ବାଲେଶ୍ବର: ଶନିବାର ସକାଳେ ଜିଲ୍ଲା ଜଳେଶ୍ବରରେ ଘଟିଛି ଏକ ଅଭାବନୀୟ ଘଟଣା । ଗୋଟିଏ ପରିତ୍ୟକ୍ତ ବସ୍ତା ଭିତରୁ ଜଣେ କ୍ଷତାକ୍ତ ଯୁବକଙ୍କୁ ଉଦ୍ଧାର କରାଯାଇଛି । ଉଦ୍ଧାର ଯୁବକ ଜଣେ ହେଲେ 17 ନମ୍ବର ଓ୍ବାର୍ଡ, ଅଲାଲପୁର ଗ୍ରାମର ଭାନୁ ହେମ୍ବ୍ରମ ।
ବସ୍ତା ଭାନୁଙ୍କୁ ଉଦ୍ଧାର ପରେ ଜଳେଶ୍ବର ଅଞ୍ଚଳରେ ଆତଙ୍କ ଖୋଳିଯାଇଛି । କାରଣ ବସ୍ତାଟି ଆଉ କେଉଁଠୁ ନୁହେଁ ଖୋଦ୍ ଭାନୁଙ୍କ ଘର ଆଗରୁ ଉଦ୍ଧାର କରାଯାଇଛି । ପରିବାର ଲୋକଙ୍କ କହିବାନୁସାରେ, ଶୁକ୍ରବାର ରାତିରେ ସବୁଦିନ ପରି ସେ ବିଲକୁ ପାଣି ମଡେଇବାକୁ ଯାଇଥିଲେ । କିନ୍ତୁ ସେ ପାହାନ୍ତିଆ ପର୍ଯ୍ୟନ୍ତ ଘରକୁ ଫରିନଥିଲେ ।
ତେବେ ସକାଳ2ଟାରେ ଦୁଇଟି ବାଇକ୍ ଯୋଗେ କେତେକ ଦୁର୍ବୃତ ଏକ ବସ୍ତା ଆଣି ଭାନୁଙ୍କ ଘର ଆଗରେ ଫୋପାଡି ଦେଇ ଚାଲିଯାଇଥିଲେ । ଆଉ ବସ୍ତାଟି ଖୋଲିବା ମାତ୍ରେ ସେଥିରୁ ନିଖୋଜ ଭାନୁ କ୍ଷତାକ୍ତ ଅବସ୍ତାରେ ବାହାରିଥିଲେ । ପରେ ପରିବାର ଲୋକ ତାଙ୍କୁ ଗୁରୁତର ଅବସ୍ଥାରେ ସ୍ଥାନୀୟ ମେଡିକାଲରେ ଭର୍ତ୍ତି କରିଥିଲେ । କିନ୍ତୁ ସେଠାରେ ତାଙ୍କର ଅବସ୍ଥା ସଙ୍କଟାପନ୍ନ ହେବାରୁ ବାଲେଶ୍ବର ଜିଲ୍ଲା ହସ୍ପିଟାଲକୁ ସ୍ଥାନାନ୍ତର କରାଯାଇଛି ।
କିଏ ଏବଂ କାହିଁକି ଭାନୁଙ୍କୁ ମରଣାନ୍ତକ ଆକ୍ରମଣ କରିଛନ୍ତି ତାହା ସ୍ପଷ୍ଟ ହୋଇନାହିଁ । ତେବେ ତଙ୍କୁ ପୂର୍ବ ଶତ୍ରୁତାକୁ କେନ୍ଦ୍ର କରି ଆକ୍ରମଣ କରାଯାଇଥିବା ଅନୁମାନ କରାଯାଉଛି । ସେପଟେ ଏହି ଘଟଣାରେ ଥାନାରେ କୌଣସି ଅଭିଯୋଗ ହୋଇ ନଥିବା ସୂଚନା ମିଳିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
