ବାଲେଶ୍ବର: ବାତ୍ୟା ଅମ୍ଫାନ ପ୍ରଭାବରେ ଜିଲ୍ଲାରେ ହୋଇଥିବା କ୍ଷୟକ୍ଷତିର ଆକଳନ କରିଛି ଜିଲ୍ଲା ପ୍ରଶାସନ। ଭୋଗରାଇ, ବାଲିଆପାଳ, ଖଇରା ଓ ସୋର ଅଞ୍ଚଳରେ ଅଧିକ କ୍ଷତି ହୋଇଥିବା ଜିଲ୍ଲାପାଳ କେ ସୁଦର୍ଶନ ଚକ୍ରବର୍ତ୍ତୀ ସୂଚନା ଦେଇଛନ୍ତି। ପୁନଃଥଇଥାନ କାର୍ଯ୍ୟ ତ୍ବରାନ୍ନିତ କରାଯାଇଛି। ବିଭିନ୍ନ ସ୍ଥାନରେ ଉପୁଡି ପଡିଥିବା ଗଛ ଓ ବିଦ୍ୟୁତ ଖୁଣ୍ଟକୁ ରାସ୍ତାରୁ ସଫା କରାଯାଇଛି। ଲୋକଙ୍କ ଘର ଉପରେ ଗଛ ପଡ଼ି ହୋଇଥିବା କ୍ଷତି ଉପରେ ଧ୍ୟାନ ଦିଆଯିବ ବୋଲି ଜଣାପଡିଛି।
ବିଦ୍ୟୁତ ଖୁଣ୍ଟ ଉପୁଡି ସରାବରାହ ବିଛିନ୍ନ ହୋଇଥିବା ବେଳେ ସନ୍ଧ୍ୟା ସୁଦ୍ଧା ସଜାଡିବା ପାଇଁ ବିଭାଗ ତରଫରୁ କୁହାଯାଇଛି। ସେହିପରି ଭୋଗରାଇ ଓ ବାଲିଆପାଳ ଆଦି ଅଞ୍ଚଳରେ ବ୍ୟାପକ ଧାନଚାଷ ନଷ୍ଟ ହୋଇଥିବା ଦେଖିବାକୁ ମିଳିଛି। ଶହଶହ ଏକରରେ ହୋଇଥିବା ଧାନ ଚାଷ ଜମିରେ ପାଣି ପଶି ଯାଇଛି । ଏହାକୁ ନେଇ ଚାଷୀ ଚିନ୍ତାରେ ପଡିଛି। କୃଷି କ୍ଷେତ୍ରରେ ହୋଇଥିବା କ୍ଷୟକ୍ଷତିର ଆକଳନ ପାଇଁ କୃଷି ବିଭାଗକୁ ଦାୟିତ୍ବ ଦିଆଯାଇଛି। ଶତକଡା 40 ଭାଗ ଚାଷ ନଷ୍ଟ ହୋଇଥିବା ଜିଲ୍ଲାପାଳ କହିଛନ୍ତି।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
