ବାଲେଶ୍ବର: ରେମୁଣା ବ୍ୟାଙ୍କ ଅଫ ଇଣ୍ଡିଆରେ ଜଣେ କର୍ମଚାରୀ ମୃତ ବ୍ୟକ୍ତିଙ୍କୁ ଜୀବିତ ଦର୍ଶାଇ ଟଙ୍କା ଆତ୍ମସାତ ଘଟଣାରେ କ୍ରାଇମବ୍ରାଞ୍ଚ ଆଜି ମାଷ୍ଟରମାଇଣ୍ଡକୁ ଗିରଫ କରି କୋର୍ଟ ଚାଲାଣ କରିଛି । ମାଷ୍ଟରମାଇଣ୍ଡ ଜଣକ ହେଲେ ନରହରିପୁରର ବ୍ରହ୍ମଜ୍ୟୋତି ବେହେରା । କ୍ରାଇବ୍ରାଞ୍ଚର ଅର୍ଥ ନୈତିକ ଅପରାଧ ଶାଖାର ଏକ ଟିମ୍ ଶିଳ୍ପାଞ୍ଚଳ ଥାନା ଅନ୍ତର୍ଗତ ନରହରିପୁରରୁ ମାଷ୍ଟରମାଇଣ୍ଡକୁ ଗିରଫ କରି କୋର୍ଟରେ ହାଜର କରିଛି।
ଖବରମୁତାବକ, ଗତ 12 /12/2018ରେ ରେମୁଣା ବ୍ୟାଙ୍କ ଅଫ ଇଣ୍ଡିଆ ଶାଖାରୁ ଅର୍ଥ ହେରଫେର ନେଇ ବ୍ୟାଙ୍କ୍ ମ୍ୟାନେଜର ସ୍ବରାଜ ମହାନ୍ତି ଅଭିଯୋଗ କରିଥିଲେ । ଏହି ଅଭିଯୋଗ ଆଧାରରେ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା ବ୍ୟାଙ୍କର 3ୟ ଶ୍ରେଣୀ କର୍ମଚାରୀ ପ୍ରଭାତ କୁମାର ଦାସ ଓ ପରେ ପୂର୍ବତନ ଶାଖା ପ୍ରବନ୍ଧକ ଦୁର୍ଗା ଚରଣ ଦାଶଙ୍କୁ ଗିରଫ କରିଥିଲା । ଏହି ହେରଫେର ମାମଲାରେ ଅଭିଯୁକ୍ତ ମାନେ 1କୋଟି 32 ଲକ୍ଷ ଆତ୍ମସାତ କରିଥିଲେ । ମାଷ୍ଟରମାଇଣ୍ଡ ବ୍ରହ୍ମଜ୍ୟୋତି ବେହେରା 65 ଲକ୍ଷ ଟଙ୍କା ଲୁଟ୍ କରିଥିବା ଜଣା ପଡିଥିଲା ।
ତେବେ ବ୍ରହ୍ମଜ୍ୟୋତି ଉଚ୍ଚ ନ୍ୟାୟାଳୟର ଅନ୍ତରୀଣ ଜାମିନରେ ରହିଥିଲା । ଆଜି କ୍ରାଇମବ୍ରାଞ୍ଚ ଓ ବାଲେଶ୍ବର ଶିଳ୍ପାଞ୍ଚଳ ଥାନା ପୋଲିସ ସହାୟତାରେ ବ୍ରହ୍ମଜ୍ୟୋତି ବେହେରାକୁ ଗିରଫ କରିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
