ବରଗଡ: ଆସନ୍ତା ଡିସେମ୍ବର 31ରେ ଅନୁଷ୍ଠିତ ହେବ ବିଶ୍ବପ୍ରସିଦ୍ଧ ବରଗଡ ଧନୁଯାତ୍ରା । ଚଳିତବର୍ଷ ଧନୁଯାତ୍ରା ପାଇଁ କଂସ, ମନ୍ତ୍ରୀ, ସେନାପତି ସମେତ ଅନ୍ୟ କିଛି ମୁଖ୍ୟ ଚରିତ୍ର ପାଇଁ କଳାକାର ଚୟନ ନିଷ୍ପତ୍ତି ନେଇଛି କମିଟି । ଯାହାକୁ ବିରୋଧ କରିଛନ୍ତି ପଶ୍ଚିମ ଓଡିଶା ଧନୁଯାତ୍ରା କଳାକାର ସଂଘ।
ଧନୁଯାତ୍ରାର ମୁଖ୍ୟ ଆକର୍ଷଣ କଂସ ହୋଇଥିବାବେଳେ ଗତବର୍ଷ କଂସ ଭୂମିକାରେ ନିମ୍ନମାନର ଅଭିନୟକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ବଢି ଚାଲିଥିଲା । ଯାହାକୁ ନେଇ ଧନୁଯାତ୍ରା କମିଟି ପକ୍ଷରୁ କଂସ ଭୂମିକା ସହିତ ଅନ୍ୟ ଭୂମିକାରେ ଥିବା କଳାକାରଙ୍କ ଚୟନ କରି ନୂତନ ପ୍ରତିଭାଙ୍କୁ ମଧ୍ୟ ସୁଯୋଗ ଦେବା ଉଦ୍ଦେଶ୍ୟରେ କମିଟି ଏହି ନିଷ୍ପତ୍ତି ନେଇଥିଲା।
ଗତ ଦୁଇ ବର୍ଷ ହେବ ଭୁବନେଶ୍ବର ପ୍ରଧାନ କଂସ ଭୂମିକାରେ ଅଭିନୟ କରିଆସୁଥିଲେ । ତେବେ ତାଙ୍କର ଅଭିନୟକୁ ନେଇ ଦର୍ଶକଙ୍କ ମଧ୍ୟରେ ନାନା ଚର୍ଚ୍ଚା ହୋଇଥିଲା । ବିଶ୍ଵ ଦରବାରରେ ନିମ୍ନ ମାନର ଅଭିନୟକୁ ହଜମ କରିପାରିନଥିଲେ ଦର୍ଶକ । ଯାହା ଧନୁଯାତ୍ରା କମିଟି ମଧ୍ୟ ଅନୁଭବ କରିଥିଲା ଏବଂ ଲୋକଙ୍କ କଟାକ୍ଷ ମଧ୍ୟ ଶୁଣିବାକୁ ପଡିଥିଲା।
ଧନୁଯାତ୍ରାରେ ଅଭିନୟ କରିବାକୁ ଇଚ୍ଛୁକ ଥିବା କଳାକାର ନିଜ ନିଜର ରେଜିଷ୍ଟ୍ରେସନ ନଭେମ୍ବର ୧୬ ତାରିଖ ଭିତରେ କରିବେ । ନଭେମ୍ବର ୨୦ରୁ ୨୫ ତାରିଖରେ କଳାକାର ଚୟନ ପ୍ରକ୍ରିୟା ଆରମ୍ଭ କରାଯିବାର ଘୋଷଣା କରାଯିବ । ତେବେ ନୂତନ କଂସକୁ ନେଇ ଗୋଟିଏ ପ୍ରକାର ରାଜନୀତି ଆରମ୍ଭ ହୋଇଯାଇଛି । ଭୁବନେଶ୍ବର ପ୍ରଧାନଙ୍କ କଂସ ଭୂମିକାକୁ ଦୁଇବର୍ଷ ହୋଇଥିବା ବେଳେ କେଉଁ ଆଧାରରେ ତିନି ବର୍ଷ ପୂର୍ବରୁ ନୂତନ କଳାକାର ଚୟନ କରାଯାଉଛି ବୋଲି ଅଭିଯୋଗ ଆଣିଛନ୍ତି ଭୁବନେଶ୍ବରଙ୍କ ସମର୍ଥକ।
ବରଗଡରୁ ରାଜେଶ ସରାପ, ଇଟିଭି ଭାରତ
