ପ୍ରାକୃତିକ ତଥା ସୀମିତ ସମ୍ପଦକୁ ସୁରକ୍ଷା ଯୋଗାଇବା ପାଇଁ ଦୀର୍ଘ ବର୍ଷ ଧରି ଚାଲି ଆସୁଛି ବନ୍ୟଜନ୍ତୁ ସୁରକ୍ଷା ଅଭିଯାନ। ବର୍ଷକୁ ଥରେଅଧେ ଖୁବ୍ ଜୋରସୋରରେ ଲାଗୁଛି ନାରା। କେବେ ପ୍ରହସନ ପାଇଁ ଗଛ ମଧ୍ୟ ଲଗାଇ ଦିଆଯାଉଛି। ହେଲେ ସୁଧୁରୁନି ପରସ୍ଥିତି। ବରଂ ବିଗତ କିଛି ବର୍ଷ ହେବ ବଢିବାରେ ଲାଗିଛି ବନ୍ୟଜନ୍ତୁ ଶିକାର ସଂଖ୍ୟା। ଫଳରେ କ୍ରମଶଃ ହ୍ରାସ ପାଇବାରେ ଲାଗିଛି ଉଭୟ ଜଙ୍ଗଲ ଓ ବନ୍ୟଜନ୍ତୁଙ୍କୁ ସଂଖ୍ୟା। ତେଣେ ଜଙ୍ଗଲ ସଂଖ୍ୟା କମୁଥିବାରୁ ଜନବସତି ମୁହାଁ ହେଉଛନ୍ତି ବନ୍ୟା ଜୀବଜନ୍ତୁ।
ଏନେଇ ବଲାଙ୍ଗୀର ସହର ପରିବେଶବିତ୍ ଚିନ୍ତା ପ୍ରକାଶ କରିଥିବା ବେଳେ ସାମାନ୍ୟ କିଛି ଅପମୃତ୍ୟୁ ମାମଲା ରୁଜୁ କରି ନୀରବ ବସିଯାଇଛି ବନ ବିଭାଗ। ଅନ୍ୟପଟେ ପ୍ରାୟ ପ୍ରତ୍ୟେକ ଦିନ ଗାଁଠାରୁ ଆରମ୍ଭ କରି ସହର ପର୍ଯ୍ୟନ୍ତ ବିକ୍ରି ହେଉଛି ବନ୍ୟ ଜନ୍ତୁଙ୍କର ମାଂସ, ଚମଡା, ନଖ ଓ ଦାନ୍ତ ଇତ୍ୟାଦି ମୂଲ୍ୟବାନ ଦ୍ରବ୍ୟ । ଯାହାର ମୂଲ୍ୟ ଆକାଶ ଛୁଆଁ ରହୁଥିବାରୁ ବେଶ୍ ଲାଭବାନ ହୁଅନ୍ତି ଚୋରା ବେପାରୀ।
ବିଗତ 3 ବର୍ଷ ମଧ୍ୟରେ ଲାଠୋର ଜଙ୍ଗଲରେ ଗୋଟିଏ ରୟାଲ ବେଙ୍ଗଲ ବାଘକୁ ମରା ଯାଇଥିବା ବେଳେ ସଇଁତଳା, ବଡମାଳ ତଥା ହରିଶଙ୍କର ଅଞ୍ଚଳରେ ମରା ଯାଇଛି 3ଟି କଲରା ପତ୍ରିଆ ବାଘ। ଏହାଛଡା ଶିକାରୀ ଜାଲରେ ପଡି ମରଣ ମୁହଁକୁ ଠେଲି ହୋଇଯାଉଛନ୍ତି ହାତୀ, ହରିଣ ଓ ବାର୍ହା ଆଦି ପଶୁ। ସେହିପରି ବିଗତ 10 ବର୍ଷ ମଧ୍ୟରେ ଫସଲ ହାନୀ ଯୋଗୁଁ ବିଦ୍ୟୁତ ତାର ଦ୍ୱାରା 10ରୁ ଅଧିକ ହାତୀଙ୍କୁ ମାରି ଦିଆଯାଇଛି।
ସରକାରୀ ରିପୋର୍ଟ ଅନୁସାରେ ବଲାଙ୍ଗୀରରେ ମୋଟ ୬ହଜାର ୫ଶହ ୭୫ ବର୍ଗ କିଲୋମିଟର ବ୍ୟାପୀ ଜଙ୍ଗଲ ରହିଛି । ଯେଉଁଥିରୁ ମୋଟ ୭୦ବର୍ଗ କିଲୋମିଟର ଘଞ୍ଚ ଜଙ୍ଗଲ ରହିଥିବା ବେଳେ ଏବେ ଏହା ହ୍ରାସ ପାଇବାରେ ଲାଗିଛି। ଏଭଳି ସ୍ଥିତିରେ ଅବାଧ ଶିକାର ଯୋଗୁଁ ହାତ ଗଣତି ବାଘ ସରିବାକୁ ବସିଥିବା ବେଳେ ଆଗକୁ ହରିଣ, ବାର୍ହା ଭଳି ବନ୍ୟ ପ୍ରାଣୀ ମଧ୍ୟ ଲୋପ ପାଇବା ଅବସ୍ଥାରେ ପହଞ୍ଚିଲେଣି । ଯାହା ସ୍ପଷ୍ଟ କରେ ବନ ବିଭାଗର ଅକର୍ମଣ୍ୟତା ।
ଗୋଟିଏ ପଟେ ଅବାଧ ବନ୍ୟଜନ୍ତୁ ଶିକାର । ଅନ୍ୟପଟେ ବନ ବିଭାଗର ସ୍ଥାଣୁତା । ଫଳସ୍ୱରୂପ ଏବେ ଧ୍ୱଂସମୁହାଁ ବନ୍ୟଜନ୍ତୁ ସମ୍ପଦ। ଯଦି ବନ୍ୟଜନ୍ତୁଙ୍କ ଉପରେ ମଣିଷର ଏହି ମନମୁଖୀ ଶାସନ ବନ୍ଦ ନହୁଏ ତେବେ ସେ ଦିନ ବେଶୀ ଦୂର ନୁହେଁ ଯେବେ ଇତିହାସ ପାଲଟିଯିବେ ଏହି ଅମୂଲ୍ୟ ବନ୍ୟ ପ୍ରାଣୀ ସମ୍ପଦ ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ, ଇଟିଭି ଭାରତ
