ବରଗଡ଼: ଜଣେ ନାବାଳିକାଙ୍କୁ ଦୁଷ୍କର୍ମ ଉଦ୍ୟମ ଅଭିଯୋଗରେ ବରଗଡ଼ ଜିଲ୍ଲା ସୋହେଲା ଥାନା ଏଏସଆଇ ବନମାଳି କୁଅଁରଙ୍କୁ ନିଲମ୍ବିତ କରାଯାଇଛି । ଗତକାଲି ଏ ଅଭିଯୋଗ ଆସିବା ପରେ ସମ୍ପୃକ୍ତ ପୋଲିସଙ୍କୁ ଗିରଫ କରିବା ସହ ବରଗଡ ଏସପି ମୁକେଶ କୁମାର ଭାମୋ ତାଙ୍କୁ ନିଲମ୍ବିତ କରିଛନ୍ତି ।
ଝିଅ ସହ ଦୁଷ୍କର୍ମ ହୋଇଥିବାର ଜାଣିବା ପରେ ଅଭିଭାବକ ସମ୍ପୃକ୍ତ ଯୁବକ କୈବଲ୍ୟ ଏବଂ ପୋଲିସ ଏଏସଆଇଙ୍କ ନାଁରେ ସୋହେଲା ଥାନାରେ ଏତଲା ଦିଆଯାଇଥିଲା । ମାମଲା ରୁଜୁ ହେବାପରେ ଆଜି ସୋହେଲା ପୋଲିସ କୈବଲ୍ୟ ନାଗକୁ ଗିରଫ କରିବା ସହ ନିଲମ୍ବିତ କରାଯାଇଛି । ଉଭୟଙ୍କୁ ଡାକ୍ତରୀମାଇନା କରାଯିବା ପରେ କୋର୍ଟକୁ ଚାଲାଣ କରାଯିବ ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି ।
ସେପଟେ, ସ୍ଥାନୀୟ ଲୋକଙ୍କ କହିବା ଅନୁସାରେ ପୋଲିସ ଏଏସଆଇ ବନମାଲି କୁଅଁର ରୀତିମତ ଭାବରେ ଏପରି କାର୍ଯ୍ୟରେ ଜଡ଼ିତ ରହୁଥିଲେ । ହେଲେ ସେ ପୋଲିସ ହୋଇଥିବାରୁ ଭୟରେ କେହି ପାଟି ଖୋଳୁନଥିବା ଜଣାଇଛନ୍ତି । ଅଭିଯୁକ୍ତ ପୋଲିସ ଏଏସଆଇ ବନମାଲି କୁଅଁରଙ୍କ ପରିବାର ବରଗଡ଼ ଜିଲ୍ଲା ଭେଡେନରେ ଏକ ଭଡ଼ା ଘରେ ରହୁଥିବା ବେଳେ ବନମାଲି କୁଅଁର ସୋହେଲା ଥାନାର ଏକ କ୍ୱାର୍ଟରରେ ରହୁଥିବା ସତ୍ତ୍ୱେ କାହିଁକି ଅନ୍ୟ ଏକ ଘର ଭଡ଼ାରେ ନେଇଥିଲେ ?
କେଉଁ ଉଦ୍ଦେଶ୍ୟରେ ଆଉ ଏକ ଘର ଭଡ଼ାରେ ନେଇଥିଲେ ? ସେ କଣ କରୁଥିଲେ ଏହି ଭଡ଼ା ଘର ଭିତରେ ? ନିଜର ଯୌନ ଲାଳସା ମେଣ୍ଟାଇବା ପାଇଁ ଏହି ଭଡ଼ା ଘରକୁ ବ୍ୟବହାର କରୁଥିଲେ କି ? ଏପରି ବହୁ ପ୍ରଶ୍ନ ପୋଲିସ ବାବୁଙ୍କ କାର୍ଯ୍ୟକଳାପ ଓ ଚରିତ୍ର ଉପରେ ସନ୍ଦେହ ସୃଷ୍ଟି କରିଛି ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
