ବାଲେଶ୍ଵର : ବାଲେଶ୍ଵର ସଦର ବ୍ଲକ ପରିଖୀ ପଞ୍ଚାୟତ ତେଲଗଡ଼ିଆ ମିନି ଅଙ୍ଗନବାଡ଼ି କେନ୍ଦ୍ରର ନୂତନ ଗୃହ ନିର୍ମାଣ କାର୍ଯ୍ୟକୁ ବିରୋଧ କରିଛନ୍ତି ଗ୍ରାମବାସୀ । ଏନେଇ ଜିଲ୍ଲାପାଳଙ୍କ ନିକଟରେ ପାଖରେ ଫେରାଦ ହୋଇଛନ୍ତି । ସୂଚନା ଅନୁସାରେ, ତେଲଗଡ଼ିଆ ମିନି ଅଙ୍ଗନବାଡ଼ି କେନ୍ଦ୍ରର ନୂତନ ଗୃହ ନିର୍ମାଣ ପାଇଁ ଅର୍ଥ ମଞ୍ଜୁର ହୋଇଥିଲା । ହେଲେ ଏ ସମ୍ପର୍କରେ କୌଣସି ଗ୍ରାମବାସୀଙ୍କ ମତ ନନେଇ ସମ୍ପୃକ୍ତ ଠିକାଦାର କେନ୍ଦ୍ର ଠାରୁ ପ୍ରାୟ ୩ କିଲୋମିଟର ଦୂରରେ ଅଙ୍ଗନବାଡ଼ି କେନ୍ଦ୍ରର ନୂତନ ଗୃହ ନିର୍ମାଣ କରୁଛନ୍ତି । ଯାହାକୁ ନେଇ ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତାେଷ ଦେଖାଦେଇଛି ।
କାରଣ ଉକ୍ତ ସ୍ଥାନ ଠାରୁ ୩ କିଲୋମିଟର ଦୂରରେ ଅଙ୍ଗନବାଡ଼ି କେନ୍ଦ୍ରର ନୂତନ ଗୃହ ନିର୍ମାଣ ହେଲେ କୁନିକୁନି ପିଲା ଓ ଗର୍ଭବତୀମାନେ ଉକ୍ତ କେନ୍ଦ୍ରକୁ ଯିବା ପାଇଁ ନାନା ଅସୁବିଧା ଭୋଗିବେ। କେନ୍ଦ୍ରର ନୂତନ ଗୃହ ନିର୍ମାଣ ପାଇଁ ସଠିକ ସ୍ଥାନ ନିରୂପଣ କରାନଯାଇ ମନଇଚ୍ଛା ଗୃହ ନିର୍ମାଣ କରାଯାଉଥିବାରୁ ଅସନ୍ତୋଷ ପ୍ରକାଶ ପାଇଛି । ଏନେଇ ଉଚିତ ତଦନ୍ତ କରାଯାଇ ସାମୂହିକ ସ୍ୱାର୍ଥକୁ ଦୃଷ୍ଟିରେ ରଖି ସଠିକ ସ୍ଥାନରେ ଗୃହ ନିର୍ମାଣ ପାଇଁ ଜିଲ୍ଲାପାଳଙ୍କ ଠାରେ ଦାବି ହୋଇଛି ।
ଇଟିଭି ଭାରତ, ବାଲେଶ୍ବର
