ବରଗଡ: ଚଳିତ ବର୍ଷ ଧାନ ସଂଗ୍ରହ ପ୍ରକ୍ରିୟାରେ ରାଜ୍ୟ ସରକାରଙ୍କ ନୂତନ ନିୟମ ଚାଷୀ କୂଳକୁ ନିରାଶ କରିବା ସହ ଅସୁବିଧାରେ ପକାଇଛି। ଗୋଟିଏ ପଟେ ଟୋକନ ବ୍ୟବସ୍ଥାରେ ଅନିୟମିତତା ତ ଅନ୍ୟପଟେ ଆଖି ସ୍କାନ କରିବାର ନିୟମ ଯୋଗୁଁ ବରଗଡ ଜିଲ୍ଲାର ଚାଷୀ ମଣ୍ଡିରେ ମଧ୍ୟ ନିଜର ଧାନ ବିକ୍ରି କରିବାରେ ଅସମର୍ଥ ହୋଇଛି। ଫଳରେ ବାଧ୍ୟ ହୋଇ କମ ଦାମରେ ବେପାରୀଙ୍କୁ ଧାନ ବିକ୍ରି କରୁଛି।
ରାଜ୍ୟର ଭାତହାଣ୍ଡି କୁହାଯାଉଥିବା ବରଗଡ ଜିଲ୍ଲାର ଚାଷୀ ଏବେ ନିଜର ଉପାର୍ଜିତ ଧାନ ବିକ୍ରି କରିବାରେ ଅସମର୍ଥ ହୋଇପଡିଛି। ସରକାରଙ୍କ ଟୋକନ ସିଷ୍ଟମ ଯୋଗୁଁ ଧାନ ଅମଳ କରି ସାରିଥିବା ଚାଷୀ ନିଜ ଧାନକୁ ଘରେ ରଖି ଟୋକନର ଅପେକ୍ଷାରେ ଅନାଇ ବସିଥିବା ବେଳେ ଟୋକନ ଆସିଥିବା ଚାଷୀଙ୍କ ଧାନ ଅମଳ ହୋଇନାହିଁ। ଫଳରେ ବହୁ ଚାଷୀ ଧାନ ବିକ୍ରି କରି ନପାରି ବାଧ୍ୟ ହୋଇ ବେପାରୀଙ୍କୁ କମ ଦାମରେ ଧାନ ବିକ୍ରି କରୁଛନ୍ତି।
ଅନ୍ୟପଟେ ଟୋକନ ପାଇ ମଣ୍ଡିରେ ଧାନ ପକାଇଥିଲେ ମଧ୍ୟ ଚାଷୀ ନିଜର ଆଖିକୁ ସ୍କାନ କରିବାକୁ ବାଧ୍ୟ ହେଉଛି ଏବଂ ଏହି ଆଖି ସ୍କାନ କରିବାର ପ୍ରକ୍ରିୟାରେ ବହୁ ଅନିୟମିତତା ଦେଖାଦେଇଛି । କେତେବେଳେ ଇଣ୍ଟରନେଟ ଫେଲ ହେଉଛି ତ ଆଉ କେତେବେଳେ ସଫ୍ଟୱେୟାର ସମସ୍ୟା ଓ ଲିଙ୍କ ଫେଲ ହେବାରୁ ବାରମ୍ବାର ଚାଷୀଙ୍କୁ ଫେରିବାକୁ ପଡୁଛି। ରବି ଫସଲ ପାଇଁ ଚାଷୀ ପ୍ରସ୍ତୁତି କରୁଥିବା ସମୟରେ ନିଜ କାମ ଛାଡି ମଣ୍ଡିକୁ ଧାନ ବିକ୍ରି କରିବା ପାଇଁ ବାରମ୍ବାର ଚାଷୀକୁ ଦୌଡିବାକୁ ପଡ଼ୁଛି। ଏପରି ଅବ୍ୟବସ୍ଥା ଭିତରେ ଚାଷୀ ନିଜର କଷ୍ଟ ଉପାର୍ଜିତ ଧାନକୁ 500ରୁ 600 ଟଙ୍କା କମ ମୂଲ୍ୟରେ ଦେବାକୁ ବାଧ୍ୟ ହେଉଛି।
ବରଗଡରୁ ରାଜେଶ ସରାପ, ଇଟିଭି ଭାରତ
