ବାଲେଶ୍ବର: ଅଲୋଡା ହେଉଛି କନ୍ୟା ରତ୍ନ । ବାଲେଶ୍ବର ଜିଲ୍ଲା ନୀଳଗିରି ଅଞ୍ଚଳରେ ଏକ ନବଜାତକକୁ କେହି ଜଣେ ପିଣ୍ଢାରେ ଶୁଆଇ ଚାଲିଯାଇଥିବା ଜଣାପଡ଼ିଛି । ପରେ ଉକ୍ତ ପରିବାର ପକ୍ଷରୁ ଶିଶୁକୁ ଉଦ୍ଧାର କରାଯାଇ ମେଡିକାଲରେ ଭର୍ତ୍ତି କରାଯାଇଥିବା ସୂଚନା ମିଳିଛି ।
ନୀଳଗିରି ଥାନା ମହିସାପଟା ପଞ୍ଚାୟତର ଶାଳବଣି ଗ୍ରାମରେ ଆରତୀ ସିଂଙ୍କ ନାମକ ଜଣେ ମହିଳାଙ୍କ ଘରେ କେହି ଜଣେ ନିର୍ଦ୍ଦୟ ବ୍ୟକ୍ତି ଶିଶୁକନ୍ୟାକୁ ଛାଡି ଚାଲିଯାଇଥିଲା । ପରେ ଶିଶୁର କାନ୍ଦିବା ଶୁଣି ଆରତୀଙ୍କ ପରିବାର ଲୋକେ ଶିଶୁକୁ ଉଦ୍ଧାର କରିଥିଲେ ।
ଭିଡିଓ ସୌଜନ୍ୟ:ସମ୍ବାଦଦାତା, ବାଲେଶ୍ୱର
ଏନେଇ ଗ୍ରାମବାସୀଙ୍କୁ ଜଣାଇବା ପରେ ଗ୍ରାମବାସୀ ଚାଇଲ୍ଡ ଲାଇନ ସଦସ୍ୟଙ୍କୁ ଫୋନ କରିଥିଲେ ହେଁ କେହି ଫୋନ ଉଠାଇ ନଥିଲେ । ତେବେ ବୁଧବାର ରାତିରେ ଶିଶୁଟି ଆରତୀଙ୍କ ପାଖରେ ରହିଥିଲା । ପରେ ଗ୍ରାମବାସୀଙ୍କ ସହଯୋଗରେ ଆଜି ସକାଳେ ବାଲେଶ୍ଵର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇ ଶିଶୁର ଚିକିତ୍ସା କରାଯାଉଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
