ବାଲେଶ୍ୱର: ଜିଲ୍ଲାରେ ବୁଧବାର କାଳବୈଶାଖୀ ବର୍ଷା ସହ ପ୍ରବଳ ଘଡଘଡି ମାରିଥିଲା । ବଜ୍ରାଘାତରେ 2 ଜଣଙ୍କର ମୃତ୍ୟୁ ହୋଇଥିବା ବେଳେ 3 ଜଣ ଆହତ ହୋଇଥିବା ଜଣାପଡିଛି । ମୃତକ ହେଲେ ସିଙ୍ଗଲା ଥାନା ଅଧିନସ୍ଥ ରାଣେଶ୍ୱରପୁର ଡିହଚକ ସାର୍ଥା ଅଞ୍ଚଳର ବାସୁଦେବ ସିଂ ଓ ବାବୁରାମ ଜେନା ।
ସୂଚନାଅନୁସାରେ, ସିବାବୁରାମ ଓ ବାସୁଦେବ ଚିଙ୍ଗୁଡ଼ି ଘେରିରେ ଡିଜେଲ ମେସିନ ସଜାଡ଼ିବାକୁ ଯାଇଥିଲେ । ବାବୁରାମ ଜଣେ ମେକାନିକ ହୋଇଥିବା ବେଳେ ବାସୁଦେବ ହେଲ୍ପର ଭାବେ କାମ କରୁଥିଲେ । ଚିଙ୍ଗୁଡ଼ିଘେରିରୁ ମେସିନ ସଜାଡି ଆସିବା ବେଳକୁ କାଳବୈଶାଖୀ ଆରମ୍ଭ ହୋଇଯାଇଥିଲା । ସେଠାରେ ଥିବା ଏକ କୁଡ଼ିଆରେ ଅନ୍ୟ 3 ଜଣଙ୍କ ସହ ବାବୁରାମ ଓ ବାସୁଦେବ ଆଶ୍ରୟ ନେଇଥିଲେ।
ଏହି ସମୟରେ ବଜ୍ରପାତ ହେବାରୁ ଅନ୍ୟ 3 ଜଣଙ୍କ ଚେତା ଉଡିଯାଇଥିଲା । ବାସୁଦେବ ଓ ବାବୁରାମଙ୍କର ହିଁ ଘଟଣାସ୍ଥଳରେ ମୃତ୍ୟୁ ହୋଇଥିଲା । ତେବେ ସମସ୍ତଙ୍କୁ ବାଲେଶ୍ୱର ମେଡିକାଲ ଅଣାଯାଇଥିଲେ ହେଁ ସେଠାରେ ଡାକ୍ତର ବାସୁଦେବ ଓ ବାବୁରାମଙ୍କୁ ମୃତ ଘୋଷଣା କରିଥିଲେ । ଅନ୍ୟ 3 ଜଣର ଚିକିତ୍ସା ଏବେ ଜାରି ରହିଛି ।
ବାଲେଶ୍ୱରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
