ବାଲେଶ୍ବର: ବିପର୍ଯ୍ୟସ୍ତ ଡ୍ରେନେଜ ବ୍ୟବସ୍ଥା । ଏବେ ବି ସମସ୍ୟା ଘେରରେ ବାଲେଶ୍ବର ସହର । ଅସରାଏ ବର୍ଷାରେ ସହର ହେଉଛି ଉବୁଟୁବୁ। ଭାସୁଛି ଯାନ, ଜଳବନ୍ଦୀରେ ରହୁଛନ୍ତି ଜନ ସାଧାରଣ । ବର୍ଷା ଦିନରେ ସହରର ବିଭିନ୍ନ ୱାର୍ଡ ହୋଇଯାଏ ଜଳାର୍ଣ୍ଣବ। ଏମିତି କି ଲୋକଙ୍କ ଘର ଭିତରେ ଢେଉ ମାରେ ପାଣି । ବର୍ଷା ଋତୁରେ ଜଳ ନିଷ୍କାସନ ପାଇଁ ବଡ଼ବଡ଼ ସହରରେ ଡ୍ରେନ୍ କାମ ଯୁଦ୍ଧକାଳୀନ ଭିଭିରେ ଚାଲିଥିବା ବେଳେ ବାଲେଶ୍ଵରରେ କିନ୍ତୁ ଏହାର ବ୍ୟତିକ୍ରମ ଦେଖିବାକୁ ମିଳିଛି । ସହରର ଅଧିକାଂଶ ସ୍ଥାନରେ ଅଧପନ୍ତରା ହୋଇପଡ଼ି ରହିଛି ଡ୍ରେନ୍ କାମ । ଏପଟେ ଚାରିବର୍ଷ ହେବ ହୋଇପାରିନି ମହାନାଳ ସଫେଇ । ଫଳରେ ପ୍ରତିବର୍ଷ ବର୍ଷା ଦିନେ ବାଲେଶ୍ବର ସହରରେ ଦେଖିବାକୁ ମିଳେ କୃତ୍ରିମ ବନ୍ୟା ।
ବିଭିନ୍ନ ୱାର୍ଡରେ ଜଳ ନିଷ୍କାସନ ହୋଇ ନପାରି ଅସରାଏ ବର୍ଷା ହେଲେ ନର୍ଦ୍ଦମା ପାଣି ଲୋକଙ୍କ ଘରେ ପଶିବା ସହ ରାସ୍ତା ଉପରେ ନାଳପାଣି ସୁଅ ଛୁଟୁଥିବା ଦେଖିବାକୁ ମିଳେ । ଏବେବି ସବୁ ୱାର୍ଡରେ କଂକ୍ରିଟ୍ ଡ୍ରେନ୍ ନାହିଁ। ଅଧିକାଂଶ ୱାର୍ଡରେ ମାଟି ଡ୍ରେନ ରହିଛି। ନିୟମିତ ଭାବେ ଡ୍ରେନ୍ ସଫା ହେଉନଥିବାରୁ ଏହା ପୋତି ଗଲାଣି। ଏମିତିକି ଅନେକ ଡ୍ରେନରେ ଅଳିଆ ଆବର୍ଜନା ପକାଇ ଜଳନିଷ୍କାସନ ବାଟ ବନ୍ଦ କରି ଦିଆଯାଇଛି ।
ଡ୍ରେନ ସଫା ଓ ମରାମତି ପାଇଁ କୋଟିକୋଟି ଟଙ୍କା ପଡି ରହିଥିବା ବେଳେ ତାର ସୁଦୁପଯୋଗ ହୋଇ ପାରୁନି। ଗୋଟିଏ ପଟେ ମ୍ୟୁନିସିପାଲିଟି ଭାଙ୍ଗି ସାରିଥିବା ବେଳେ ନିର୍ବାଚିତ ପ୍ରତିନିଧି ଯେଉଁ କାର୍ଯ୍ୟ କରିବା କଥା ତାହା ଏବେ ରହିଛି ପ୍ରଶାସନିକ ହାତରେ । ଏଥିପାଇଁ ପ୍ରଶାସନିକ ଅଧିକାରୀମାନେ ଆଗ୍ରହ ପ୍ରକାଶ କରି ଲୋକଙ୍କ ଏ ସମସ୍ୟା ପ୍ରତି ଧ୍ୟାନ ଦେବାକୁ ସହରବାସୀ ଦାବି କରିଛନ୍ତି।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
