ବରଗଡ଼: ବରଗଡ଼ ଗାନ୍ଧୀ ଛକ ଠାରେ ଆଜି(ମଙ୍ଗଳବାର) ସକାଳ ଆମରଣ ଅନଶନରେ ବସିଲେ ବରଗଡର ସଂକଳ୍ପ ପରିବାର ଏବଂ ପଶ୍ଚିମ ଓଡ଼ିଶା ଯୁବା ମଞ୍ଚର ସମସ୍ତ ସଦସ୍ୟ । ବରଗଡ କୋଭିଡ ହସ୍ପିଟାଲରେ ରୋଗୀଙ୍କ ଚିକିତ୍ସାରେ ହେଉଥିବା ଅବ୍ୟବସ୍ଥାକୁ ବିରୋଧ କରି ଏହି ଆମରଣ ଅନଶନ ଜାରି ରହିଥିବାବେଳେ ସମସ୍ତ ରାଜନୈତିକ ଦଳ ତଥା ଅନେକ ସମାଜସେବୀ ସଂଗଠନ ଏହାକୁ ସମର୍ଥନ ଜଣାଇ ଏହି ଆନ୍ଦୋଳନରେ ସାମିଲ ହୋଇଛନ୍ତି ।
କୋରୋନା ମହାମାରୀ ସମୟରେ ଗତବର୍ଷରୁ ସ୍ୱେଚ୍ଛାସେବୀ ସଂଗଠନ ସଂକଳ୍ପ ପରିବାର ଏବଂ ପଶ୍ଚିମ ଓଡିଶା ଯୁବା ମଞ୍ଚର ସଦସ୍ୟମାନେ ନିଜ ଜୀବନକୁ ବାଜିରେ ଲଗାଇ କୋରୋନା ସଂକ୍ରମିତଙ୍କୁ ସାହାଯ୍ୟ କରିବା ସହିତ କୋଭିଡ଼ ମୃତଦେହ ମଧ୍ୟ ସତ୍କାର କରିଆସୁଛନ୍ତି ।
ମାତ୍ର ଚଳିତ ବର୍ଷ କୋଭିଡ଼ର ଦ୍ଵିତୀୟ ଲହରୀରେ ବରଗଡ ଜିଲ୍ଲାର ସ୍ୱାସ୍ଥ୍ୟବସ୍ଥା ସମ୍ପୂର୍ଣ୍ଣ ଭୁଶୁଡି ପଡିଥିବାବେଳେ କୋଭିଡ଼ ହସ୍ପିଟାଲରେ ଚିକିତ୍ସାର ବ୍ୟାପକ ଅବହେଳା କାରଣରୁ ଜିଲ୍ଲାର ବହୁ ରୋଗୀଙ୍କ ମୃତ୍ୟୁ ହେଉଛି ।
ତେବେ କୋଭିଡ଼ ହସ୍ପିଟାଲର ପ୍ରମୁଖ ୧୦ଗୋଟି ସମସ୍ୟାର ସମାଧାନ ନିମନ୍ତେ ବରଗଡ଼ ଗାନ୍ଧିଛକ ଠାରେ ଆମରଣ ଅନଶନରେ ବସିଛନ୍ତି ଏହି ସ୍ୱେଚ୍ଛାସେବୀ ସଙ୍ଗଠନମାନେ । ତେଣୁ ଯେ ପର୍ଯ୍ୟନ୍ତ ଜିଲ୍ଲା ସମସ୍ୟାର ସମାଧାନ ନ ହେଉଛି, ସେ ପର୍ଯ୍ୟନ୍ତ ଏହି ଆମରଣ ଅନଶନ ଜାରି ରହିବ ବୋଲି ଚେତାବନୀ ଦେଇଛନ୍ତି ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
