ବରଗଡ: ବାଜି ସାରିଛି ବିଜେପପୁର ଉପନିର୍ବାଚନ ନିର୍ବାଚନୀ ବିଗୁଲ । ତିନି ପ୍ରମୁଖ ଦଳ ସେମାନଙ୍କ ଆଶାୟୀ ପ୍ରାର୍ଥୀଙ୍କ ନାମ ଘୋଷଣା ପରେ ଆରମ୍ଭ ହୋଇଛି ପ୍ରଚାର ଅଭିଯାନ । ଏହିକ୍ରମରେ ବିଜେପୁର ପଡାଗ୍ରାମରେ ଆୟୋଜିତ ଜନସମାବେଶରେ ଯୋଗ ଦେଇଛନ୍ତି କଂଗ୍ରେସର ବହୁ ତୁଙ୍ଗ ନେତା ।
ବିଜେପୁର ଉପନିର୍ବାଚନରେ ପ୍ରତିଦ୍ବନ୍ଦିତା କରୁଥିବା ଦଳୀୟ ପ୍ରାର୍ଥୀ ଦିଲ୍ଲୀପ ପଣ୍ଡାଙ୍କ ପ୍ରଚାର ପ୍ରସାର ପାଇଁ ଲାଗିପଡିଛି ରାଜ୍ୟ କଂଗ୍ରେସ । ଦଳ ପକ୍ଷରୁ ବିଜେପୁରର ପଡ଼ାଗ୍ରାମରେ ଜନସମାବେଶର ଆୟୋଜନ କରାଯାଇଥିଲା । ଯେଉଁଥିରେ ପିସିସି ସଭାପତି ନିରଞ୍ଜନ ପଟ୍ଟନାୟକ, ଓଡ଼ିଶା ପ୍ରଭାରୀ ଜିତେନ୍ଦ୍ର ସିଂ, ଜାତୀୟ ପ୍ରଭାରୀ ମୁସ୍ତାକ ଅଲ୍ଲୀ, କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର, କଣ୍ଟାବାଞ୍ଜି ବିଧାୟକ ସନ୍ତୋଷ ସିଂ ସାଲୁଜା, ଜଗନ୍ନାଥ ପଟ୍ଟନାୟକ , ପ୍ରଦୀପ ମାଝୀ, ପ୍ରଦୀପ ଦେବତା, ପ୍ରକାଶ ଦେବତା ପ୍ରମୁଖ ଯୋଗ ଦେଇଥିଲେ ।
ଗୁରୁବାର ଅୟୋଜିତ ହୋଇଥିବା ଜନସମାବେଶରେ ବିଜେପୁରବାସୀ ବୋକା ନୁହନ୍ତି ଯେ, ବାରମ୍ବାର ବିଜେଡ଼ି ପ୍ରତିଶୃତି ଉପରେ ପ୍ରତିଶ୍ରୁତି ଦେଇଚାଲିଥିବ ଏବଂ ଲୋକେ ବୋକା ପରି ଦେଖି ଚାଲିଥିବେ । ଏଥର ବିଜେପୁରବାସୀ ବିଜେଡ଼ିକୁ ଉଚିତ ଜବାବ ଦିଅନ୍ତୁ ବୋଲି ଦଳ ପକ୍ଷରୁ କୁହାଯାଇଛି।
ବିଜେପି ଏବଂ ବିଜେଡ଼ି ଉଭୟ ଭାଇ ଭାଇ ଓ ଟିମ B ଭାବେ କାର୍ଯ୍ୟ କରୁଥିବାବେଳେ ବିଜେପି ବିଜେଡିକୁ ବ୍ୟବହାର କରୁଛି । ବିଜେପି ଏବଂ ବିଜେପୁରବାସୀଙ୍କ ଭାବନା ଓ ସମ୍ମାନ ସହିତ ଖେଳ ଖେଳିଥିବା ଦଳକୁ ଉଚିତ ଶିକ୍ଷା ଦେବାକୁ କଂଗ୍ରେସ ପ୍ରାର୍ଥୀ ଦିଲ୍ଲୀପ ପଣ୍ଡାଙ୍କୁ ଭୋଟ ଦେବା ପାଇଁ ଜନସାଧାରଣଙ୍କୁ କଂଗ୍ରେସ ନେତୃବୃନ୍ଦ ନିବେଦନ କରିଛନ୍ତି ।
ବରଗଡରୁ ରାଜେଶ ସରାପ, ଇଟିଭି ଭାରତ
