ବାଲେଶ୍ବର: ପୋଲିସ କବଜାରେ କୁଖ୍ୟାତ ଅପରାଧୀ ଇଶ୍ବର । ବିଭିନ୍ନ ଡକାୟତି ଓ ବଡ଼ ବଡ଼ ଅପରାଧୀକ ମାମଲାରେ ସଂପୃକ୍ତ ଥିବା ଇଶ୍ବରକୁ ଗରିଫ କରିବାରେ ସଫଳ ହୋଇଛି ପୋଲିସ । ବାଲେଶ୍ବର ତଥା ରାଜ୍ୟର ବିଭିନ୍ନ ସ୍ଥାନରେ ନିଜର କାୟା ବିସ୍ତାର କରିଥିଲା ଇଶ୍ବର ମହାଳିକ । ଏନେଇ ରେମୁଣା ପୋଲିସ ଏକ ସାମ୍ବାଦିକ ସମ୍ମିଳନୀ ଜରିଆରେ ଅପରାଧୀର ପେଡି ଖୋଲିଛି ।
ସୋମବାର ବିଳମ୍ବିତ ରାତିରେ ପୋଲିସ ପାଟ୍ରୋଲିଂ ବେଳେ ଜଗନ୍ନାଥପୁର ପୋଲରେ କିଛି ଦୁର୍ବୃତ୍ତ ଡକାୟତି ଯୋଜନା କରୁଥିବା ପୋଲିସ ଖବର ପାଇଥିଲା । ସେଠାରେ ପୋଲିସ ପହଞ୍ଚି ଇଶ୍ବର ମହାଳିକ ଓ ମିଟୁ ସିଂ ଙ୍କୁ ଗିରଫ କରିଥିଲା। ଅନ୍ୟ 3 ଜଣ ପୋଲିସ ହାତରୁ ଖସି ପଳାଇବାରେ ସକ୍ଷମ ହୋଇଥିଲେ। ଗିରଫ ଇଶ୍ବର ମହାଳିକ ନାମରେ 25ରୁ ଊର୍ଦ୍ଧ୍ଵ ମାମଲା ରହିଥିବା ଜଣାପଡିଛି ।
ଠକେଇ, ରାହାଜାନି, ଡ଼କାୟତି, ବାଇକ ଲୁଟ ଭଳି ବିଭିନ୍ନ ଅପରାଧିକ ମାମଲା ଓଡ଼ିଶାର ବିଭିନ୍ନ ଥାନାରେ ରହିଥିବା ଜଣାପଡିଛି। ତେବେ ରେମୁଣା ଆଇଆଇସି ଶୁଭ୍ରାଂଶୁ ଶେଖର ନାୟକଙ୍କ ନେତୃତ୍ବରେ ଟିମ ଗଠନ କରାଯାଇ ଅନ୍ୟ ଅଭିଯୁକ୍ତମାନଙ୍କୁ ଧରାଯିବ ବୋଲି ସୂଚନା ଦିଆଯାଇଛି।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
