ବାଲେଶ୍ଵର: ସମସ୍ତଙ୍କ ପ୍ରିୟ ଦାଦା ତଥା ବାଲେଶ୍ଵରର ଜନନାୟକ ଅରୁଣ ଦେଙ୍କ ପ୍ରଥମ ଶ୍ରାଦ୍ଧ ବାର୍ଷିକୀ ବିଭିନ୍ନ ଅନୁଷ୍ଠାନ ପକ୍ଷରୁ ପାଳନ କରାଯାଇଛି । ଅରୁଣ ଦେ ସ୍ମୃତି ପରିଷଦ ପକ୍ଷରୁ ଏହି ଅବସରରେ ସ୍ବର୍ଗତ ଦେଙ୍କ ବାସ ଭାବନରେ ତାଙ୍କର ଏକ ପ୍ରତିମୂର୍ତ୍ତି ଉନ୍ମୋଚନ କରାଯାଇଛି । ବିଭିନ୍ନ ଅନୁଷ୍ଠାନ ପକ୍ଷରୁ ମଧ୍ୟ ଅରୁଣ ଦେଙ୍କୁ ମନେ ପକାଇବା ପାଇଁ ପୁସ୍ତକ ଲୋକାର୍ପଣ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।
ଏହି ଅବସରରେ ସ୍ଥାନୀୟ ବିଧାୟକଙ୍କ ସମେତ ମନ୍ତ୍ରୀମାନେ ଯୋଗଦେଇ ସ୍ବର୍ଗତ ଅରୁଣ ଦେଙ୍କ ସ୍ମୃତି ଚାରଣ କରିଥିଲେ । ଗଣଶିକ୍ଷା ମନ୍ତ୍ରୀ ସମୀର ଦାଶ ଏହି କାର୍ଯ୍ୟକ୍ରମରେ ଯୋଗଦେଇ ଅରୁଣ ଦେଙ୍କୁ ଦେଖି ଛାତ୍ର ଜୀବନରେ ରାଜନୀତି ଆରମ୍ଭ କରିଥିବା ପ୍ରକାଶ କରିଥିଲେ । ରାଜନୈତିକ ଜୀବନରେ ଅନେକ ସମୟରେ ସ୍ବର୍ଗତ ଦେଙ୍କ ଠାରୁ ମତାମତ ଲୋଡୁଥିଲେ ବୋଲି ମଧ୍ୟ ଗଣଶିକ୍ଷା ମନ୍ତ୍ରୀ କହିଥିଲେ । ଏଭଳି ଜନନାୟକଙ୍କ ପ୍ରତିମୂର୍ତ୍ତି ଆଗାମୀ ଦିନରେ ପ୍ରେରଣାର ଉତ୍ସ ପାଲଟିବ ବୋଲି ଅବକାରୀ ମନ୍ତ୍ରୀ ଅଶ୍ବିନୀ ପାତ୍ର କହିଛନ୍ତି । ସେହିପରି ସିଦ୍ଧି କଲ୍ୟାଣ ମଣ୍ଡପରେ ଅରୁଣ ଦେଙ୍କ ସ୍ମୃତି ଚାରଣ ସଭା ଅନୁଷ୍ଠିତ ହୋଇଥିଲା । ଯେଉଁଥିରେ ବିଭିନ୍ନ ଦଳର ନେତା ଓ ବହୁ ମାନ୍ୟଗଣ୍ୟ ବ୍ୟକ୍ତି ଯୋଗଦେଇଥିଲେ ।
ଇଟିଭି ଭାରତ, ବାଲେଶ୍ବର
