ବରଗଡ: ଜିଲ୍ଲାର ଚାଷୀଙ୍କ ମୁଣ୍ଡରେ ଚଡକ ପଡିଛି । ବହୁ କଷ୍ଟରେ ଉପାର୍ଜିତ ଧାନ ମଧ୍ୟ ବିକ୍ରି କରିବା ଏବେ ଚାଷୀଙ୍କ ପାଇଁ କଷ୍ଟସାଧ୍ୟ ବ୍ୟାପାର ହେବାକୁ ବସିଲାଣି । ଫଳରେ ଚାଷୀ ଆଉ ଆଗକୁ ଚାଷ କାମ କରିବେ ନାଁ ନାହି ସେନେଇ ଚିନ୍ତାରେ ପଡିଯାଇଛନ୍ତି । ଅନ୍ୟପଟେ ଚାଷୀ ତାର ଅଧିକାର ପାଇଁ ଆନ୍ଦୋଳନ କଲେ ଜେଲ ଯିବାକୁ ପଡୁଛି ।
ବରଗଡରେ ବହୁ ଚାଷୀଙ୍କ ଗତ ରବି ଫସଲର ଧାନ ବିକ୍ରି ନହୋଇ ଘରେ ଏବଂ ଧାନ ମଣ୍ଡିରେ ପଡିଥିବା ବେଳେ ସରକାର ଚାଷୀଙ୍କ ଟୋକନ ଫେରାଇ ଦେଇଛନ୍ତି । ଫଳରେ ଚାଷୀ ଅତାବିରାଠାରେ ଆନ୍ଦୋଳନ କରିଥିଲେ ମାତ୍ର କୌଣସି ସୁଫଳ ମିଳିନଥିଲା । ଓଲଟା ପୋଲିସ ସେମାନଙ୍କୁ ଗିରଫ କରି ନେଇଯାଇଥିଲା ।
ତେବେ ବୁଧବାର ବରଗଡରେ ଚାଷୀଙ୍କ ମଧ୍ୟରେ ଏହି ଘଟଣାକୁ ନେଇ ଅସନ୍ତୋଷ ଦେଖାଯାଇଥିଲା । ଅନ୍ୟପଟେ ବରଗଡ ଜିଲ୍ଲା କଂଗ୍ରେସ ପକ୍ଷରୁ ବୁଧବାର ଜିଲ୍ଲାପାଳ ଜ୍ୟୋତିରଞ୍ଜନ ପ୍ରଧାନଙ୍କୁ ଭେଟି ଚାଷୀଙ୍କ ସମସ୍ୟା ଦୂର କରାଯାଉ ନଚେତ କଂଗ୍ରେସ ଦଳ ପକ୍ଷରୁ ଆନ୍ଦୋଳନକୁ ତୀବ୍ର କରାଯିବ ବୋଲି ଚେତାବନୀ ଦେଇଥିଲେ ।
ବରଗଡରୁ ରାଜେଶ ସରାପ, ଇଟିଭି ଭାରତ
