ବାଲେଶ୍ବର: ଲକଡାଉନ ଯୋଗୁଁ ଲୋକେ ଚାରିଆଡେ ଫସିରହିଥିବାବେଳେ ନିଜ ଲୋକଙ୍କଠାରୁ ଦୂରରେ ରହିଛନ୍ତି ସମସ୍ତେ । ଏପରି ସମୟରେ ଆପଣା ଲୋକର ମୃତ୍ୟୁ ଦେଇଥାଏ ଅନେକ ଦୁଃଖ । ହେଲେ ପ୍ରାଣ ହରାଇଥିବା ବ୍ୟକ୍ତିଟି ଯଦି ପୁଅ ହୋଇଥାଏ ତେବେ ବାପା ଓ ମାଆଙ୍କ ହୃଦୟ ଭାଙ୍ଗିଯାଇଥାଏ ।
ଏପରି ଏକ ଦୁଃଖଦ ଘଟଣା ଘଟିଛି ବାଲେଶ୍ବରର ଖଇରା ବ୍ଲକ ଚନ୍ଦରାଟିକରି ଗ୍ରାମରେ । ଯେଉଁଠି ପୋଖରୀରେ ବୁଡି ପ୍ରାଣ ହରାଇଛି ପୁଅ । ଆଉ ଲକଡାଉନ ଯୋଗୁଁ ଶେଷ ଦର୍ଶନ ବି କରିପାରିନାହାନ୍ତି ବାପା ଓ ମାଆ । ସୂଚନା ଅନୁସାରେ ଗ୍ରାମର ପ୍ରତାପ ମହାନ୍ତି ଓ ତାଙ୍କ ସ୍ତ୍ରୀ ମୁମ୍ବାଇରେ ରୁହନ୍ତି । ନିଜ 8 ବର୍ଷର ପୁଅକୁ ମାମୁଁ ଘର ଡିମିରିଚୁଆ ଅଞ୍ଚଳରେ ପଢିବା ପାଇଁ ଛାଡି ଯାଇଥିଲେ ।
ମାମୁଁ ଘରେ ଥିବାବେଳେ ପୁଅଟି ଅସାବଧାନତାବଶତଃ ପୋଖରୀରେ ପଡିଯାଇଥିଲା । ବହୁ ଖୋଜାଖୋଜି କରିବା ପରେ ପୁଅଟିକୁ ପାଣିରୁ ଉଦ୍ଧାର କରି ଖଇରା ମେଡିକାଲ ନେଇଥିଲେ ମାମୁଁ ଘର । ହେଲେ ସେଠାରେ ଡାକ୍ତର ପୁଅଟିକୁ ମୃତ ଘୋଷଣା କରିଥିଲେ । କୋରୋନା ପାଇଁ ଲକଡାଉନ ଯୋଗୁଁ ମୁମ୍ବାଇରୁ ବାପା-ମାଆ ପୁଅକୁ ଶେଷଥର ପାଇଁ ଦେଖିବାର ସୁଯୋଗ ହରାଇ ଅସହାୟ ହୋଇପଡିଛନ୍ତି ।
ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ
