ବାଲେଶ୍ବର: ଅନ୍ତରାଷ୍ଟ୍ରୀୟ ନିଶା ମାଫିଆ ସେକ୍ ରାଜା ଘରେ ବାଲେଶ୍ବର ଏସ୍ପି ବି. ଯୁଗଳ କିଶୋରଙ୍କ ତତ୍ତ୍ବାବଧାନରେ ଏକ ସ୍ପେଶାଲ ସ୍କ୍ବାଡ୍ ଚଢାଉ କରିଛି । ଏହାସହ ଏହି ଟିମ ଡ୍ରଗ କାରବାରରେ ଲିପ୍ତ ଥିବା ବିଭିନ୍ନ ମାଫିଆଙ୍କ ଘରେ ମଧ୍ୟ ଚଢ଼ାଉ କରିଥିବା ସୂଚନା ରହିଛି ।
ବାଲେଶ୍ବର ସହର ଅରଡ଼ବଜାର ମସଜିଦ୍ ଗଳିରେ ଥିବା ରାଜାର ଘରେ ଚଢ଼ାଉ କରାଯାଇଛି । ମନୋଜ ରାଉତଙ୍କ ନେତୃତ୍ତ୍ବରେ ରେମୁଣା ଆଇଆଇସି ଶୁଭ୍ରାଂଶୁ ଶେଖର ନାୟକଙ୍କ ସମେତ ଅନ୍ୟ ପୋଲିସ କର୍ମଚାରୀମାନେ ଏହି ଚଢ଼ାଉ କରିଥିଲେ । ପୋଲିସକୁ ଦେଖି ସେଠାରେ ରହୁଥିବା ରାଜାର ଭାଉଜ ସନୱାର ବିବି ସେଠାରୁ ଛୁ ମାରିଥିଲେ । ତେବେ ରାଜାର ଘରେ ଲାଗିଥିବା ସିସି କ୍ୟାମେରା ଗୁଡ଼ିକୁ ପୋଲିସ ଜବତ କରିଥିବା ଜଣାପଡ଼ିଛି ।
ଏହାପରେ ତେଲେଙ୍ଗାସାହି ସ୍ଥିତ ଏକ ଆପାର୍ଟମେଣ୍ଟରେ ରାଜା କିଣିଥିବା 106 ନଂ ଫ୍ଲାଟ୍ରେ କାମ ଚାଲିଥିବା ଖବର ପାଇ ସ୍ପେଶାଲ ସ୍କ୍ବାଡ୍ ସେଠାରେ ପହଞ୍ଚି ଖାନ୍ତଲାସୀ କରିଥିଲେ । ଏହାପରେ ଆପାର୍ଟମେଣ୍ଟ ଲୋକଙ୍କୁ ଡାକି ଉକ୍ତ ଫ୍ଲାଟ୍ର କାମ ବନ୍ଦ କରିବାକୁ ପୋଲିସ କହିବା ସହ ସେଠାରେ ରାଜା ରଖିଥିବା ଦୁଇଟି ଚାରିଚକିଆ ଗାଡ଼ି (ଓଡି-୦୧ଭି-୮୭୮୬ ଓ ଓଡି-୦୧ଏଡି-୧୮୯୦)କୁ ମଧ୍ୟ ଜବତ କରାଯାଇଥିବା ଜଣାପଡ଼ିଛି ।
ଏଠାରେ ସୂଚନାଥାଉ ଯେ, ଅନ୍ତରାଷ୍ଟ୍ରୀୟ ନିଶା ମାଫିଆ ସେକ୍ ରାଜାକୁ ଏସ୍ଟିଏଫ୍ ଗତ ୧୬ ତାରିଖରେ ଭୁବନେଶ୍ବରରୁ ଗିରଫ କରିଥିଲା । ଏବେ ତାକୁ ୭ ଦିନିଆ ରିମାଣ୍ଡରେ ନିଆଯାଇଥିବା ବେଳେ ରାଜାର ନିଶା ସାମ୍ରାଜ୍ୟକୁ ସମୂଳେ ଧ୍ବଂସ କରିବା ପାଇଁ ବିଭିନ୍ନ ସ୍ଥାନରେ ଥିବା ତାର ଲିଙ୍କ୍ର ଖୋଳତାଡ଼ କରାଯାଉଛି ।
ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ
