ବରଗଡ: ଗଛ ନଲଗାଇ ସୌନ୍ଦର୍ଯ୍ୟକରଣରେ ଲାଗିଛି ଅଶୋକା ବିଲିକାନ କମ୍ପାନୀ । ଜିଲ୍ଲାରେ 4 ଲେନ ବିଶିଷ୍ଟ ରାସ୍ତା ନିର୍ମାଣ ପୂର୍ବରୁ ସରକାରଙ୍କ ସହିତ ଅଶୋକା ବିଲିକାନ କମ୍ପାନୀର ରହିଥିଲା ଚୁକ୍ତି । ରାସ୍ତା କଡରେ ରହିଥିବା ଯେତେ ଗଛ କଟାଯିବ ତାର 10 ଗୁଣା ଅଧିକ ଗଛ ରାସ୍ତାର ଉଭୟ ପାର୍ଶ୍ଵରେ ଲଗାଇବାକୁ ପଡିବ ବୋଲି ରହିଥିଲା ନିୟମ । କେବଳ ସେତିକି ନୁହେଁ ସମସ୍ତ ଗଛର ରକ୍ଷଣା ବେଷଣର ଦାୟିତ୍ଵ ମଧ୍ୟ ରହିଥିଲା ରାସ୍ତା ନିର୍ମାଣକାରୀ ଅଶୋକା ବିଲିକନ କମ୍ପାନୀ ଉପରେ । ହେଲେ ସରକାରଙ୍କ ସମସ୍ତ ନିୟମକୁ ଉଲଂଘନ କରି ମନମୁଖୀ ନୀତି କରି ଚାଲିଛି କମ୍ପାନୀ ।
ସୂଚନା ଅନୁଯାୟୀ ଜିଲ୍ଲାର 4 ଲେନ ବିଶିଷ୍ଟ ରାସ୍ତା ନିର୍ମାଣ ସମୟରେ ଯେତେ ସଂଖ୍ୟାରେ ରାସ୍ତା ଉଭୟ ପାର୍ଶ୍ଵରେ ବଡ ବଡ ଗଛ ସବୁ କଟାଗଲା, ନିୟମ ଅନୁଯାୟୀ ତାର 10 ଗୁଣା ଗଛ ଲଗାଇଲା ନାହିଁ ଅଶୋକା ବିଲିକନ କମ୍ପାନୀ । କେବଳ ସେତିକି ନୁହେଁ ଯାହା ଗଛ ଲଗାଗଲା ଯତ୍ନ ଅଭାବରୁ ଅଧିକାଂଶ ଗଛ ସବୁ ମରିଗଲା । ତେବେ କେବଳ ଲୋକ ଦେଖାଣିଆକୁ ଟାଉନ ଭିତରେ ରହିଥିବା 4 ଲେନ ରୋଡ ମଝିର କନିଅର ଗଛକୁ ଯତ୍ନ ନେଉଛି କମ୍ପାନୀ । ଗଛ ମଝିରେ ରହିଥିବା ଅନାବନା ଗଛଗୁଡିକୁ ମେସିନ ସାହାଯ୍ୟରେ ଉପାଡି ଗଛମାନଙ୍କର ଯତ୍ନ ନିଆଯାଉଥିବା ଅଭିନୟ କରୁଛି କମ୍ପାନୀ । ତେବେ ବରଗଡବାସୀଙ୍କ ଦାବି ଯେ ଶୀଘ୍ର ଅଶୋକା କମ୍ପାନୀ ନିୟମ ଅନୁଯାୟୀ ଗଛ ସବୁ ରୋପଣ କରି ତାର ଯତ୍ନ ମଧ୍ୟ ନେଉ ।
ବରଗଡରୁ ରାଜେଶ ସରାପ, ଇଟିଭି ଭାରତ
