ଚିନ୍ତାରେ ବରଗଡ ଧାନ ଚାଷୀ, ରୋଗପୋକ ମୁହଁରେ ଖରିଫ ଫସଲ

ରୋଗପୋକ ଦାଉରୁ ଧାନ ଫସଲକୁ ରକ୍ଷା କରିବା ପାଇଁ କୃଷି ବିଭାଗର ବୈଜ୍ଞାନିକ ଟିମ ମଧ୍ୟ ଫେଲ ମାରିଛନ୍ତି । ଚିନ୍ତାରେ ବରଗଡ ଜିଲ୍ଲାର ଧାନ ଚାଷୀ ।

ବରଗଡ: ଚିନ୍ତାରେ ଜିଲ୍ଲାର ଧାନ ଚାଷୀ । ପ୍ରତିକୂଳ ପାଣିପାଗ କାରଣରୁ ଚଳିତ ଖରିପ ଋତୁରେ ଫସଲରେ ରୋଗ ପୋକର ପାର୍ଦ୍ରୁଭାବ ବଢିବାକୁ ଲାଗିଲାଣି । ଯେତେ କୀଟନାଶକ ବ୍ୟବହାର କଲେ ମଧ୍ୟ କାମଦେଉନି । ଏପରିକି ଦିନକୁ ଦିନ ନଷ୍ଟ ହେବାରେ ଲାଗିଛି ଧାନ ଫସଲ । ଅନ୍ୟପଟେ ରୋଗପୋକ ଦାଉରୁ ଧାନ ଫସଲକୁ ରକ୍ଷା କରିବା ପାଇଁ କୃଷି ବିଭାଗର ବୈଜ୍ଞାନିକ ଟିମ ମଧ୍ୟ ଫେଲ ମାରିଛି ।

ଫଳରେ ଜିଲ୍ଲାର ଚାଷୀଙ୍କ ପାଇଁ ମୁଣ୍ଡବ୍ୟଥାର କାରଣ ପାଲଟିଛି ଧାନ ଫସଲରେ ଲାଗିଥିବା ରୋଗପୋକ । ଧାନ ଗଛ ମାନଙ୍କ ମୂଳରୁ ଶେଷ ପର୍ଯ୍ୟନ୍ତ ଲାଲ ହୋଇଯାଉଥିବା ବେଳେ ଆଖପାଖ କ୍ଷେତକୁ ମଧ୍ୟ ଏହି ରୋଗ ବ୍ୟାପିବାରେ ଲାଗିଛି ।

କୋରୋନା ମହାମାରୀ ବରଗଡର ଚାଷୀଙ୍କ ପାଇଁ କାଳ ସାଜିଥିବା ବେଳେ ଏବେ ନିଜ ଫସଲରେ ଲାଗୁଥିବା ରୋଗପୋକ ଚିନ୍ତାରେ ପକାଇଦେଇଛି । ବାରମ୍ବାର ଲଘୁଚାପ ଜନିତ ବର୍ଷା କାରଣରୁ ଚଳିତ ଖରିଫ ଫସଲରେ ପୋକ ଲାଗି ନଷ୍ଟ ହେବାକୁ ବସିଲାଣି ।

ବରଗଡରୁ ରାଜେଶ ସରାପ, ଇଟିଭି ଭାରତ