ବାଲେଶ୍ଵର: ବିଜେପି ପକ୍ଷରୁ ବାଲେଶ୍ଵର ଜିଲ୍ଲା ସିମୁଳିଆ ଥାନା ଆଗରେ ବିକ୍ଷୋଭ ପ୍ରଦର୍ଶନ । ଜମି ହଡ଼ପ ଅଭିଯୋଗ ସହ ପ୍ରଶାସନିକ କାର୍ଯ୍ୟଦକ୍ଷତାକୁ ନେଇ ବିଜେପି ପକ୍ଷରୁ ଶନିବାର ସିମୁଳିଆ ଥାନା ଆଗରେ ଧାରଣା ଦେବାସହ ବିକ୍ଷୋଭ ପ୍ରଦର୍ଶନ କରିଥିବା ଦେଖିବାକୁ ମିଳିଛି ।
ଅଭିଯୋଗ ଅନୁସାରେ, 40ନଂ ଜୋନ ଜିଲ୍ଲା ପରିଷଦ ଗୀତା ଦାସଙ୍କ ସ୍ବାମୀ କ୍ଷିତିଶ ମହାନ୍ତି ବେଆଇନ ଭାବେ ସିମୁଳିଆ ଅଞ୍ଚଳର ଅନେକ ଜମି ହଡ଼ପ କରିଥିବା ଅଭିଯୋଗ ହୋଇଛି । ଯାହାକୁ ନେଇ ପୂର୍ବରୁ ଅଭିଯୋଗ ହୋଇଥିଲେ ମଧ୍ୟ ସିମୁଳିଆ ତହସିଲଦାର କୌଣସି କାର୍ଯ୍ୟାନୁଷ୍ଠାନ ନେଇନଥିବା କୁହାଯାଇଛି ।
ଉପଜିଲ୍ଲାପାଳ ଜମି ହଡ଼ପ ନେଇ ଏକ ମାମଲା ରୁଜୁ କରିବା ପାଇଁ ନିର୍ଦ୍ଦେଶ ଦେଇଥିଲେ ମଧ୍ୟ ତାହା କାର୍ଯ୍ୟକାରୀ ହୋଇନାହିଁ । ଏମିତିକି ସିମୁଳିଆ ଥାନା ଅଧିକାରୀ ବିଜେଡିର ହାତବାରିସୀ ସାଜିଥିବା ବିଜେପି ଅଭିଯୋଗ କରିଛି । ତେବେ ଆଇଆଇସିଙ୍କ ବଦଳି ସହ ଜମି ହଡ଼ପ କରିଥିବା ଅଭିଯୁକ୍ତଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ବିଜେପି ଦାବି କରି ବିକ୍ଷୋଭ ପ୍ରଦର୍ଶନ କରିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
