ବାଲେଶ୍ବର: ଦୟନୀୟ ଅବସ୍ଥାରେ ଜିଲ୍ଲାର ଟ୍ରଲର ଶିଳ୍ପ । ଚିନ୍ତାରେ ମତ୍ସ୍ୟଜୀବୀ । ଅନ୍ୟ ରାଜ୍ୟରେ ମତ୍ସ୍ୟ ଶିଳ୍ପକୁ ବଞ୍ଜାଇବା ପାଇଁ ସମସ୍ତ ସୁବିଧା ଥିବା ବେଳେ ଓଡିଶା ମତ୍ସ୍ୟଜୀବୀ ଏଥିରୁ ବଞ୍ଚତ ହେଉଛନ୍ତି । ଏଭଳି ଅଭିଯୋଗ ଆଣିଛି ବାଲେଶ୍ବର ଜିଲ୍ଲା ମତ୍ସ୍ୟଜୀବୀ ସଂଘ ତଥା ଟ୍ରଲର ମାଲିକ ସଂଘ । ଏନେଇ ଟ୍ରଲର ମାଲିକ ସଂଘ ପକ୍ଷରୁ ଚାନ୍ଦିପୁର ବଳରାମଗଡ଼ି କାର୍ଯ୍ୟାଳୟରେ ଏକ ସାମ୍ମାଦିକ ସମ୍ମିଳନୀ ହୋଇଥିଲା ।
ଏହି କ୍ରମରେ ଟ୍ରଲର ଶିଳ୍ପ ଦୟନୀୟ ଅବସ୍ଥାରେ ଗତି କରୁଥିବା ନେଇ କର୍ମକର୍ତ୍ତା ଓ ସଭ୍ୟମାନେ ଉଦ୍ବେଗ ପ୍ରକାଶ କରିଥିଲେ। ଓଡ଼ିଶା ଉପକୂଳରେ ବସବାସ କରୁଥିବା ପ୍ରାୟ ୧୦ଲକ୍ଷ ମତ୍ସ୍ୟଜୀବୀଙ୍କ ପରିବାର ଏହି ଶିଳ୍ପ ଉପରେ ନିର୍ଭର କରି ଜୀବନ ଯାପନ କରୁଥିଲେ ମଧ୍ୟ ଏହା ସରକାର ଦୃଷ୍ଟି ଆକର୍ଷଣ କରୁନାହାଁନ୍ତି ବୋଲି ଅଭିଯୋଗ କରିଛନ୍ତି ।
ଅନ୍ୟ ରାଜ୍ୟରେ ମତ୍ସ୍ୟ ଶିଳ୍ପକୁ ବଞ୍ଚାଇବା ପାଇଁ ଡିଜେଲ ଲିଟର ପିଛା ୧୦ରୁ ୧୫ଟଙ୍କା ଟ୍ୟାକ୍ସ ଛାଡ଼କରି ରିହାତି ଦେଉଥିବା ବେଳେ ଏପର୍ଯ୍ୟନ୍ତ ଓଡ଼ିଶାରେ ମତ୍ସ୍ୟଜୀବୀ ଏହି ସୁବିଧାରୁ ବଞ୍ଚିତ ହେଉଛନ୍ତି । ତେବେ ଏହି ସାମ୍ବାଦିକ ସମ୍ମିଳନୀରେ ବହୁ ଦାବି ଉଠାଯାଇଥିଲା । ସେଥିମଧ୍ୟରୁ ମାଛଧରା ନିଷିଦ୍ଧାଞ୍ଚଳରେ ବୟାଁ ଦେଇ ସୀମା ନିର୍ଦ୍ଧାରଣ, ନିଷିଦ୍ଧାଞ୍ଚଳ ବାହାରେ ଅର୍ଥଲୋଭରେ ଓ ମତ୍ସ୍ୟଜୀବୀଙ୍କୁ ଉତ୍ପୀଡନ କରିବା ଉଦ୍ଦେଶ୍ୟରେ କରାଯାଉଥିବା ଟ୍ରଲର ଜବତ ବନ୍ଦ କରାଯାଉ ବୋଲି ଦାବି କରାଯାଇଛି ।
ସେହିପରି ଜବତ ବୋଟ୍ର ଜିପିଏସ୍ରେ ଉକ୍ତ ସ୍ଥାନ ମାର୍କିଂ କରିଯାଉ । ବୋଟ୍ ଜବତ ପରେ ଡିଜେଲ ଓ ରାସନ୍ର ଜବତ ଲିଷ୍ଟ ମାଲିକ କିମ୍ବା ଷ୍ଟାଫ୍ଙ୍କୁ ତତକ୍ଷଣାତ୍ ହସ୍ତାନ୍ତର କରାଯାଉ ବୋଲି ଦାବି ଆଣିଛି । ବୋଟ୍ ଜବତ କରାଯିବା ପରେ ସମସ୍ତ ଷ୍ଟାଫ୍ଙ୍କୁ କୋର୍ଟ ଚାଲାଣ ପରିବେର୍ତ୍ତ ବୋଟ୍ ଜଗିବା ପାଇଁ ଅନ୍ତତଃ ଦୁଇଜଣ ଷ୍ଟାଫଙ୍କୁ ବୋଟ୍ରେ ଛଡ଼ାଯାଉ । ଏହାସହ ବନକର୍ମଚାରୀ ଜବତ କରୁଥିବା ବୋଟ୍ର ମାଛକୁ ମାଫିଆ ପରିବର୍ତ୍ତେ ଟ୍ରଲର ମାଲିକଙ୍କୁ ହସ୍ତାନ୍ତର କରାଯାଉ ଓ ଏକ ମାସ ମଧ୍ୟରେ ଟ୍ରଲରକୁ ଛାଡ଼ି ଦିଆଯାଉ । ଜବତ ବୋଟ୍ର କର୍ମଚାରୀମାନଙ୍କୁ ମାନସିକ ଓ ଶାରୀରିକ ଯନ୍ତ୍ରଣା ଦେବା ବନ୍ଦ କରାଯାଉ । ଅନ୍ୟପଟେ ଜବତ ବୋଟ ଗୁଡ଼ିକ ଉପଯୁକ୍ତ ସୁରକ୍ଷିତ ସ୍ଥାନରେ ରଖାଯାଉ ଆଦି ପ୍ରମୁଖ ଦାବି ହୋଇଛି।
ଏନେଇ ସଂଘ ପକ୍ଷରୁ ଡିଏଫ୍ଓ, ମତ୍ସ୍ୟବିଭାଗ ମନ୍ତ୍ରୀ ଓ ଜଙ୍ଗଲ ବିଭାଗ ମନ୍ତ୍ରୀଙ୍କୁ ଏକ ଦାବିପତ୍ର ଦିଆଯାଇଛି। ଆଗାମୀ ଦିନରେ ଏନେଇ କୌଣସି ପଦକ୍ଷେପ ନିଆନଗଲେ ଟ୍ରଲର ଉପରେ ନିର୍ଭର କରୁଥିବା ମତ୍ସ୍ୟଜୀବୀ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।
ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ
