ବଲାଙ୍ଗୀର: ଲକଡାଉନ ସ୍ଥିତିରେ ସମସ୍ତ ବ୍ୟବସାୟ ପ୍ରଭାବିତ ହୋଇଥିବା ବେଳେ ପର୍ଯ୍ୟାୟ କ୍ରମେ ଅନଲକ ପ୍ରକ୍ରିୟା ସହ ଖୋଲୁଛି ଗୋଟିଏ ଗୋଟିଏ ବ୍ୟବସାୟୀ । ହେଲେ କେବଳ ଚା’ ଦୋକାନଟିଏ କରି ପରିବାର ଚଲାଉଥିବା ବ୍ୟବସାୟୀଙ୍କ ନେଇ ଏଯାଏଁ ହୋଇନି କୌଣସି ଘୋଷଣା । ଯାହାକୁ ନେଇ ଚିନ୍ତିତ ଚା’ ବ୍ୟବସାୟୀ । ଏନେଇ ବୁଧବାର ଜିଲ୍ଲାର ସମସ୍ତ ଚା’ ଦୋକାନୀମାନେ ବଲାଙ୍ଗୀର ଟାଉନ ଥାନା ଘେରାଓ କରିଥିଲେ ।
ଦୀର୍ଘ 5 ମାସ ହେବ ଜିଲ୍ଲାରେ କୋରୋନା ପାଇଁ ଚା’ ଦୋକାନ ବନ୍ଦ ଥିବା ବେଳେ ଏଥିରୁ ରୋଜଗାର କରି ନିଜ ପରିବାର ପୋଷଣ କରୁଥିବା ଚା’ ବ୍ୟବସାୟୀମାନେ ଏବେ ଅସହାୟ ହୋଇପଡିଛନ୍ତି । ତାଙ୍କ ଜୀବନ ଜୀବିକା ଠପ ହୋଇ ଯାଇଥିବା ବେଳେ ପରିବାର ଚଳାଇବା ଅସମ୍ଭବ ହୋଇ ପଡିଛି । ଏଥିଯୋଗୁଁ ବୁଧବାର ସହରର ସମସ୍ତ 350 ଚା’ ବ୍ୟବସାୟୀ ରାଜରାସ୍ତାକୁ ଓହ୍ଲାଇ ଥିଲେ ଏବଂ ଟାଉନ ଥାନା ଘେରାଉ କରିବା ସହ ଚା’ ବ୍ୟବସାୟ ସ୍ବାଭାବିକ କରିବା ପାଇଁ ଦାବି କରିଥିଲେ ।
ତେବେ ପ୍ରଶାସନ ସହିତ ତାଙ୍କର ଆଲୋଚନା ପରେ ପ୍ରଶାସନ ତାଙ୍କୁ ସକାଳ 6ଟାରୁ ଦିନ 1ଟା ପର୍ଯ୍ୟନ୍ତ ଚା’ ଦୋକାନ ଖୋଲିବାର ଆନୁମତି ଦେଇଛି । ଏଥିସହିତ କୋଭିଡ ନିୟମ ମାନି ବ୍ୟବସାୟ ସ୍ବାଭାବିକ କରିବା ପାଇଁ ଦୋକାନୀମାନଙ୍କୁ ତାଗିଦ କରାଯାଇଛି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
