ବରଗଡ: ମଣିଷ ଜନ୍ମଠାରୁ ଆରମ୍ଭ କରି ମୃତ୍ୟୁ ପର୍ଯ୍ୟନ୍ତ 16ଟି ସଂସ୍କାର ଦେଇ ଗତି କରିଥାଏ । ଜନ୍ମ, ନାମକରଣ, ବ୍ରତୋପନୟନ, ବିବାହ ଓ ଶେଷରେ ଅନ୍ତ୍ୟେଷ୍ଟି କ୍ରିୟା । ପ୍ରତ୍ୟେକ ସଂସ୍କାରରେ ଜୀବନରେ ରହିଛି ସ୍ବତନ୍ତ୍ର ମର୍ଯ୍ୟାଦା । ଜାତି, ଧର୍ମ ଓ ବର୍ଣ୍ଣ ନିର୍ବିଶେଷରେ ପ୍ରତ୍ୟେକ କ୍ଷେତ୍ରରେ ଜନ୍ମ ପରି ମୃତ୍ୟୁ ପରେ ମଧ୍ୟ ମୃତ ଶରୀରକୁ ସମ୍ମାନ ଦେବାର ପରମ୍ପରା ରହିଛି । ହେଲେ ବର୍ତ୍ତମାନ ସମୟରେ ସାରା ବିଶ୍ବକୁ ଗ୍ରାସ କରିଥିବା କୋରୋନା ମହାମାରୀ ପାଇଁ ବଦଳିଛି ଯୁଗ ଯୁଗର ପରମ୍ପରା । ଏବେ କୋରୋନା ଆକ୍ରାନ୍ତ ଜୀବିତ ଥାଉ ଥାଉ ଛୁଆଁ ଅଛୁଆଁ ଭେଦଭାବର ଶିକାର ହେଉଥିବା ବେଳେ ମୃତ୍ୟୁ ପରେ ସସମ୍ମାନେ ସତ୍କାର କଥା ବା ପଚାରେ କିଏ ? ନିକଟରେ ବରଗଡ ଜିଲ୍ଲାରେ ଏନେଇ ଦେଖିବାକୁ ମିଳିଥିଲା ଅତି ଦୟନୀୟ ଚିତ୍ର । ସତ୍କାର ପାଇଁ କୋରୋନା ଆକ୍ରାନ୍ତଙ୍କ ମରଶରୀରକୁ ଧରି ଏ ଶ୍ମଶାନ ସେ ଶ୍ମଶାନ ବୁଲିବା ପରେ ଶେଷରେ ଘଞ୍ଚ ଜଙ୍ଗଲରେ ଶେଷ ହେଲା ଶେଷକୃତ୍ୟ ।
ସାରା ରାଜ୍ୟରେ ବର୍ତ୍ତମାନ କୋରୋନା ନିଜ କାୟା ବିସ୍ତାର କରି ଚାଲିଥିବା ବେଳେ ବରଗଡ ଜିଲ୍ଲାରେ ଆକ୍ରାନ୍ତ ସଂଖ୍ୟା 5ହଜାର ଅତିକ୍ରମ କରିଛି । ସମାନ ଭାବେ ମୃତ୍ୟୁ ସଂଖ୍ୟା ମଧ୍ୟ ଦିନକୁ ଦିନ ବଢି 10 ଅତିକ୍ରମ କରିଛି । ସରକାରୀ ଭାବେ ଏହି ସଂଖ୍ୟା 10 ଅତିକ୍ରମ କରିଥିବା ବେଳେ ବେସରକାରୀ ଭାବେ ଏହା 50 ଟପିଥିବା ଦାବି କରିଛନ୍ତି ସ୍ଥାନୀୟବାସୀ । ଏମିତିରେ ସଂକ୍ରମଣ ଭୟରେ ଆକ୍ରାନ୍ତଙ୍କ ମୃତ ଶରୀରର ସତ୍କାର ପାଲଟିଛି ଏକ ବଡ ଚିନ୍ତା । ସାଧାରଣ ଶ୍ମଶାନରେ ସତ୍କାର କଲେ ସଂକ୍ରମଣ ବଢିବ କହି ସିଧା ବାଟ କିଳି ଦେଉଛନ୍ତି ସ୍ଥାନୀୟବାସୀ । ତେଣେ ପ୍ରଶାସନ ମଧ୍ୟ ସାଧାରଣ ଲୋକଙ୍କ ଆଗରେ ସତେ ଯେମିତି ଉପାୟଶୂନ୍ୟ ହୋଇ ପଡିଛି । ସେପଟେ ସୁଖ ଦୁଃଖରେ ଜିଲ୍ଲାବାସୀଙ୍କ ସାହାରା ପାଲଟିଥିବା ସଂକଳ୍ପ ପରିବାରକୁ ମଧ୍ୟ ଶବ ସତ୍କାର ପାଇଁ ଅନେକ ଅସୁବିଧାର ସମ୍ମୁଖୀନ ହେବାକୁ ପଡୁଥିବା ଦେଖାଯାଉଛି ।
ଜିଲ୍ଲାରେ କୋଭିଡ ହସ୍ପିଟାଲରେ ମୃତ୍ୟୁ ହେଉଥିବା ରୋଗୀର ମୃତଦେହକୁ ପ୍ରଶାସନ ପକ୍ଷରୁ ବିଭିନ୍ନ ସ୍ଵେଚ୍ଛାସେବୀ ସଙ୍ଗଠନ ମାଧ୍ୟମରେ ସତ୍କାର କରାଯାଉଥିଲେ ମଧ୍ୟ ଲୋକଙ୍କ ବିରୋଧ କାରଣରୁ ଏଥିରେ ବାଧା ସୃଷ୍ଟି ହୋଇଛି । ଜିଲ୍ଲାରେ କୋଟି କୋଟି ଟଙ୍କା ଖର୍ଚ୍ଚ କରି କୋଭିଡ ହସ୍ପିଟାଲ ନିର୍ମାଣ କରାଯାଇଛି ସତ ମାତ୍ର କୋଭିଡ଼ ମୃତକଙ୍କୁ ସମ୍ମାନର ସହିତ ସତ୍କାର କରିବା ପାଇଁ ଶ୍ମଶାନଟିଏ ମଧ୍ୟ କରାଯାଇପାରି ନାହିଁ । ଏନେଇ ବୁଦ୍ଧିଜୀବୀ ମହଲରେ ତୀବ୍ର ନିନ୍ଦା ପ୍ରକାଶ ପାଇବା ସହ ଏନେଇ ତୁରନ୍ତ ବ୍ୟବସ୍ଥା କରାଯିବା ନେଇ ସ୍ଥାନୀୟ ବିଧାୟକ ଏବଂ ଜିଲ୍ଲା ପ୍ରଶାସନ ନିକଟରେ ଦାବି ହୋଇଛି ।
କୋରୋନା ମହାମାରୀ ଆଳରେ ପରମ୍ପରା ଓ ସଂସ୍କୃତି ବିଲୋପ ହେବାକୁ ବସିଥିବା ବେଳେ ମାନବିକତା ଉପରେ ଉଠିଛି ପ୍ରଶ୍ନ । ଏମିତିରେ ମୃତ୍ୟୁ ପରେ ସମ୍ମାନ ତ ଦୂରର କଥା ବଞ୍ଚି ଥାଉ ଥାଉ ଲୋକେ ଆଉ ପାଖ ମାଡୁନଥିବାର ନଜିର ବେଶ ହୃଦୟବିଦାରକ । ଏନେଇ ଖୁବ ଶୀଘ୍ର ସମାଧାନ ହେବା ସହ କୋଭିଡ ଆକ୍ରାନ୍ତଙ୍କୁ ସମ୍ମାନର ସହ ବିଦାୟ ଦିଆଯିବାର ବ୍ୟବସ୍ଥା କରାଯିବା ଆବଶ୍ୟକ ।
ବରଗଡରୁ ରାଜେଶ ସରାପ, ଇଟିଭି ଭାରତ
