ ଏମାନେ । ମାତ୍ର ଏବେ କିଛି ଦିନହେଲା ଲକଡାଉନ ପରେ ପରିବେଶ ହୋଇଥିଲା ଶାନ୍ତ, ପ୍ରଦୂଷଣ ମୁକ୍ତ ଯାହା କାରଣରୁ ଗ୍ରାମାଞ୍ଚଳ ମାନଙ୍କରେ ଦେଖିବାକୁ ମିଳିଛି ଘରଚଟିଆଙ୍କୁ । ଅଧିକ ମାତ୍ରାରେ ନହେଲେ ମଧ୍ୟ ଅଳ୍ପ ସଂଖ୍ୟକ ଘର ଚଟିଆ ବରଗଡ ସହର ନିକଟସ୍ଥ ଗ୍ରାମାଞ୍ଚଳ ମାନଙ୍କରେ ଦେଖିବାକୁ ମିଳିଛି ।
ମଣିଷ ଲକଡାଉନ କାରଣରୁ ବନ୍ଦୀ ହେଲା ଆଉ ମୁକ୍ତାକାଶରେ ଉଡି ବୁଲିଥିଲେ ଆକାଶର ଅନେକ ସାଥୀ । ବଣରେ ନିର୍ଭୟରେ ବୁଲିଲେ ଜୀବଜନ୍ତୁ । କଳକାରଖାନା ବନ୍ଦ ହେବା ଯୋଗୁଁ ନିର୍ମଳ ହୋଇଥିଲା ଅନେକ ନଦନଦୀ । ଅନେକ ବିରଳ ପ୍ରଜାତିର ଜୀବଜନ୍ତୁ ମଧ୍ୟ ହୋଇଥିଲେ ଦୃଶ୍ୟମାନ । ଆଉ ଘରକୁ ବାହୁଡ଼ି ଆସିଲା ଘରଚଟିଆ । ଏହି ଲକଡାଉନ ମଣିଷ ଠାରୁ ଦୂରେଇ ଯାଇଥିବା ଘରଚଟିଆକୁ ପୁଣି ଫେରାଇ ଆଣିଛି । ବିଲୁପ୍ତ ପ୍ରାୟ ଘର ଚଟିଆର ଆଗମନରେ ଗ୍ରାମାଞ୍ଚଳ ଲୋକେ ଖୁସି ଥିବାବେଳେ ଘରଚଟିଆଙ୍କ କିଚିରମିଚିର ଶବ୍ଦର ଉପଭୋଗ କରିବାରେ ମଜ୍ଜିଯାଇଛନ୍ତି ଲୋକେ । ତେବେ ଲକଡାଉନ ପରେ ବର୍ତ୍ତମାନ ଯେଉଁ ପ୍ରକାରର ପରିବେଶ ରହିଛି, ତାହା ଆଗକୁ ମଧ୍ୟ ରହିଲେ ମଣିଷକୁ ଦିନେ ଛାଡି ଚାଲିଯାଇଥିବା ତାର ସାଥୀ ଘରଚଟିଆ ପୁଣି ପୂର୍ବପରି ମଣିଷ ସହିତ ନିଶ୍ଚୟ ବସବାସ କରିବ ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
