ବରଗଡ: ଲକଡାଉନ କାରଣରୁ ନଇଁ ପଡିଛି ବରଗଡ ଚାଷୀଙ୍କ ଅଣ୍ଟା । ସେପଟେ ଗତ ଦୁଇ ଦିନ ହେଲା ଜିଲ୍ଲାର ବିଭିନ୍ନ ସ୍ଥାନରେ ଅଦିନିଆ ବର୍ଷା ଓ କୂଆପଥର ମାଡ ଯୋଗୁଁ ଧାନ ଓ ପନିପରିବା ଫସଲ ସବୁ ନଷ୍ଟ ହୋଇଯାଇଛି । ବରଗଡ ଜିଲ୍ଲାର ଭେଡେନ ବ୍ଲକ, ବରପାଲୀ, ବିଜେପୁର ଓ ପଦ୍ମପୁର ଅଞ୍ଚଳରେ ପ୍ରବଳ କୁଆପଥର ମାଡ ଯୋଗୁଁ ଚାଷୀଙ୍କ ଫସଲ ନଷ୍ଟ ହୋଇଯାଇଥିବା ଅଭିଯୋଗ ହୋଇଛି ।
କୁଆପଥର ମାଡରେ କେଉଁଠି ଧାନ ଝଡି ତଳେ ପଡିଛି ତ ଆଉ କେଉଁଠି ଲଙ୍କା, ଟମାଟୋ, କୋବି ଓ ମୂଳା ଏପରି ବହୁ ପରିବା ମଧ୍ୟ ପଚି ନଷ୍ଟ ହୋଇଗଲାଣି । ବର୍ତ୍ତମାନ ସମୟରେ ଚାଷୀ ତା’ର ବିଲକୁ ମଧ୍ୟ ସଜାଡିବା ପାଇଁ ମଜୁରିଆ ପାଇ ପାରୁନଥିବା ବେଳେ ବିଭିନ୍ନ ପୋକ ଜୋକ ଲାଗି ଫସଲ ନଷ୍ଟ ହେବାକୁ ବସିଥିଲା । କିନ୍ତୁ ଅଦିନିଆ ବର୍ଷା ସହିତ କୁଆପଥର ମାଡ ଏବେ ଚାଷୀ ପାଇଁ ଚିନ୍ତାର କାରଣ ପାଲଟିଛି ।
କୋରୋନା ମହାମାରୀ ଯୋଗୁଁ ସରକାରୀକଳ ଯୁଦ୍ଧକାଳୀନ ଭିତ୍ତିରେ ଲୋକଙ୍କ ପାଇଁ ବ୍ୟସ୍ତ ରହିଥିବା ବେଳେ ବର୍ତ୍ତମାନ ସମୟରେ ଚାଷୀଙ୍କ ଅବସ୍ଥା ବୁଝିବାକୁ କେହି ନାହାନ୍ତି । ତେବେ ବରଗଡ ଜିଲ୍ଲାର ଚାଷୀଙ୍କ ପାଇଁ ଏବେ ଭଗବାନ ହିଁ ସାହା ଭରସା ।
ବରଗଡରୁ ରାଜେଶ ସରାପ, ଇଟିଭି ଭାରତ
