ବାଲେଶ୍ଵର: ଜିଲ୍ଲାର ନୀଳଗିରି ଅଞ୍ଚଳରେ ଶନିବାର ହାତୀ ଆତଙ୍କ ଦେଖିବାକୁ ମିଳିଛି । ସ୍ଥାନୀୟ ଅଯୋଧ୍ୟା ପଞ୍ଚାୟତର ଗୋପାଳପୁର ଗ୍ରାମରେ ପାଚିଲା ଧାନ ଖାଇବା ଅନ୍ବେଷଣରେ ହାତୀ ପଶି ଧାନକ୍ଷେତ ନଷ୍ଟ କରିଥିବା ସୂଚନା ମିଳିଛି।
ମିଳିଥିବା ସୂଚନା ମୁତାବକ, ଜିଲ୍ଲାର ନୀଳଗିରି ଅଞ୍ଚଳରେ ଝାଡଖଣ୍ଡି ହାତୀ ଉପଦ୍ରବରେ ଅତିଷ୍ଠ ହୋଇପଡିଛନ୍ତି । ପାଚିଲା ଧାନ ଖାଇବା ଆଶାରେ ହାତୀଟି ଧାନକ୍ଷେତରେ ପଶିଥିବା ଲୋକମାନେ ସନ୍ଦେହ କରୁଛନ୍ତି । ହାତୀଟି ଧାନ ବିଲରେ ପଶି ବହୁ ଧାନ ଫସଲ ନଷ୍ଟ କରିଥିବା ସ୍ଥାନୀୟ ବାସିନ୍ଦା କହିଛନ୍ତି । ନୀଳଗିରି ବନବିଭାଗ ହାତୀମାନଙ୍କ ଗତିବିଧି ଉପରେ ନଜର ରଖିଥିବା ସୂଚନା ମିଳିଛି।
ତେବେ ପ୍ରତିବର୍ଷ ଧାନ ପାଚିବା ସମୟରେ ଜିଲ୍ଲାର ନୀଳଗିରି ଅଞ୍ଚଳରେ ଏହିଭଳି ହାତୀ ଉପଦ୍ରବ ଦେଖିବାକୁ ମିଳିଥାଏ । ଏହିପରି ଭାବରେ ପ୍ରତିବର୍ଷ ଚାଷୀମାନେ ହାତୀ ଉପଦ୍ରବର ଶିକାର ହୋଇ ଲକ୍ଷାଧିକ ଟଙ୍କାର କ୍ଷତି ସହୁଛନ୍ତି । ଏହାର ସ୍ଥାୟୀ ସମାଧାନ ପାଇଁ ସ୍ଥାନୀୟ ଲୋକମାନେ ଦାବି କରୁଥିବା ସୂଚନା ମିଳିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
