ବାଲେଶ୍ୱର: ଓଡିଶାର ଦ୍ୱୀତିୟ ଗଣପର୍ବ ଭାବେ ପରିଗଣିତ ବାବା ଚନ୍ଦନେଶ୍ରୱଙ୍କ ବିଶ୍ପ୍ରୱସିଦ୍ଧ ଚଡକ ଯାତ୍ରା ଆରମ୍ଭ ହୋଇଯାଇଛି । ଦ୍ୱିତୀୟଦିନରେ ବାବା ଚନ୍ଦନେଶ୍ୱର ଓ ଦେବୀ କାମିନୀଙ୍କ ବିବାହ ସମ୍ପନ୍ନ ହୋଇଛି । ତେବେ ଶୁକ୍ରବାର ପୀଠରେ ମହାନୀଳ ପର୍ବ ପାଳିତ ହେବାକୁ ଥିବାବେଳେ ଶନିବାର ପାଟ ଉତ୍ସବ ଅନୁଷ୍ଠିତ ହେବ ବୋଲି ଜଣାପଡିଛି ।
ପ୍ରତିବର୍ଷ ଚୈତ୍ର ମାସରେ ବାବା ଚନ୍ଦନେଶ୍ୱରଙ୍କ ପୀଠରେ ଚଡକ ମେଳା ଅନୁଷ୍ଠିତ ହୋଇଥାଏ । ଜଗନ୍ନାଥଙ୍କ ପବିତ୍ର ରଥଯାତ୍ରାକୁ ବାଦ୍ ଦେଲେ ଓଡିଶାରେ ଏହି ମେଳା ଅଦ୍ୱିତୀୟ । ବାଲେଶ୍ୱର ଭୋଗରାଇ ବ୍ଲକ ଅନ୍ତର୍ଗତ ହୁଗୁଳି ପଞ୍ଚାୟତରେ ବାବା ଚନ୍ଦନେଶ୍ୱରଙ୍କ ଶୈବପୀଠ ବିଦ୍ୟମାନ । ଏହା ଏକ ବିଚିତ୍ର ଶୈବପୀଠ । କାରଣ ପୃଥିବୀର ସମସ୍ତ ଶୈବପୀଠରେ ପ୍ରଭୁଙ୍କ ଶିବଲିଙ୍ଗ ପୂଜା ପାଉଥିବା ବେଳେ ଚନ୍ଦନେଶ୍ୱରଙ୍କ ଲିଙ୍ଗ ନାହିଁ । କେବଳ ପ୍ରଭୁ ଶ୍ରୀ ଚନ୍ଦନେଶ୍ୱରଙ୍କ ଜଳଯନ୍ତ୍ର ପୂଜା କରାଯାଇଥାଏ ।
ଏଥିରେ ଓଡିଶା ସମେତ ପଶ୍ଚିମବଙ୍ଗ, ଝାଡଖଣ୍ଡ, ଛତିଶଗଡ, ବିହାର ପ୍ରଭୃତି ଅଞ୍ଚଳରୁ ଲକ୍ଷାଧିକ ଭକ୍ତଙ୍କ ସମାଗମ ହୋଇଥାଏ । ଭକ୍ତମାନେ ଉପବୀତ ଧାରଣ କରିଥାନ୍ତି । 13 ଦିନ ଧରି ଚଳଚଞ୍ଚଳ ହୋଇ ଉଠେ ଏହି ପୀଠ । ଏହି ଉତ୍ସବର ମୁଖ୍ୟ ଆକର୍ଷଣ ପାଟପର୍ବ ହୋଇଥିବା ବେଳେ ଅନ୍ୟତମ ଆକର୍ଷଣ ହେଉଛି ପ୍ରଭୁ ଶିବ ଓ ଦେବୀ କାମିନୀଙ୍କ ବିବାହ ଉତ୍ସବ ।
ବୁଧବାର ପ୍ରଭୁଙ୍କ ଚତୁର୍ଥ ଅର୍ଘ୍ଯ ଅବସରରେ ଏହି ବିବାହ ଉତ୍ସବ ମାନବୀୟ ରୀତିନୀତିରେ ଅନୁଷ୍ଠିତ ହୋଇଯାଇଛି । ପ୍ରଥା ଅନୁଯାୟୀ ଚାରି ଅର୍ଘ୍ଯ ଦିନ ଘଟ ସ୍ବରୂପେ ପ୍ରଭୁ ଶିବ, ତାଙ୍କ ବାହନ ସହିତ ସେବାୟତମାନେ ବରଯାତ୍ରୀ ହୋଇ ଘଟ ସ୍ବରୂପିଣୀ ଦେବୀ କାମିନୀଙ୍କୁ ବିବାହ କରିବା ପାଇଁ କନ୍ଯାଘରେ ଉପସ୍ଥିତ ହୋଇଥାନ୍ତି । ତା ପରଦିନ ତୃତୀୟ ଅର୍ଘ୍ଯ ଅବସରରେ କନ୍ୟା ପିତାଙ୍କର ଅନିଚ୍ଛା ସତ୍ତ୍ବେ ଦେବୀ କାମିନୀଙ୍କୁ ସାଙ୍ଗରେ ଘେନି ମନ୍ଦିରକୁ ପ୍ରତ୍ୟାବର୍ତ୍ତନ କରିଥାନ୍ତି ।
ସେଠାରେ ଶିବଙ୍କ ସହିତ କାମିନୀଙ୍କ ବିବାହ ଉତ୍ସବ ମାନବୀୟ ରୀତି ନୀତିରେ ଅନୁଷ୍ଠିତ ହୋଇଥାଏ ।
ମାତ୍ର ଚଳିତ ବର୍ଷ ତିଥି ଅନୁଯାୟୀ ମଙ୍ଗଳବାର ପଞ୍ଚମ ଅର୍ଘ୍ଯଦିନ ବରଯାତ୍ରୀ ସନ୍ଧ୍ୟାରେ କନ୍ୟା ଘରକୁ ଯାଇ ବୁଧବାର ଚତୁର୍ଥ ଅର୍ଘ୍ଯର ପୂର୍ବାହ୍ନରେ ମନ୍ଦିରକୁ ଫେରି ବିବାହ ଅନୁଷ୍ଠିତ ହୋଇଯାଇଛି । ବିଧି ଅନୁସାରେ ପ୍ରଭୁ କାମିନୀଙ୍କୁ ସାଙ୍ଗରେ ନେଇ ମନ୍ଦିର ମଧ୍ୟରେ ପ୍ରବେଶ କରିବା ବେଳେ ମାଆ ପାର୍ବତୀ ତାଙ୍କୁ ବାଧା ଦେଇଥିଲେ । ପରେ ପ୍ରଭୁ ପାର୍ବତୀଙ୍କ ମାନଭଞ୍ଜନ କରି କାମିନୀଙ୍କୁ ମନ୍ଦିର ଭିତରେ ବିବାହ କରିଥିଲେ । ବିବାହ ଉତ୍ସବ ଶେଷ ହେବା ପର୍ଯ୍ୟନ୍ତ ଅର୍ଥାତ୍ ସନ୍ଧ୍ୟାରେ ମନ୍ଦିର ଖୋଲିବା ପରେ ଭକ୍ତମାନେ ପ୍ରଭୁଙ୍କ ଯୁଗଳ ମୂର୍ତ୍ତିକୁ ଦର୍ଶନ କରିଥିଲେ। ରାତିରେ ଭକ୍ତଙ୍କ ସମୂହ ଅର୍ଘ୍ଯଦାନ ଅନୁଷ୍ଠିତ ହୋଇଥିଲା।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
