ବାଲେଶ୍ବର: ଜିଲ୍ଲାର ବିଭିନ୍ନ ଅଞ୍ଚଳରୁ ପ୍ରାୟ 7 ଜଣ ଯୁବତୀ ପଡୋଶୀ ରାଜ୍ୟ ଆନ୍ଧ୍ରପ୍ରଦେଶକୁ କାମ କରିବାକୁ ଯାଇ ସେଠାରେ ନିର୍ଯାତନାର ଶିକାର ହେଉଥିବା ଅଭିଯୋଗ ହୋଇଛି । ସେମାନଙ୍କୁ ନିର୍ଯାତନା ଦିଆଯାଉଥିବା ଏକ ଭିଡିଓ ଜାରି କରି ଯୁବତୀମାନେ ଅଭିଯୋଗ କରିବା ସହ ଉଦ୍ଧାର କରିବା ପାଇଁ ସରକାରଙ୍କୁ ନିବେଦନ କରିଛନ୍ତି । ଏସମ୍ପର୍କରେ ଖବର ପ୍ରଘଟ ହେବା ପରେ ଥାନାରେ ଅଭିଯୋଗ ମଧ୍ୟ ହୋଇଛି ।
ସୂଚନା ଅନୁସାରେ ଅମର୍ଦ୍ଦା ରୋଡ଼ ଫାଣ୍ଡି ଅଧିନ ସଦାନନ୍ଦପୁର ଗାଁର ଜଣେ ଯୁବତୀ ରୋଜଗାର ଆଶାରେ ଚଣ୍ଡିଖୋଲ ଅଞ୍ଚଳର ଜଣେ ଲୋକଙ୍କ ସହ ଆନ୍ଧ୍ରପ୍ରଦେଶ ଯାଇଥିଲେ । ସେଠାରେ ଏକ ସୂତାକଳରେ ତାଙ୍କୁ କାମରେ ଲଗାଇବା ପାଇଁ ଯୁବକ ଜଣଙ୍କ କହିଥିବା ବେଳେ ତାଙ୍କୁ ସେଠାରେ ଦରମା ନଦେବା ସହିତ ଶାରୀରିକ ନିର୍ଯାତନା ଦେଇଥିଲେ । ପୂର୍ବରୁ ମଧ୍ୟ ସେଠାରେ କିଛି ଯୁବତୀ ଫସି ରହିଥିବା ଜଣାପଡିଥିଲା ।
ସେଠାରୁ ଏକ ଭିଡିଓ ଜାରି କରି ସେମାନଙ୍କୁ ଉଦ୍ଧାର କରିବା ପାଇଁ ଯୁବତୀମାନେ ରାଜ୍ୟ ସରକାରଙ୍କୁ ନିବେଦନ କରିଛନ୍ତି । ତେବେ ଆନ୍ଧ୍ରପ୍ରଦେଶରେ ବାଲେଶ୍ଵର ଜିଲ୍ଲାର ବିଭିନ୍ନ ସ୍ଥାନରୁ 7ରୁ ଅଧିକ ଯୁବତୀ ନଜରବନ୍ଦୀରେ ଥିବା ଜଣାପଡ଼ିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ , ଇଟିଭି ଭାରତ
