ବାଲେଶ୍ୱର: ପଣ୍ଡ ହେଲା ଦଲାଲର ସ୍ବପ୍ନ । ନାବାଳିକାଙ୍କୁ ନେଇ ଦାଦନ ଭାବେ ଖଟାଇ ମାଲାମାଲ ହେବାକୁ ଯୋଜନା କରିଥିଲା ଦଲାଲ । ଆଦିବାସୀ ନାବାଳିକାଙ୍କୁ ବାହାର ରାଜ୍ୟରେ ଦାଦନ ଭାବେ ଖଟାଇବାକୁ ଚାଲାଣ କରୁଥିଲା । କିନ୍ତୁ ମହିଳା ସ୍ୱୟଂ ସହାୟିକା ଗୋଷ୍ଠୀର ସଦସ୍ୟମାନଙ୍କୁ ଏନେଇ ଖବର ମିଳିବା ପରେ ଦଲାଲକୁ କାବୁ କରିବା ସହ ଅନେକ ନାବାଳିକାଙ୍କୁ ଉଦ୍ଧାର କରିଛନ୍ତି।
ବାଲେଶ୍ୱର ଜିଲ୍ଲା ଖଇରା ଥାନା ନନ୍ଦୁର ଅଞ୍ଚଳରେ ଏମିତି ଘଟଣା ଘଟିଛି । ସୂଚନା ଅନୁସାରେ, ୯ଜଣ ଆଦିବାସୀ ନାବାଳିକା ଓ କିଛି ନାବାଳକଙ୍କୁ ନେଇ ମହାରାଷ୍ଟ୍ର ଯାଉଥିବା ୩ଜଣ ଦଲାଲଙ୍କୁ ସ୍ଥାନୀୟ ଗ୍ରାମବାସୀ ଓ ମହିଳା ଗୋଷ୍ଠୀ ଧରି ଖଇରା ପୋଲିସ ଜିମାରେ ଦେଇଛନ୍ତି । ଏଥିସହ ଆଦିବାସୀ ନାବାଳିକାମାନଙ୍କୁ ଉଦ୍ଧାର କରାଯାଇଛି।
ଦଲାଲଙ୍କ ମଧ୍ୟରୁ ୨ଜଣ ମହାରାଷ୍ଟ୍ରର ହୋଇଥିବା ବେଳେ ଅନ୍ୟ ଜଣେ ଖଇରା ବ୍ଲକ କାକୁଡିଆ ଗ୍ରାମର ବୋଲି ଜଣାପଡିଛି । ଏହି ଦଲାଲମାନେ ନନ୍ଦୁର ରାସ୍ତାରେ ନାବାଳିକାମାନଙ୍କୁ ନେଉଥିବା ଖବର ପାଇ ମହିଳା ଗୋଷ୍ଠୀ ସେଠାରେ ପହଞ୍ଚିଥିଲେ । ହେଲେ ଦଲାଲମାନେ ସେମାନଙ୍କ ନିକଟରୁ ଖସି ଏକ ଅଟୋରେ ଖସି ପଳାଇ ଯାଉଥିବା ବେଳେ ସୋର-କୁପାରୀ ରାସ୍ତାର ନଟାପଡା ଛକଠାରେ କିଛି ଯୁବ ଗୋଷ୍ଠୀ ଅଟକାଇ ଥିଲେ । ପରେ ପୋଲିସ ଦଲାଲମାନଙ୍କୁ ଅଟକ ରଖି ପଚରାଉଚରା ଜାରି ରଖିବା ସହ ଅଧିକ ତଦନ୍ତ ଚଳାଇଛି ।
ମାତ୍ର କେଇଟା ଟଙ୍କା ଲୋଭରେ ମଣିଷ ଅନ୍ଧ ହୋଇ ଲୋକଙ୍କ ଜୀବନ ନଷ୍ଟକରିବାକୁ ପଛାଉ ନାହାନ୍ତି । ଘଟଣା ଆଜିର ନୁହେଁ ବାରମ୍ବାର ଏପରି ଘଟଣା ସାମ୍ନକୁ ଆସୁଛି । ଏଭଳି ଘଟଣା ସାମ୍ନାକୁ ଆସିଲେ ସରକାରଙ୍କ ସମସ୍ତ ଯୋଜନା ମଧ୍ୟ ଫେଲ ମାରିବାରେ ଲାଗିଥିବା ମନେ ହେଉଛି ।
କେବଳ ବାଲେଶ୍ବର ନୁହେଁ ରାଜ୍ୟର ବିଭିନ୍ନ ସ୍ଥାନରୁ ଏପରି ଘଟଣା ସାମ୍ନାକୁ ଆସୁଛି । ବ୍ରହ୍ମପୁରରେ ଏପରି ଘଟଣା ବାରମ୍ବାର ଦେଖିବାକୁ ମାଳୁଛି । ବ୍ରହ୍ମପୁର ରେଳ ଷ୍ଟେସନ ପାଲଟିଛି ମାନବ ଚାଳାଣର ଗଡ(human traffcking ) । 2022ରେ 343 ଦାଦନଙ୍କୁ ଉଦ୍ଧାର କରାଯାଇଛି । ରେଳବାଇ ସମେତ କେନ୍ଦ୍ର, ଓଡ଼ିଶା, ବିହାର ଓ ବିଭିନ୍ନ ରାଜ୍ୟକୁ ଜାତୀୟ ମାନବାଧିକାର ଆୟୋଗଙ୍କ ନୋଟିସ ଜାରି କରି ରିପୋର୍ଟ ମାଗିଛନ୍ତି ।
ଜାତୀୟ ମାନବାଧିକାର(NHRC) ଆୟୋଗଙ୍କ ରିପୋର୍ଟ ଅନୁଯାୟୀ, ଓଡ଼ିଶାର ଗଞ୍ଜାମ ଜିଲ୍ଲାର ରେଳଷ୍ଟେସନ ଦେଇ ବିହାରରୁ ଆନ୍ଧ୍ର ପ୍ରଦେଶ ପର୍ଯ୍ୟନ୍ତ ମାନବ ଚାଳାଣର ଏକ ପ୍ରମୁଖ କରିଡର ପାଲଟିଛି । ୨୦୨୨ ମସିହାରେ ସମୁଦାୟ ୩୪୩ ଜଣଙ୍କୁ ଏକାଧିକ ଅପରେସନ ମାଧ୍ୟମରେ ଷ୍ଟେସନରୁ ଉଦ୍ଧାର କରାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
