ବଲାଙ୍ଗୀର: ସଇଁତଲା ବ୍ଲକ ଅନ୍ତର୍ଗତ ଡୁଙ୍ଗରିପାଳି ପଞ୍ଚାୟତ ଅଞ୍ଚଳରେ ୫୫ଏକର ପରିମିତ ଜମିରେ ଏକ ଘରୋଇ କମ୍ପାନୀର ପ୍ରସ୍ତାବିତ ସୋଲାର ପାୱାର ପ୍ଲାଣ୍ଟକୁ ବିରୋଧ କରିଛନ୍ତି ସ୍ଥାନୀୟ ବାସିନ୍ଦା । ପ୍ରସ୍ତାବିତ ପ୍ଲାଣ୍ଟଟି ଗୋଚର ଜମିରେ ହେବାକୁ ଥିବାବେଳେ ଏହା ଫଳରେ ଆଖପାଖ ଅଞ୍ଚଳର ଲୋକ ପ୍ରଭାବିତ ହେବା ଆଶଙ୍କା କରି ଏହାକୁ ତୀବ୍ର ବିରୋଧ କରାଯାଉଛି ।
ଆଜି ପଞ୍ଚାୟତ କାର୍ଯ୍ୟାଳୟ ପରିସରରେ ସରପଞ୍ଚ ସୁଫଳ ମାଝୀଙ୍କ ନେତୃତ୍ବରେ ଏକ ଗ୍ରାମସଭା ଅନୁଷ୍ଠିତ ହୋଇଥିଲା। ଏହି ଅଞ୍ଚଳରେ ସୋଲାର ପ୍ଲାଣ୍ଟ ନିର୍ମିତ ହେଲେ ତେଣ୍ଡିପାଳି ଓ କୁଆର ଗାଁର ଲୋକେ ସର୍ବାଧିକ ପ୍ରଭାବିତ ହେବେ । ଗାଁରୁ ଗୋରୁଗାଈ, ଛେଳି ମେଣ୍ଡାଙ୍କ ଚରାଭୂଇଁ ଚାଲିଯିବା ନେଇ ଗ୍ରାମବାସୀ ଆଶଙ୍କା କରିଛନ୍ତି । ସେହିପରି ପ୍ରସ୍ତାବିତ ଜମି ଗୋଚର ଶ୍ରେଣୀଭୁକ୍ତ ହୋଇଥିବା ସତ୍ତ୍ବେ ମଧ୍ୟ ବିନା ଗ୍ରାମସଭା ଓ ପଲ୍ଲୀସଭା ଅନୁମତିରେ କିପରି ପ୍ରକଳ୍ପ କାମ ହେବା ପାଇଁ ଅନୁମତି ମିଳିଲା, ତାକୁ ନେଇ ମଧ୍ୟ ପ୍ରଶ୍ନ ଉଠିଛି ।
ପୂର୍ବରୁ ଏହି ପ୍ରକଳ୍ପକୁ ବିରୋଧ କରି ସ୍ଥାନୀୟ ଗ୍ରାମବାସୀ ସଇଁତଲା ତହସିଲଦାରକୁ ଦାବିପତ୍ର ପ୍ରଦାନ କରିଥିଲେ । କିନ୍ତୁ ତହସିଲଦାର କୌଣସି ଆଶ୍ବାସନା ନ ଦେବା ନେଇ ମଧ୍ୟ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଥିଲା । ପ୍ରଶାସନ ଠାରୁ ଆରମ୍ଭ କରି ନେତାମନ୍ତ୍ରୀଙ୍କ ଦ୍ବାରସ୍ଥ ହୋଇଥିଲେ ସୁଦ୍ଧା କେହି କର୍ଣ୍ଣପାତ କରିନଥିଲେ । ଫଳରେ ଆଜି ଗ୍ରାମବାସୀ ସଇଁତଲା ତହସିଲ ଅଫିସ ଘେରାଉ କରିଥିଲେ। ଅନ୍ୟପଟେ ଘଟଣା ନେଇ ସଇଁତଲା ତହସିଲଦାରକୁ ପଚାରିବାରୁ ତାଙ୍କ ପକ୍ଷରୁ ସନ୍ତୋଷଜନକ ଉତ୍ତର ମିଳି ପାରିନାହିଁ ।
ବଲାଙ୍ଗୀରରୁ ଏସ କେ ମହମ୍ମଦ ଓ୍ବାହିଦ, ଇଟିଭି ଭାରତ
