ବରଗଡ: ଅକ୍ଟୋବର 21 ତାରିଖରେ ହେବାକୁ ଥିବା ଉପନିର୍ବାଚନ ପାଇଁ ସରଗରମ ହୋଇଉଠିଛି ବିଜେପୁର ନିର୍ବାଚନମଣ୍ଡଳୀ । ମତଦାନ ପାଖେଇ ଆସୁଥିବାରୁ ନିର୍ବାଚନ ପ୍ରଚାରକୁ ଜୋରଦାର କରିଛନ୍ତି ସବୁ ଦଳ । ଏଥିପାଇଁ ବହୁ ନେତା ଓ ମନ୍ତ୍ରୀଙ୍କ ଭିଡ ସେଠାରେ ଜମିବାରେ ଲାଗିଛି । ବର୍ତ୍ତମାନ ବିଜେପୁରରେ ନିର୍ବାଚନ ମାହୋଲ ଥିବା ବେଳେ, ଏଭଳି ସ୍ଥିତିରେ ଅସନ୍ତୁଷ୍ଟ ହୋଇ ବିଜେପି ଛାଡିଥିବା ପୂର୍ବତନ ବିଧାୟକ ଅଶୋକ ପାଣିଗ୍ରାହୀ ଏବେ ବିଜେଡି ପାଇଁ ପ୍ରଚାର କରୁଥିବା ଚର୍ଚ୍ଚା ହେଉଛି।
ସେ ତାଙ୍କ ସମର୍ଥକଙ୍କ ସହ ବରପାଲି, ବିଜେପୁର ଏବଂ ଗାଇସିଲେଟ ବ୍ଲକର ବିଭିନ୍ନ ପଞ୍ଚାୟତ ବୁଲି ବିଜେଡି ପାଇଁ ପ୍ରଚାର କରୁଥିବା କୁହାଯାଉଛି | ଯଦିଓ ସେ ବିଧିବଦ୍ଧ ଭାବେ ବିଜେଡିରେ ସାମିଲ ହୋଇନାହାଁନ୍ତି, ତଥାପି ବିଜେପୁର ଉପନିର୍ବାଚନରେ ଶାସକ ଦଳର ପ୍ରଚାର ପ୍ରସାରରେ ଲାଗିଛନ୍ତି । ଏପରିକି ବିଜେଡିକୁ ଭୋଟ ଦେବା ପାଇଁ ଲୋକଙ୍କୁ ଅନୁରୋଧ କରୁଛନ୍ତି । ଦଳ ପକ୍ଷରୁ ତାଙ୍କୁ ଅଣଦେଖା କରାଯାଉଥିବା ଅଭିଯୋଗରେ ସେ ତାଙ୍କ ସମର୍ଥକଙ୍କ ସହ ବିଜେପି ଛାଡିଛନ୍ତି।
ଏହା ଉପରେ ପ୍ରତିକ୍ରିୟା ରଖି ଅଶୋକ ପାଣିଗ୍ରାହୀ କହିଛନ୍ତି, ‘ସେ ବିଜେଡି ପ୍ରାର୍ଥୀଙ୍କୁ ସମର୍ଥନ କରୁନାହାନ୍ତି ବରଂ ଦଳକୁ ସମର୍ଥନ କରୁଛନ୍ତି’ । ପ୍ରଚାର ମୈଇଦାନରେ ବିଜେଡିର କୌଣସି ନେତା କିମ୍ବା ମନ୍ତ୍ରୀଙ୍କୁ ତାଙ୍କ ସହ ଦେଖିବାକୁ ମିଳୁ ନଥିଲେ ମଧ୍ୟ କେବଳ ସେ ନିଜ ସମର୍ଥକଙ୍କ ସହ ବିଜେଡି ପାଇଁ ପ୍ରଚାର କରିବା ସହ ଲୋକଙ୍କୁ ଭୋଟଦେବା ପାଇଁ କହୁଛନ୍ତି |
ବରଗଡରୁ ରାଜେସ ସରାପ, ଇଟିଭି ଭାରତ
