ବରଗଡ଼: ବରପାଲି ଥାନା ଅନ୍ତର୍ଗତ କୁମ୍ଭାରୀ ଗାଁରେ ବଜ୍ରାଘତ ଯୋଗୁଁ ଜଣେ ନାବାଳକର ମୃତ୍ୟୁ ହୋଇଛି । ମୃତ ନାବାଳକ ଜଣକ ବିରଞ୍ଚି ବେହେରାଙ୍କ 15 ବର୍ଷର ପୁଅ ପିଙ୍କୁ ବେହେରା ବୋଲି ଜଣା ପଡିଛି । ପିଙ୍କୁ ଗାଁ ପୋଖରୀକୁ ଶୌଚ ହେବା ପାଇଁ ଯାଇଥିବା ସମୟରେ ବଜ୍ରପାତ ହୋଇଥିଲା । ତାଙ୍କୁ ଉଦ୍ଧାର କରି ବରପାଲି ଡାକ୍ତରଖାନାକୁ ନିଆଯାଇଥିବା ବେଳେ ସେଠାରେ ଡାକ୍ତର ମୃତ ଘୋଷଣା କରିଥିଲେ ।
ପରିବାର ଲୋକଙ୍କ କହିବା ଅନୁସାରେ ପିଙ୍କୁ ଅପରାହ୍ନ ୨ଟାରେ ଗାଁର ବଡ଼ବନ୍ଧକୁ ଶୌଚ ପାଇଁ ଯାଇଥିଲେ । ହଠାତ ପ୍ରବଳ ବର୍ଷା ହେବା ସାଙ୍ଗକୁ ବଜ୍ରପାତ ହୋଇଥିଲା । ତେବେ ବର୍ଷା ଛାଡିବା ପରେ ବନ୍ଧ କଡ଼ରେ ପିଙ୍କୁ ପଡିଥିବାର ଦେଖି ଅନ୍ୟ ପିଲାମାନେ ଘର ଲୋକକୁ ଖବର ଦେଇଥିଲେ । ଖବର ପାଇ ପରିବାର ଲୋକେ ଘଟଣା ସ୍ଥଳକୁ ଯାଇ ପିଙ୍କୁଙ୍କୁ ସଙ୍ଗେ ସଙ୍ଗେ ବରପାଲି ହସ୍ପିଟାଲକୁ ନେଇଥିଲେସୁଦ୍ଧା ସେଠାରେ ତାଙ୍କର ମୃତ୍ୟୁ ହୋଇଯାଇଛି ।
ଖବର ପାଇ ବରପାଲି ପୋଲିସ ଓ ତହସିଲଦାର କ୍ଷୀରୋଦ ବାଗ ପହଞ୍ଚବା ସହ ଘଟଣାକୁ ତଦାରଖ କରି ସରକାରୀ ସାହାଯ୍ୟ ପାଇଁ ପ୍ରତିଶୃତି ଦେଇଛନ୍ତି । ପିଙ୍କୁଙ୍କ ମୃତଦେହ ବ୍ୟବଛେଦ ପାଇଁ ବରଗଡ ଡାକ୍ତରଖାନାକୁ ପଠାଯାଇଥିବା ଜଣାପଡିଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
